Shikama irasubiza Abakomiseri ba Twagiramungu Fawusitini/Nkusi Yozefu

                                                            

     Twagiramungu Fawusitini abwira abanyamakuru 

  ko APR(RDF) yirwanagaho  yica impunzi z'abahutu 

zirenga ibiumbi bitanu mu nkambi y'i Kibeho muri 1995

Ndabanza gushimira umuvandimwe majoro Kanyamibwa Yakobo( Komiseri w'ishyaka rya Twagiramungu Fawusitini ushinzwe umutekano n'iperereza) ku nyandiko aherutse guhitisha kuri Veritas Info yerekana ko twagombye twese guhitisha ukuri mubyo tuvuga n’ibyo dukora, ibi rero bikaba bijyanye n’ntego Shikama yihaye yo “ Guharanira ko ukuri gusimbura ikinyoma”. Nkiri kuri uyu muvandimwe, yanenze abantu bapfobya ubutwari bw’Inzirabwoba ku rugamba twashoweho n’Inkotanyi zivuye mu gihugu cya Uganda muri 1990, akagira ati:”ubonye nyina ashaje agirango inka za se zapfuye ubusa”. 

Ndagirango rero muhumurize mubwira ko hari abanyarwanda n’abanyamahanga bazirikana ibyo Inzirabwoba zabakoreye igihe FPR yatwikaga inkambi muri Zaire aho bemeza ko mu ihunga izi ngabo zabakingiraga amasasu ya FPR n’ubundi bugome bakorerwaga n’amwe mu moko ya Zaire; ibi bikaba bizagaragara mu bitabo 2 biri hafi gusoka, kimwe kikaba cyaranditswe n’umunyarwanda ikindi umunyamahanga. Kagame ariho arakangurira abana bavutse nyuma ya 1994 kwandika ku mateka y’ibyabaye mbere yaho, namwe mwese mwatwikiwe mu nkambi za Zaire  mukanga gushya ngo mushirire, namwe mukiri mu mashyamba n’abandi bari hirya hino ku isi, ni ngombwa kwandika ku buzima mwabayemo kugirango abana banyu bazabwire abazabakomokaho ko ingufu z’Imana  ari igitangaza!

Ngarutse ku nkuru nyamukuru: mperutse guhitisha inyandiko kuri Shikama mbwira Twagiramungu Fawusitini ko amacakubiri ya Kiga-Nduga yo muri 1992 tutazongera kuyihanganira. Nandika ibi, nabitewe n’inyandiko zari zimaze iminsi zicicikana ku mbuga 2 arizo Ikaze iwacu na Veritas Info mbese bikaba byari bimaze no gufatira muri za forums zikoreshwa na bamwe mu bakuru b'amashyaka akorera mu buhungiro. Bijya gutangira wabonaga ari ihangana riri hagati ya Jenerali Byiringiro Victor uyobora  FDLR na Fawusitini Twagiramungu uyobora RDI na CPC. Byagaragaye ko nyuma iki kibazo hari abantu bashatse kugihindura icy’uturere, bikaba ari nabyo n’umuvandimwe Kanyamibwa avuga ati :” ntihakagire abitirira ibintu abantu aba n’aba”

Hari uwambaza ati ese hari inyandiko wigeze ubona Twagiramungu Fawusitini yandika?. Aha nasubiza ntanga urugero rwihuse mvuga ko ibintu byose bihita kuri Shikama byaba ibyiza n’ibibi byose bigomba kubazwa njyewe nyiri urubuga. Niyo mpamvu hariho nk’abantu bohereza inyandiko nabasaba nko kuzisana( mu Gatsiko babyita gukora ubugororangingo!) bakwanga nanjye sinzihitishe. N’abanyamakuru bacu ni uko bibagendekera, hari inyandiko zikererwa guhita kubera kiriya kibazo. Inyandiko zimaze iminsi zihita kuri Veritas Info zikaba zerekana aho Twagiramungu Fawusitini ahagaze ku bibazo ibi n’ibi byugarije Abanyarwanda nubwo atariwe uzishyira hanze bikorwa n’Abakomiseri b’ishyaka rye, ibi kandi ntashobora kubyigurutsa. Ngibyo ibyo nashingiyeho nibutsa Twagiramungu Fawusitini ko ibyabaye muri za 1990s aho amashyaka menshi yagiye ashyamiranya abaturuka mu majyaruguru n’abo hepfo, tukaba ubu twirengereye ingaruka mbi zabyo, tudashaka kongera kubyumva ukundi. 

