UBURYO MBONA NYAKUBAHWA PETERO NKURUNZIZA PEREZIDA W’UBURUNDI YASOHOKA MU BIBAZO BYUGARIJE IGIHUGU AYOBORA /KAYITARE JAMES

Kuva aho ishyaka riri ku butegetsi mu Burundi ritangarije ko Petero Nkurunziza uyobora icyo gihugu muri icyi gihe ariwe uzarihagarararira mu matora, intambara z’ubwoko butandukanye zaradutse muri icyo gihugu. Abantu bo mu nzego zinyuranye baba abari mu Burundi, mu bihugu bituranye nabwo, ndetse no mu bihugu bigize ikitwa «umuryango mpuzamahanga (communauté internationale) » bari kuyigiramo uruhare ruziguye  (de façon indirecte) n’urutaziguye (manière directe).

Abigaragambiriza mu murwa mu kuru wa Bujumbura bamagana iyo manda ya gatatu ya Nkurunziza (Nyamara mu by’ukuri usomye itegeko nshinga ry’u Burundi usanga iyo manda ayemerewe), baritwara nk’aho igihugu bari gusenya atari icyabo, dore ko uko bigaragara hari akandi kaboko kabari inyuma, bityo Nkurunziza akaba yabuze uko abagenza !

Inzego z’umutekano cyane cyane igisirikare, biragaragara ko badashyize hamwe mu rwego rwo kurengera  ubuzima bw’abantu n’ibintu byabo, igipolisi n’abigaragambya bakagaragara nk’aho ari abanzi bari gukindagurana.

Ibihugu bituranye n’uburundi nabyo byigize abasifuzi (arbitres) nk’aho bizi ibibazo biri mu Burundi kurusha abenegihugu. Ibitangazamakuru mpuzamahanga n’ibyo mu karere bimwe na bimwe, nabyo biri kwitwara nk’abafana bafite aho bahengamiye kandi itangazamakuru ryakagombye kuba nta ruhande ribogamiyeho.

Nyamara aho ihirikwa ry’ubutegetsi riburiyemo, isura y’ibiri kubera mu Burundi yagaragaje ko atari ikibazo cy’amatora ya perezida w’igihugu cyabyukije iriya midugararo yose. Ndahamya  ntashidikanya ko ubutegetsi buriho mu Burundi budashimishije ba mpatsibihugu bamwe na bamwe (Amerika n’inshoreke zayo z’abanyaburayi) n’ibihugu bibakorera bituranye n’u Burundi cyane cyane u Rwanda n’Ubugande, bakaba bari barategereje igihe nyacyo ngo bahindure ubutegetsi mu Burundi, babuvane mu maboko ya ba Nyamwinshi (Abahutu) babushyikirize ba Nyamuke (Abatutsi) bo biteguye guhagararira inyungu za mpatsibihugu nta mususu.

Ikimenyimenyi  ni uko impunzi zahungiye mu bihugu bituranye n’u Burundi cyane cyane mu Rwanda umubare munini wazo ari abatutsi. Urebye ukuntu abategetsi b’u Rwanda bazakiriye nk’amata y’abashyitsi bukihutira kuziha ibya ngombwa by’ubuhunzi, ntiwashidikanya ko u Rwanda rubirimo. Urebye amakaritsiye aberamo imyigaragambyo wasanga ari atuwemo n’abatutsi benshi. Mu by’ukuri ubutegetsi bw’uburundi bwarahagurukiwe, ahubwo nibashake uburyo bwo kurwana uru rugamba rubasatiriye impande zose.

Ibimenyetso byigaragaza

Niba hari umutegetsi w’u Burundi usoma kino kinyamakuru namasaba gusesengura ibi bimenyetso bigaragaza ko niba nta ngamba bafashe mu maguru mashya, Kagame n’abamukoresha barangije kwigarurira kino gihugu. Kandi ibi bimenyetso birasa neza neza n’ibyo ubutegetsi bwariho mu Rwanda mu 1994 ubwo FPR iyobowe na Kagame bendaga kuyihirika bwanyuzemo.

1. Ubutegetsi bw’u Burundi bwarangije gusigwa isura mbi (Diabolisation) n’ibitangazamakuru mpuzamahanga ngo buri gutegura genocide kugirango ihindurwa ku ngufu ry’ubutegetsi niriba ntihazagire uwo ribabaza (Ese ko badasobanura abazibasirwa n’iyo genocide ?). Ibyo cyane cyane bikwirakwizwa n’ubutegetsi bw’u Rwanda kuko aribwo buzi gucabiranya bukagira n’ijambo rikomeye mu bitangazamakuru mpuzamahanga bikomeye.
2. Ikwirakwizwa ry’ibihuha mu moko atuye u Burundi ko abatutsi bagiye kwibasirwa n’ubutegetsi buyobowe, buzayoborwa na Nkurunziza nyuma y’amatora. Ibi bihuha nibyo bikangurira abatutsi b’i Burundi guhunga no kwigaragambya, kandi bikwirakwizwa na maneko z ‘u Rwanda zacengeye i Burundi.
3. Amatangazo asohorwa buri munsi n’abadipolomati agamije guhahamura abategetsi.
4. Kohereza ingabo z’amahanga mu Burundi bitwaje kurinda za ambasade zayo. Abarundi  muritonde abo basirikare bazanywe n’ubutumwa bubiri cyangwa bwinshi, kandi nta kiza bwifuriza u Burundi. Mwibuke za MINUAR zo mu Rwanda ibyo zakoze mu guhirika ubutegetsi.
5. Gukangurira abaturage kwigumura no kwigomeka ku babayobora. Ngirango aha mu Rwanda turibuka za animasiyo n’imyigararagambyo byirirwaga bikorwa, abantu barahagaritse imirimo ngo Habyarimana navaho impundu zizavuga. Iyo yari imipangu y’inkotanyi.
6. Gukwirakwiza ibihuha ngo Interahamwe na FDLR biri mu Burundi gukorana n’imbonerakure ngo bice udashaka ko Petero Nkurunziza yiyamamaza. Mu by’ukuri aha niho hagaragaza uruhare rwa Kagame mu bibazo u Burundi burimo, kuko buri gihe yitwaza FDLR iyo ashaka kurimbura abantu mu gihugu no hanze yacyo (Congo). Ubu rero ni u Burundi bugezweho.

