Amaraso mashya n’amashagaga byirukana abameya nk’uwirukana ababoyi n’abayaya minisitiri KABONEKA Francis yinjiranye muri MINALOC ni umwanya abatavuga rumwe na Kagame bari babonye kugira ngo abenegihugu bacungurwe kandi biracyakomeza kuko urutonde rw’abameya bagomba kwirukanwa ari rurerure. SHIKAMA irakubwira bane(4) batahiwe n’impamvu bagomba kugenda/ UDAHEMUKA Eric

Ibumoso KABONEKA Francis, iburyo MUSONI James mu muhango w'ihererekanya bubasha muri MINALOC i Kigali taliki 20 Nzeri 2014

Guhera taliki 19 Nyakanga 1994 ubwo FPR yafataga ubutegetsi mu Rwanda kugeza uyu munsi, nta n’isegonda n’imwe igihugu cyagize ishyikizo ngo abenegihugu babeho mu mahoro kandi bumve batuje batekanye. N’ubwo muri SHIKAMA tuzi neza ko mu giturage akarengane gaca ibintu nyamara n’abatware n’ibikomerezwa nabyo ni uko ni ukubabona bagenda mu modoka zihenze nyamara ari ba mbarubukeye na ba sinzibiramuka imitima yabo yarabaye imivogo n’ibikange.

Ibi byagiye bigaragarira mu ishyirwaho ritunguranye nk’abategetsi ku bantu wabonaga mu by’ukuri nta bushobozi bazwiho ndetse nta n’ubunyangamugayo buhagije ndetse bamwe ari n’abicanyi ruharwa bagiye bavugwa cyane.  Icyakunze gukurikiraho ni iyeguzwa, ifungwa, iyicwa n’imeneshwa kuri bamwe bagahunga u Rwanda bakizwa n’amaguru.

Nyakibi ntarara bushyitsi

Hari igihe hashira iminsi mike abaturage bagakeka ko igihugu gifite ituze ariko siko biri kuko nk’uko umwaka wa 2014 usize ugaritse ingogo, n’umwaka mushya wa 2015 utangiye wisasira abayobozi b’uturere ubu bamaze kuba benshi begujwe kandi n’abandi bagomba kweguzwa baracyahari kuko urutonde ari rurerure.

Abamaze kubikirwa imbehe ni abayoboraga uturere twa Gatsibo, Kirehe, Rwamagana, Gasabo, Rusizi, Nyamasheke na Karongi. Ku muntu uzi neza uko FPR ibika inzika ikora kandi ntigire na rimwe yibagirwa ngo isonere abenegihugu, ntawatinyuka kwemeza ko n’abandi batagiye kweguzwa kuko impamvu ari uruhuri.

Mbere y’uko muri SHIKAMA tubabwira abazakurikiraho vuba aha reka tubanze tubibutse KABONEKA urimo kubica bigacika uwo ariwe kuko bigaragara ko ashobora kuba yareguriwe ububasha bwose ku turere mu gihe ubundi twari dusanzwe tuzi ko Kagame ariwe wa nyuma ufite ijambo kuri ba Meya ariko bikaba byarahindutse kuko uyu KABONEKA Francis yirirwa abirukana nk’uwirukana ababoyi n’abayaya bo mu rugo.

Ese mwari muzi ko aya mashagaga ya Kaboneka muri MINALOC arimo kwica Itegeko-Nshinga

Mu butegetsi bwite bwa Leta habamo ubutegetsi butatu. Umuyobozi w’akarere uzwi ku izina rya Meya ariwe cyera ku bwa Habyarimana bitaga burugumesitiri abarirwa mu butegetsi nyubahiriza-tegeko. Kugira ngo ashyirweho atorwa n’abaturage. Ku badaheruka mu Rwanda, kugira ngo meya atorwe yiyamamaza mu rwego rw’umudugudu, ubwo baba ari benshi mu rwego rwo kujijisha kwa FPR kuko uzatorwa iba yaramaze kumugena rugikubita.

Aho mu nzego z’ibanze, FPR itegeka abagize komite-nyobozi uwo bagomba guhundagazaho amajwi yose nta n’umwe uvuyemo. Uko bagenda bazamuka mu nzego zisumbuyeho niko izina ry’ugomba kuba meya rigenda rirushaho kumenyekana. Niba umuyobozi w’akarere ashyirwaho binyuze mu matora, ni na ngombwa ko akurwaho icyizere n’abo baturage bamutoye.

Yaba Kagame, yaba MINALOC, yaba Njyanama y’akarere nta rwego na rumwe rufite uburenganzira bwo kumutegeka kwandika ibaruwa yo kweguzwa ku ngufu ngo anayandikemo ko yeguye ku bushake bwe kandi atari byo! Ibi byerekana kwivanga mu nshingano no gukoresha ububasha wahawe ubangamira inyungu rusange z’abaturage. Kuki umuturage agira ijambo mu gushyiraho Meya ariko akamburwa ijambo mu kumuvanaho?