Mu kiganiro Padiri Tomasi Nahimana yagiranye na Radiyo “Ijwi ry’Itahuka” muri 2012, umunyamakuru yamubajije icyo anenga Twagiramungu Fawusitini bakoranye igihe kinini akaba amutaye akishingira irye shyaka. Padiri Nahimana Tomasi yasubije ko Twagiramungu afite ikibazo cyo kumenya gushyira ibintu kuri gahunda. “ Ndashima rwose Twagiramungu Fawusitini kuko namwigiyeho byinshi, ariko afite ikibazo muri Organisation, ntazi koruganiza”. Ijambo organisation mu Kinyarwanda risobanuye byinshi: gutondeka ibintu neza, gushyira ibintu ku murongo cyangwa gahunda, gukorera ibintu ku gihe kandi neza,  gushyira abantu mu myanya y’akazi hakurikijwe ubushobozi bwabo, n’ibindi.

Aha hasi, murahasanga inyandiko 3 zinyuranye nagerageje kuvugaho uko mbishoboye, nkaba nsaba ko namwe abasomyi ba Shikama mwicukumburira ibiri muri izi nyandiko, mukambwira niba biriya padiri Nahimana Tomasi yavugaga yaribeshye dufashe kamwe muri buriya busobanuro bwo hejuru maze tukavuga ko organiser bivuga “gushyira abantu mu myanya y’akazi ukurikije ubushobozi bwabo”! Muri make dore uko mbona iki kibazo, abakomiseri ba Twagiramungu bamuhagarariye mu itangazamakuru:  bafite igitugu kiruta icyo ku mwicanyi Pawulo Kagame. Muraza gusanga ko batangiza inyandiko zabo ibitutsi,  bakaziherutsa ibitutsi! Baranatandukira bakanibasira n’inzirakarengane zitagize aho zihuriye n’ikibazo bavugaho! Bashinja abandi ubujiji no kurangwa no kudasoma, nyamara muraza gusanga barangwa no gusubiza inyandiko batasomye!!!. Nubwo bamwe byitwa ko bashinzwe itangazamakuru, birengagiza ko inyandiko ibeshyuza uyohereza aho uvuga ko bakwanditseho ibitari byo, iyo uyohereje ahandi, haba harimo itiku kandi werekana ko ibyo bakuvuzeho ari byo. Basomyi ba Shikama, namwe amaso nabahe!!

Inyandiko ya mbere:

" Yihinduye injiji n’umubeshyi kandi ari Dogiteri kubera urwango afitiye Twagiramungu Faustin!"/ Yanditswe na Ntakirutimana Faustin, Komiseri mu ishyaka rya Twagiramungu akaba akuriye komisiyo y’ibyerekeye amakuru agenewe rubanda  nkuko byemejwe n’inama y’iryo shyaka yo kuri 22/2/2015.

Dore uko uyu muvandimwe atangira inyandiko ye:

Uyu Nkusi Joseph ni umunyabwenge, akaba atuye ku mugabane w’u Burayi ndetse akaba azwiho n’igikorwa cyiza cy’akarusho cyo gushinga no gucunga urubuga rutangirwamo ibitekerezo n’amakuru Abanyarwanda benshi bakeneye ; ariko kubera urwango afitiye Twagiramungu ku mpamvu zitumvikana, byatumye yandika inkuru yo kumuharabika igaragaza ko ubwenge bwe yabwiyambuye akigira injiji n’umubeshyi kugera naho ananirwa kureba kuri interineti amakuru y’ukuri y’ibyo yandika kuri Twagiramungu 

Wakoze muvandimwe kungira umunyabwenge nubwo njye ntekereza ko nta munyabwenge ubaho ahubwo habaho injiji zikaba ari abatekereza ko bazi ubwenge kurusha abandi. Ndakwibutsa kandi ko Pawulo Kagame avuga ko injiji ari izize; iyo avuga gutyo aba avuga abize amashuri aruta ayo yize, ni ukuvuga abarangije ayisumbuye nkaba nkeka ko kugirango bakugire Komiseri mu ishyaka ugomba kuba ufite byibura ayisumbuye, bityo ukaba uri muri ka gatebo Pawulo Kagame ashyiramo injiji zize, ubwo rero uri uwacu!