Ibimenyetso byo ni byinshi nta wabivuga ngo abimare, ariko icya ngombwa ni umuti w’ibibazo bigaragara.

Uko mbona abayobozi b’u Burundi bakwiye kubyitwaramo

Ntabwo ndi umunyapolitiki (political strategist) ku buryo navuga ngo ibisubizo ngiye gutanga byakemura burundu ibibazo byavuzwe, ariko ntibikwiye ku muntu ubabajwe n’imvururu abavandimwe b’Abarundi barimo kwituramira nk’ureba filime yarangira ukikomereza ibyo wari urimo. Sinzi kandi niba Perezida Nkurunziza cyangwa abajyanama be babasha gusoma ibiba byanditswe mu binyamakuru, kuko nta gihe bitavuzwe ko hari ibihugu birimo gutegura imvururu mu Burundi.

                                                 Perezida  Nkurunziza Pita mu masengesho
                                      KWIBERA MURI YESU NI UMUNYENGA W'IMANA

1. Niba inzego z’ubutasi bw’u Burundi zifite amakuru n’ibimenyetso bifatika ko hari abamaneko b’ibindi bihugu bacengejwe mu Burundi, hakwiye gukorwa igikorwa (operations)  cyo kubahiga mu mikwabo ariko ntawe uhohotewe, dore ko bashobora kuba bihisha muri ya makaritsiye y’i Bujumbura aberamo imyigaragambyo, kandi bafatwa bakerekwa itangazamakuru ryo mu gihugu na mpuzamahanga.
2. Hakwiriye kubaho ubukangurambaga mu banyagihugu bose bwo kwerekana ko hari ibindi bihugu byivanze mu bibazo by’u Burundi kandi bishaka kubaryanisha (na Petero Nkurunziza yarabivuze mu ijambo rye nyuma yo kuburizamo coup d’Etat)
3. Abategetsi b’u Burundi bakwiye gutumiza itangazamakuru  bakaryereka ido n’ido nta kurya umunwa uko ibihugu bitandukanye byivanga mu bibazo byabwo ndetse hakagira ibitungwa agatoki ku mugaragaro. Jye numva ibyo byatuma « communauté internationale » icikamo kabiri bityo abari bafite uruhande bahengamiyemo bakigarura hanyuma Abarundi bagahumeka. Na Habyarimana mu Rwanda yanze kuvuga ku mugaragaro ngo atiteranya, ariko byarangiye bamuhitanye. Nyamara iyo atabaza avuga ko yatewe n’Ubuganda n’ibihugu bafatanyije, wenda yari gutabarwa, cyangwa ibibazo bigakemurwa ari ibihugu bibiri biganiriye.

Umwanzuro

Hari imigani mu kinyarwanda ivuga ngo « intamenya ntibwira umugenzi », « iyo mbimenya yari ijambo iyaba yazaga mbere ». Abarundi bari kurwanya ubutegetsi bwabo bakorera inyungu z’abanyamahanga  aho kwicara hamwe mu mutuzo ngo barebe icyabagirira akamaro bose. Cyane cyane biragaragara ko u Rwanda arirwo rufite inyungu mu kavuyo kari i Burundi rugamije gushyiraho ubutegetsi bukorera mu kwaha kwa Kagame. Barundi bavandimwe, iyaba mwari muzi amarira abanyarwanda (abahutu na benshi mu batutsi) bafashije Kagame na FPR ye kugera ku butegetsi mu Rwanda  bari kurira uyu munsi, mwahindura ingendo. Kagame namara kubahitiramo umuyobozi umukorera, muzifuza Nkurunziza mutakimubonye ! simvuze ko ari we Kamara kuri mwe kuko hari n’abandi wenda bayobora neza, ariko nkeka ko kariya karwi kateye mu Cibitoke kamuhumuye amaso akabona ko agiye yaba asize igihugu ahantu habi cyane ; kandi umurongo abayoboramo mu Rwanda turawifuza cyane ariko twarawubuze.

Birababaje kubona hari abanyepolitiki b’abahutu barwanya Leta y’u Rwanda bari hanze bakaba babona ibibazo u Burundi burimo no mu Rwanda twarabinyuzemo mu myaka ya za 1990-1994 ariko bakaba nta musanzu w’ibitekerezo bari guha abategetsi b’u Burundi. Birashoboka ko icyo gihe batashoboye kubyivanamo kigabo, ariko ubunararibonye (experience) bahakuye bakagombye kubusangira n’abategetsi b’u Burundi bityo bo ntibagwe mu manga nk’iyo twaguyemo. Abo banyepolitiki nabakangurira kumva ko abarundi ari abavandimwe bityo umusonga wabo ukababuza gusinzira.

Ntawe utanga icyo adafite, umusanzu wanjye wari uwo. Uwawe ni uwuhe ?

KAYITARE James

Inshuti ya Shikama 

Shikamaye.blogspot.no

Shikama ku Kuri na Demukarasi(SKUD)