Minisitiri Kaboneka nyuma yo gucamo ibice abadepite agiye no kuzengereza abayobozi b’uturere 

Bwana KABONEKA Francis wabaye depite mu nteko ishinga amategeko ku Kimihurura, yahabaye intumwa idatenguha ya Paul Kagame ku buryo iyo habaga hari umushinga w’itegeko uri bwigwe, mbere y’iminsi ibiri ngo inteko rusange iterane, Kaboneka yazengurukaga mu ngo z’abadepite bagenzi be abategeka ngo iri tegeko tugiye kwiga muzaritore cyangwa muzaryange ababusanyije nawe nibo mwagiye mwumva FPR ibahimbira ibyaha bitabaho.

Iyi myitwarire ya kimaneko ku Kimihurura agemura ubugambo bwa hato na hato kwa Paul Kagame burimo n’ubwo kubeshya inshuro nyinshi byatumye Kagame wumva amabwire kubi ahitamo kumugira minisitiri w’ubutegetsi bw’igihugu kandi anamuha ububasha bwose bwo kwirukana umuyobozi w’akarere wese ashatse ariko ibi Kagame akaba yarabimuhariye kuko amaze kunanirwa.

Nyuma y’aba 7 begujwe, n’abandi bane(4) Rulindo, Muhanga, Musanze na Ruhango babe bitegura kweguzwa byihuse

 Hari amkuru arimo gucicikana muri Kigali ko abameya barimo kwegura ari ukubera kunyereza amafaranga y’ubwisungane mu kwivuza nyamara ntabwo aribyo kuko iyo biza kuba byo, ntabwo Kayumba Bernard wayoboraga Karongi aba yegujwe shishitabona kuko abaturage be bitabiriye bikomeye ubwisungane.

Kaboneka mbere y’uko agirwa MINALOC muri SHIKAMA dufite amakuru ko Kagame yamuhaye uburenganzira bwo kurema amaraso mashya mu turere kuko abariho bagomba kuvaho hatitawe ku m ikorere n’ubutoni bya buri umwe ku giti cye. Niyo mpamvu n’abandi bane(4) nabo bagiye kuvanwaho byihuse.

Akarere ka Rulindo: Bwana KANGWAGYE Justus, umutoni kwa Kagame w’imyaka myinshi asaziye ku buyobozi bw’akarere ka Rulindo yafatanije no kuyobora LARGA urwego ruhuza uturere ariko Kagame ntakimushaka kuko abantu bose muri Kigali babona Kangwagye ahwanye na Kagame kubera ubutoni yamugizeho.

Ubu butoni bwatumye Kangwagye akora amakosa arimo n’akomeye cyane nko gutwara abagore b’abagabo mu karere ayobora abagabo babao bajya kuregera igipolisi bagakubitwa bandi bagafungwa ku buryo ubu abaturage bamuvumira ku gahera. Ashobora kweguzwa kugira ngo Kagame ahumeke gato imivumo y’abanyarulindo kuko mu mikorere ya Kangwagye yakoze amakosa menshi kubera guhagarikirwa n’umwami Kagame.

Akarere ka Musanze: Madamu Mpembyemungu Winifirida uyobora akarere ka Musanze we sindi bwongere kumugarukaho kuko ibye nabisobanuye birambuye mu nyandiko nabagejejeho iheruka ndetse ndizera ko byamubera byiza yibwirije akandika yegura mbere y’uko FPR imuturumbura mu nama agasebera imbere y’abo yayitumiyemo nk’uko KABONEKA yohereje abapolisi bakambika amapingu Meya wa Rusizi imbere ya rubanda abantu bakumirwa.

Akarere ka Muhanga: Madamu MUTAKWASUKU Yvonne uyobora akarere ka Muhanga kubatsemo umujyi wa Gitarama we FPR imaze imyaka itatu imurwaye inzika ikomeye ku buryo we atanitonze ashobora no gufungwa. Mutakwasuku yafashe ibitiyo, amasuka, indabo n’imisaraba ajya gutaburura sebukwe BINEGO w’umuhutu wiciwe n’inkotanyi i Shyogwe zimutaba mu muringoti mu 1994.

Kubera ukuntu FPR iba ifite maneko impande zose mu gihugu n’aho utakeka, Kagame yahise ategeka minisitiri Musoni guhamagara Mutakwasuku kuri terefoni igendanwa amutegeka byihuse guhita yongera agataba sebukwe muri uwo muringoti. Mutakwasuku rero ntakeke ko iyo nzika FPR yayibagiwe. Kaboneka azayimuhora rwose kuko n’ibyoroshye barabizira.

Mutakwasuku kandi agomba kujyana na Visi Meya we ushinzwe iterambere ry’ubukungu Bwana UHAGAZE Francois muri iyi minsi FPR irimo gushinja kwigarurira ibirombe byose by’amatafari n’amategura mu Karere ka Muhanga. Ibi birombe rero bigomba gukora ibara i Gitarama kuko ubundi UHAGAZE Francois wavuye i Burundi atabyemerewe kuko byihariwe n’abavuye i Bugande bagengwa na MUSONI muri Gitarama.