Nshuti yanjye, ndagirango ngusabe gusenga Imana ushikamye kugirango ikurinde kwandura indwara y’umunyagitugu n’umwicanyi Pawulo Kagame, uwo mutavuga rumwe ntaba ari umwanzi ahubwo ashobora kuba n’inshuti y’amagara kurusha abirirwa bakuvuga ibigwi n’imyato utagira kugirango bagusoromeho amaramuko.Ese waba warasomye neza inyandiko yanjye y’ubushize ngo urebe niba hari icyo nabeshye muri ibi bikurikira mbere yo kuvuga ko nanga Twagiramungu Fawusitini?

-      Ugusezera kwanjye mu ishyaka Ishema nyuma y’ukwezi kumwe gusa dushinze iri shyaka na bagenzi banjye barindwi?

-   Kuba Twagiramungu Fawusitini ariwe munyapolitike Shikama yanditseho kenshi imushima ikanamushyira(wenyine)  mu nyandiko zidasanzwe kandi zikundwa na benshi cyane nk’Ibyahishuwe na Politiball?Ibi tukaba twarabikoraga tubitewe n’uko twabonaga afite ibitekerezo bizima bishakira abanyarwanda bose amahoro? Mu gihe rero yiyemeje guhanganira kuri interineti, nta cyatuma dukomeze kumufata nkuko mvuze hejuru.

-          Ese waba warasomye Fagisi y’Abanyamerika twifashishije twandika ukaba hari aho wabonye twarabeshye kugirango dukosore tunasabe imbabazi Twagiramungu Fawusitini?

-          Ubwawe uravuga ko utazi igituma nanga Twagiramungu Fawusitini! Ndumva bitari ngombwa kubivuga ariko nta kibi kirimo, birakwiye buri gihe gushima ibyiza ibibi tukabyamagana: nshimishijwe no kukumenyesha ko kuva muri 1984 kugeza ngiye muri Libya muri 1987 nasuye kenshi imwe mu miryango ikomoka ku ntwari y’ibihe byose Nyakubahwa Gerigori Kayibanda: Haba kwa Ndimbira wayoboraga CER akaba yari atuye hariya hejuru y’ahitwaga TSF munsi y’ibitaro bya Kigali, Twagiramungu Fawusitini wari utuye mu Kiyovu akaba yarayoboraga STIR( nubwo muvuga ko nta myanya y’ubuyobozi yari afite kwa Kinani!), Kayibanda Piyo wari Depite, Ruberanziza A., n’umukecuru ubyara iriya ntwari Kayibanda Gerigori. Aha hose ntaho nigeze mfatwa nabi, nkaba nzirikana urugwiro n’ubuntu nasanze muri iriya miryango yose. Ntaho nahera rero nanga Twagiramungu Fawusitini muvandimwe wanjye rwose uribeshya cyane.

Uku kwiyambura ubwenge kubera urwango nibyo byatumye mu mwaka w’1994 interahamwe zigishijwe n’abanyabwenge nka Nkusi zararimbuye igice kinini cy’Abanyarwanda ngo zibahora uko batekereza n'uko basa, kugeza naho zishe abasilikare ba Ex-FAR bari ku rugamba ngo ziri kwikiza umwanzi!

Muvandimwe, aha urahavuga amagambo akomeye ashobora kukunywesha amazi uramutse utari mu cyama cya Kagame! Waba ufite urutonde rw’aba banyabwenge batozaga Interahamwe na Gahunda z’izo nyigisho? Ubu se nturiho ugwa mu mutego wa FPR ivuga ko ibyabaye mu Rwanda byari byarateguwe, nizere ko warangije gutanga amakuru.

Gushyira urwango mu bantu bishobora kuzaba umwihariko w’abanyabwenge bamwe b’abanyarwanda bashaka kutwereka ibara ry’umukara bakatumena amatwi bashaka kutwemeza ko ari umweru !

Ahangaha ubusanyije n’ibyo wavuze hejuru byerekeranye n’ibyo urubuga Shikama rugeza kuri rubanda. Ndakumenyesha ko na Veritas ucishamo inyandiko zitukana nayo igashyiraho akayo ko kuntuka munsi y’ifoto yanjye, yandikiye Shikama idushima umurimo dukorera abanyarwanda. Iyo twamagana abantu bashaka kuzana inzangano zishingiye ku turere n’amoko, ngirango tuba dukora ibibusanyije n’ibyo uvuga.

Muri iyo nkuru ya Nkusi navuze haruguru aragira ati : «Twagiramungu nareke abimariye imyaka mu mashyamba bakomeze bibereho mu bugenge bwabo areke kubasonga nkuko yatereranye izindi mpunzi igihe zicwaga i Kibeho muri 1995, Seth Sendashonga agatabaza hakabura utabara, Bihwahwa Bizimungu akajya gushinyagura naho Twagiramungu na Kagame bariho binywera byeri i Kigali» ! Biratangaje kumva umuntu w’umunyabwenge nka Nkusi atinyuka kuvuga ko igihe inkotanyi zicaga impunzi mu nkambi zo ku Gikongoro Twagiramungu yarimo anywa byeri na Kagame i Kigali !

Nkuko wabisomye ku nyandiko nahitishije mu cyongereza usanga aha, ubwicanyi bwakorewe Abahutu I Kibeho, ntibwakozwe umunsi umwe gusa, bwatangiye kuri 18/4/1995 nyuma y’aho uwari Perefe atangarije ko basenya inkambi kuri 17/4/1995 kugeza kuri 24/ 4/1995 igihe abarokotse berekezaga I Butare n’amaguru.Ntushobora rero kumbwira ko muri kiriya gihe cyose Twagiramungu Fawusitini yari mu I Buruseli mu Bubiligi nkuko ushaka kunyereka kuri iriya link ko kuri 22/4/1995 umunsi APR(RDF) irasa ku mpunzi kuva kuri 18/4/1995 zararaga mu mbeho,nta mazi ,nta biryo , zibyigana nk’intama nkuko umwe mu bakozi b’ingabo za Australia wari uhari abivuga. Ikikwemeza y’uko Twagiramungu yari ahari yinywera byeri I Kigali na Kagame nkuko nabivuze ubushize, kuri 19/4/1995 niho Ministiri Seth Sendshonga yaje gutabaza  Bihwahwa Bizimungu, Pawulo Kagame, na Twagiramungu Fawusitini bakamuhumuriza bakamubwira ko ubwo bwicanyi buhagarara ariko ntibyabujije ko kuri 20/4/1995 hongera kuraswa izindi mpunzi zirenga 50 nkuko bariya banya Australia babivuga.

Ikindi ni uko twagiramungu yabwiye abanyamakuru ko abicanyi ba APR (RDF) bica impunzi zirenga 5,000 birwanagaho(reba kuri iyi videwo wampaye kuri link ku munota wa11.18/14.41) Ongera urebe iyo videwo iri hasi aha. Uravuga kandi ko ubwicanyi bw’I Kibeho ari bwo bwatumye Twagiramungu Fawusitini asezera, oya sibyo wongere urebe neza iyi videwo wampaye kuri link, Twagiramungu avugana n’umunyamakuru, aramagana ubwicanyi bukomeje gukorerwa abaturage mu cyaro nta hantu avuga Kibeho! Twagiramungu kandi ntabwo yasezeye kubera ikibazo cy’I Kibeho, reba neza amatariki: ubwicanyi bw'i Kibeho : 17/4/1995- 24/4/1995. Twagiramungu asezera kuri 28/8/1995.

Twagiramungu Fawusitini abwira abanyamakuru 

  ko APR(RDF) yirwanagaho  yica impunzi z'abahutu 

zirenga ibiumbi bitanu mu nkambi y'i Kibeho muri 1995

  Nkusi aragira ati : «Kurangwa n’igitugu no gusuzugura abo bafatanyije buri gihe » ! Uyu Nkusi ntabwo azi Twagiramungu uretse ijambo rimwe Padiri Thomas yamubwiye ry’uko atamurusha kumenya Twagiramungu, none uyu Nkusi ko ataba mu ishyaka RDI-Rwanda Rwiza riyoborwa na Faustin Twagiramungu, ntabe n’umuyoboke w’impuzamashyaka ya CPC, ahera he avuga ko Twagiramungu arangwa n’igitugu no gusuzugura abo bakorana ? Uwabwira Nkusi ngo « gesa ubwiyo, ubwino ntiburera»!  Nkusi yagombye gutegereza abari mu mashyaka ayoborwa na Twagiramungu akaba aribo bamuvuga uko bamuzi kuko bakorana nawe,akareka kwiterera mu mata nk’isazi no kubeshya rubanda! Mu gihe MDR yatoraga abayobozi bayo mu mwaka w’1992, iryo tora ryanyuze mu mucyo mu rwego rw’igihugu kandi njye ubwanjye nari ndirimo, nta hantu na hamwe igihugu cy’Amerika (USA) kigeze kigira uruhare mu matora ya MDR ku buryo Twagiramungu yari kujya kubasaba amajwi 