Ikimenyetso cy’uko nta wundi wemerewe gucukura ibirombe by’amatafari n’amategura mu Rwanda hose ni uko mu 2009 umugabo w’i Gitarama witwa Fulgence wayoboraga korali muri Paruwasi Gatulika ya Gitarama mu Ruhina inyuma ya gereza ya Gitarama yarasiwe mu birombe bye mu kibaya cya Byimana munsi y’ishuri ry’i Bukomero kwa Furere Alvarus akaraswa mu gitondo cya kare.

Icyo bamuhoye ni uko yatwikaga ibirombe by’amatafari n’amategura ari umuhutu mu gihe abagande bica bagakiza muri Gitarama barimo Musoni bari bamaze igihe bamwiyama gukomeza gucuruza ariko ntasobanukirwe icyo bashakaga kumubwira. Imana imwakire mu bayo kandi imfubyi yasize zegamye hariya mu Kibirigi i Gitarama, muri SHIKAMA tuziragije Imana kuko yazize ubusa kimwe n’abandi banyarwanda batabarika FPR yirengeje.

Mbahaye uru rugero kugira ngo numvikanishe neza impamvu byanze bikunze mu buyobozi bw’akarere ka Muhanga Mutakwasuku agomba kujyana n’UHAGAZE Francois kuko ibirebana n’imari ntabwo FPR yagusonera uretse ko nta n’icyemeza ko aribyo. Bishobora kuba atari nabyo ariko FPR ikabikwiza mu banyagitarama kugira ngo yikize abahayobora.

Mutakwasuku uyobora Gitarama kandi afite irindi kosa ryo ritababarirwa na FPR ryo kuba Kagame yaramuhaye amabwiriza yo gutaburura MBONYUMUTWA mu gicuku ku buryo bwagombaga gucya filimi yarangiye ariko agakora amakosa bukamucyeraho ataramara kwiba intwari ya Demukarasi. Icyi nacyo cyababaje abo mu gatsiko ku buryo atazakira minisitiri Kaboneka.

Akarere ka Ruhango: Bwana MBABAZI Francois-Xavier uyobora akarere ka Ruhango, FPR yamukoresheje amakosa akomeye ku buryo nawe nta cyizere cy’uko azasohoka amahoro muri politiki y’ingoma y’ingoma y’agatsiko k’abicanyi irangajwe imbere na Kagame. Natagubwa nabi na FPR ubwayo kubera Mupagasi wakomeje kumushinja kujya kwica iwabo muri 1994(mu rubanza yaburaniye ku Mujyajyaro hafi yo ku ntenyo) azagubwa nabi n’abahinzi bibumbiye muri Sendika INGABO i Gitarama kuko yayiyoboye imyaka irenga 14 ayibereye umuhuzabikorwa.

Muri SHIKAMA twigeze kubagezaho inkuru ndende yavugaga ukuntu inyubako ya Sendika Ingabo i Gitarama kuyuzuza byananiranye bitewe na ruswa zaririwe mu mushinga wo kuzamura iyi nyubako ihenze ariko FPR ikaba yarahamukuye ikamugira Meya wa Ruhango atari ukubera urundi rukundo ahubwo ari ukugira ngo isenye burundu uyu muryango w’abahinzi FPR yita ishyirahamwe ry’abahutu bashaka guhirika ubutegetsi bwa Kagame.

Uwahakana ibi yazabibaza Liyetona Katibu maneko wa Kagame i Gitarama wahawe aka kazi ko gusenya ingabo ku kiguzi icyo aricyo cyose biza kuba ngombwa ko MBABAZI yisanga ari meya wa Ruhango, ibintu atigeze arota na rimwe mu buzima bwe. Amakuru SHIKAMA ifite aravuga ko abahinzi bibumbiye muri Sendika INGABO baba barimo kwitegura kujyana ikirego mu butabera kurega meya wa Ruhango.

Akajagari gahoraho mu butegetsi, inzira nziza ku batavuga rumwe nabwo

Abantu bahora bavuga ko barwanya Paul Kagame bishoboke ko ajya afata akanya arimo nko kwinywera icyayi mu rugo iwe cyangwa mu biro bye ku Kacyiru muri Village Urugwiro akikanga bamuhiritse kuko nawe azi neza ko ingoma ye ijegajega cyane. N’ubwo ntako batagira baracyacyeneye kwihuriza hamwe kugira ngo bashime abaturage ahabarya kandi birashoboka.

Kubera iki? Kubera ko abaturage bahora bibaza impamvu abayobozi b’uturere bahozwa ku nkeke. Uyu ni umwanya mwiza ku batavuga rumwe na Kagame kugira ngo babwire abaturage imigabo n’imiambi yabo kandi ndakeka ko abaturage bashobora kubumva byihuse kuko barambiwe guhora baturwa hejuru ibyemezo kenshi bitanahwitse bidindiza iterambere ry’uturere twabo.

UDAHEMUKA Eric

Shikamaye.blogspot.no/

Shikama ku Kuri na Demukarasi(SKUD)