Uyu muvandimwe arongeye yikubise wa mutego wa rugondihene! Nkuko nabivuze ngitangira, ibyo navuze kuri Twagiramungu Fawusitini nashingiye kuri Fagisi y’Abanyamerika, nshyiramo n’ibyo aba bazungu bavugaga ko Twagiramungu yababwiye. Mu gihe utarahakana ko iriya Fagisi ari ukuri ikaba impimbano, nta mpamvu wanyita umubeshyi cyangwa injiji ibimenyetso bifatika bihari! Sinzi rero impamvu uriho umbwira ibyo muri RDI na CPC bya none kandi njye narashingiye ibyo nanditse ku byabaye muri MDR muri 1992 byerekana kandi ko ntaho bitaniye n’ibiriho biba ubu mu mashyaka ayoborwa na Twagiramungu Fawusitini; none se urashaka kumbwira ko nta bibazo Twagiramungu yagiranye na bamwe mu bagize CPC, urugero rutari kure rukaba ari FDLR? Muri RDI se ho ni shyashya! Wambwira icyo yapfuye na Me Evode U. kugeza igihe amusezeyeho akigira kwa Kagame Pawulo? Naho se Padiri Nahimana Tomasi? Uwo mucyo uvuga waranze ariya matora ntawo tubona mu itegurwa ryayo, niba warasomye neza inyandiko yanjye y’ubushize, uribuka uko Twagiramungu Fawusitini yabwiye Abanyamerika ukuntu yateganyaga kwigizayo Dr Murego Donati?

Abanyabwenge batekereza nka Nkusi baharabika Twagiramungu bamugereranya n’Imana! Mu kwezi kwa cumi 2014, Gen Byiringiro yavugiye kuri Radiyo BBC ari i Walikale (RDC) ko yitandukanyije n’umunyepolitiki witwa Twagiramungu Faustin, ko ndetse amwirukanye kubuyobozi bwa CPC ! Kugeza na nubu twategereje uko Byiringiro ayoboye CPC twarahebye! Twibajije ukuntu umuntu akora coup d’Etat mu ishyaka kandi ajijutse biratuyobera! Bitewe ni uko Byiringiro yashatse kuyobora CPC ari i WALIKALE ubu bikaba byaramuyobeye, niko abatekereza nkawe biyumvisha ko Twagiramungu ayobora FDLR ari mu Burayi bigakunda!

Niko se muvandimwe we, ko watubwiye ko muu mashyaka Twagiramungu Fwusitini  ayobora nta bibazo bibamo ukaba wivuguruje tubigenze gute! None se niba Twagiramungu yarirukanywe na jenerali Byiringiro muri CPC ni ubwo utavuga ko yanze kwemera ko yahiritswe ubu si gihamya ko iyi CPC iyoborwa na Fawusitini Twagiramungu ifite ibibazo!?

Uyu muvandimwe aravuga kandi ati: “ Kuba kandi yaragize ubutwari bwo kujya guhangana na Kagame mu matora yo muw’2003, atazi niba azapfa cyangwa niba azakira (à ses risques et périls), byatumye bamwe bavugaguzwa aho bari babunze mu magorofa y’i Burayi, ngo Rukokoma agiye guha agaciro itorwa rya Kagame (légitimer!). Kandi nyamara n’ubwo bamwibye amajwi, nibura Abanyarwanda bamenye ko FPR-Inkotanyi ntacyo ipfana na rubanda, naho amahanga aba abonye ikimenyetso simusiga cy’uko nta demokrasi iri mu Rwanda rwa Kagame-FPR.”

 Ibi biteye agahinda muby’ukuri! Uru Rwanda ruragana hehe koko? None se muvandimwe we, wasobanura ute ukuntu uvuga ngo ishyaka ryawe rirahanira kubohora rubanda abayobozi baryo nkawe bakoresha imvugo ipfobya abo bashaka kuyobora?Urabona koko izi nshinga ebyiri ukoresheje ku biremwa muntu nkawe bihesha agaciro ishyaka ubereye umwe mu bayobozi? Kuvugaguzwa no kubunda uzi icyo bivuga mu Kinyarwanda,urumva uburemere bw’izi nshinga wakoresheje? Ikindi nakongeraho, nubwo ntari ndi kumwe n’aba bantu uvuga bakoraga biriya, kuko nari nibereye muri Libya, wagirango hari aho bibeshye? None se Twagiramungu Fawusitini, u Rwanda yari yarahunze yari ayobewe ko ruyoborwa n’itekinika nta kuri kurubamo? Ese kuva muri 2003  ayo mahanga uvuga yabonye ko nta demokarasi iba mu Rwanda hari icyo yahinduye ku myumvire n’imikorere ya Pawulo Kagame kubera ko Twagiramungu Fawusitini yagiye guhangana nawe mu matora?

__________________________________________________________________________

Inyandiko ya kabiri

"Kubaho kwa FDLR niyo maramuko ya FPR n’Ubutegetsi bwa Paul Kagame !"/ Uyu mukomiseri we yabonye ko ibyo avuga bidafite ishingiro yirinda gutangaza amazina ye yiyita

Koloneli Rukara Damien nasho Kibungo Rwanda

Nawe ntatinzamo nka mugenzi we twabonye hejuru, aratangira angira umujenosideri kuko ngo nanga Twagiramungu Fawusitini, ngo naramuhushije muri 1994 nkaba ngifite umgambi mubisha wo kumukura ku isi !

Maze gusoma inyandiko ya Nkusi Yozefu   ku Ikaze, aho yifatira mu gahanga Nyakubahwa Faustin Twagiramungu  Prezida wa RDI Rwanda Rwiza na CPC. Aho amwiyama ko politique ye yamacakubili Kiga-Nduga itazongera kwihanganirwa. Bwana Yozefu Nkusi  ni ubwo n’ubundi wibeshye kuri politique ya Faustin Twagiramungu, biragaragara ko wa mugambi mubisha mwari mufite wo kumwica muri 1994 Imana igakinga akaboko  na n’uyu munsi ariwo mufite wo kurimbura Abacikacumu bose mufatanyije na FPR ya Paul Kagame!

Ndagirango mbwire uyu muvandimwe ko iyi nyandiko avuga itashyizwe kuri Ikaze iwacu nkuko yabyanditse, yaciye ku rubuga rwa Shikama abo mu Ikaze Iwacu bayikoreraho kopi nkuko tubikora iwabo cyangwa ku zindi mbuga. Birababaje rero kuba uvuga ngo twashatse kwica Twagiramungu Fawusitini muri 1994 kandi nari muri Libya! Aho ntabwo unyibeshyaho ukansanisha n’igice cy’abantu mumaze iminsi muharabika ku mbuga muvandimwe wanjye?

Muri make  ntawe utazi amahano yakozwe ni ngoma ya cyami kugeza aho bayihiritse muri Révolution ya 1959. Icyo gihe bamwe mubashyigikiye Ubwami bahunganye n’umwami  kuko mu mitwe yabo bari bafite ingengabitekerezo yo kurimbura ubwoko bw’abahutu. Nyuma ya cyami hagiyeho Repubulika iyobowe na Nyakubahwa G.Kayibanda wavukaga  mu NDUGA (abanyenduka). Akurwaho na J.Habyalimana wamugandaguye  akoze coup d’état; Habyalimana wakomokaga mu karere ka KIGA (abakiga).  Ikosa ririhe rero rya Twagiramungu mu gihe atari we watangije kurobanura ku butoni hitwaje uturere, ni uko se yatinyutse kubyamagana? Ingero ni nyinshi niba Nkusi yarazibagiwe yabaza umuturanyi we akabimwibutsa. Turwana na FPR ibyitso byinshi byari bigizwe n’abantu bakomoka muyandi maprefegitura naho Gisenyi, Ruhengeri na Byumba ngo bari bazima !....yewe no mugisoda byaranukaga.....Nyamara abagambanyi bari bakomeye kandi twari duhanganye ku rugamba bazi neza imbaraga zacu bari Abakiga :Rizinde, Kanyarengwe, Biseruka…hakiyongeraho abanyepolitiki b’abasivili barimo Bizimungu pasteur, Kajeguhakwa… imbere mu gihugu hari ba Nsekarije...none ubu ba Rucagu, Bosenibamwe, Habumuremyi, Rwarakabije, Gatsinzi Marcel

Urakoze muvandimwe kutwibutsa amateka atari meza igihugu cyacu cyaciyemo. Ndagirango nkwibutse ko iyi kudeta abasoda bakoreye Intwari y’ibihe byose Nyakubahwa Gerigori Kayibanda mperuka kuyamagana mu mezi ashize kuri BBC Gahuza mu kiganiro : “ Imvo n’imvano” aho nasobanuyemo uko iyi kudeta yateguwe, na Major Kanyamibwa akaza kutwunganira mu cyumweru cyakurikiyeho. Nibyo habayeho amakosa yo guhirika uriya mubyeyi n’aho yari adukuye byongeye kandi agafatwa nabi kugeza yitabye Imana. Ndakwibutsa ko Ikinani kitananiye Abanzi n’Abagambanyi kitakoze nka Kagame Pawulo kuko cyemeye ikosa ryabaye, kikemera ko imiryango y’ abanyepolitike ba Repubulika ya mbere bishwe nyuma y’iriya kudeta bahabwa indishyi y’akababaro; nta ndishyi yahwana n’amaraso y’umuvandimwe wishwe ariko kubyemera ni igikorwa cya kigabo kiganisha ku bwiyunge, kuba Ikinani kitaratoteje bene Kayibanda nkuko Kagame abikora ubu ku miryango y’abo amaze kwica, nabyo ntawabura kubigishimira.  Ibyo navuze kuri Twagiramungu niba wasomye neza inyandiko yanjye nabivuze mu rwego rw’amashyaka, ntaho nigeze mvuga ko yagambaniye igihugu dore ko ntari nari mu Rwanda.

               Ikindi ni uko imvugo zisa n’iyi yawe zituma nibaza ibi bikurikira:

-          Ese birakwiye ko abana b’abatutsi bazahora babazwa iby’abami b’abahutu bishwe n’ingoma z’Abanyiginya , ibinyita byabo( amabya n’imboro) bikambikwa ingoma zabo Kalinga n’izindi zari ziyigaragiye nka Kimugizi?

-          Ese birakwiye ko abana bo mu majyaruguru y’u Rwanda bazahora babazwa ibya kudeta yo muri 1973 yahiritse Kayibanda waturukaga mu majy’epfo y’igihugu ikanamuviramo urupfu?

-          Ese birakwiye ko Abana b’Abahutu bavutse n’abataravuka bazajya  basaba imbabazi Abatutsi n’aho baciye hose bakagendana ipfunwe n’ikimwaro nkuko Kagame Pawulo abivuga akaba yaranashyizeho na gahunda yabyo yihariye ya  Ndi umunyarwanda, bazira ko  ba se na ba sekuru babo bateye hejuru mu mpinduramatwara (Revolisiyo) yo muri 1959 bakabwira ingoma ya gihake yabapyinagazaga bati:”Dufite umubiri nk’uwanyu, burya iyo mudukubita ibiboko turababara, iyo duhinga mukahura amatungo yanyu mu mirima yacu biradusonzesha, iyo dusarura musahura bidutera inzara, cyangwa abana bacu nabo bakeneye kwiga gusoma no kwandika nk’abana b’Abatutsi”?

___________________________________________________________________

Inyandiko ya gatatu/

"Gukurikira Twagiramungu si ubuhumyi nkuko Abahutu benshi babitekereza."

 Yanditswe na Komiseri Umutoni solanje/ Komiseri ushinzwe Ubukangurambaga bw’impunzi n’itahuka ryazo 

Reka mbanze nshimire uyu mwene data ikinyabupfura afite mubyo avuga no kureba kure mubyo atekereza. Mu by’ukuri yasohoye iyi nyandiko ye ntarandika iyanjye turiho tujyaho impaka na bagenzi be aha hejuru, akaba yarasubizaga inyandiko yari ya Darius Sunray Murinzi,  yasotse ku IKAZE IWACU, iyo nyandiko ikaba ifite umutwe ugira uti : Umugambi wo guaca FDLR umutwe: Politiki na Dilpomatiea ntibivuga gutera amacumu mu mugongo jenerali Byiringiro.

Uyu muvandimwe afite aho ataniye na bagenzi be navuze hejuru, nkaba nkeka ko u Rwanda rushya rukeneye abantu bameze nkawe, dore zimwe mu ngero z’iri tandukaniro:

-      Ubwo bagenzi be bamaze iminsi ku rubuga  Veritas Info baterana amagambo na bamwe mu bashyigikiye FDLR, ndetse bagashyiramo rimwe na rimwe n’ibitutsi n’ipfobya nkuko mwabibonye hejuru, we aremeza ko politike yo kuri interinete ikemura ibibazo bike igatera byinshi.

-     Ikindi atandukaniyeho na bagenzi be, ni uko we yemera ko Twagiramungu Fawusitini yaba yaribeshye ku Nkotanyi zikamukoresha amakosa ariko akaba ataba intandaro yo kumushyira mu kato. Aragira ati:

“ Niba koko Twagiramungu ari ingambanyi nkuko ubivuga (bikaba biba no mu kanwa k’abahutu benshi), bikaba binaba inzitizi ku gikorwa cyose cyatuma abo bahutu bishyira hamwe ngo twikize ubutegetsi bwa Kagame n’agatsiko ke, ndagirango mbwire abahutu bose ngo : «Utaribeshya mu buzima bwe azahaguruke maze atere Twagiramungu ibuye rya mbere ». Twese ubugome n’uburiganya bw’inkotanyi twagiye tubuvumbura buhoro buhoro, tubumenya cyane muri iyi minsi aho bamwe mu nkotanyi bahungiye bakagenda batubwira utubanga twabo duke duke.Kuba rero Twagiramungu yaba yarabibeshyeho, njye simbibona nk’ikibazo cyamushyira mu kato, ngo kimuheze muri uru rugamba rukomeye, rutugoye twese rwo guhirika ubutegetsi bw’agatsiko k’inkotanyi”

Uyu muvandimwe hari aho abona ariko ibintu kimwe na bagenzi be twavuze hejuru: kuri bose, nta muntu wundi u Rwanda rufite ushobora kuruyobora nyuma ya Kagame atari Twagiramungu Fawusitini!!!Ese uyu mushiniki wanjye yaba yibagiwe ko hari abamaze kwitwa “ Kandida Perezida w’u Rwanda 2017!” Aba se niba bararangije kwiyemeza guhangana mu matora ( naramuka abaye) si uko biyumvamo ubushobozi bwo kuba basimbura Pawulo Kagame bagakosora ibyo yoretse. Nta washidikanya kandi ko ejobundi hazigaragaza n’abandi biyumvamo ubwo bushobozi. U Rwanda ngo rutuwe na miliyoni cumi n’ebyiri, none se ko Twagiramungu Fawusitini ageze mu za bukuru, niba nta muntu wayobora u Rwanda neza usibye we, nazaba adahari bizagenda gute? Dore uko uyu muvandimwe atekereza ukuntu Twagiramungu ari Ntasimburwa:

“Byari kuba byiza kandi  wowe Darius ushoboye kuturatira umuhutu (umunyepolitiki) w’intangarugero wemera kandi utaribeshye ku Nkotanyi uzadufasha kuva muri aka kandare twashyizwemo na Kagame, bityo Twagiramungu ukamushyira hasi!”

Ikindi kibabaje kuri uyu muvandimwe  Umutoni Solanje ni uko akangurira Abahutu gukora ikosa nk’iryo Abatutsi bamaze imyaka hafi 20 bakora rikaba ririho ribagaruka. Aremeza ko Abatutsi bazi icyo bashaka kuko abo yita Inararibonye za FPR nka Rutaremara zibona Pawulo Kagame yica zikicecekera zigakomeza kumuyoboka! Ibi bikaba bivuga ko n’Abahutu bagombye gukora gutyo kuwo bita Inararibonye yabo Twagiramungu Fawusitini! Ubu buryo bwo gutekereza nibwo bwashyize u Rwanda mu kaga kuva imyaka amagana. Aho kwamagana umutegetsi urangwa no kuba umukegesi aho kuba umuyobozi wa Rubanda, hagiye hibandwa kuri: “ umunyiginya wacu, umwega wacu, umututsi wacu, umuhutu wacu, umusajya wacu” none reba aho tugeze! Dore Umutoni uko abyumva:

“Ese ko Kagame yishe Karegeya akanabyigamba,  Nyamwasa agahunga kubera uwo Kagame, ariko ba Tito Rutaremera b’inararibonye za FPR bagakomeza bakamukurikira? Igisubizo nuko Abatutsi bazi icyo bashaka «Ubutegetsi » [peu importe le prix]. »

 Uyu muvandimwe yambwira niba ubu Abatutsi batengamaye kuko umututsi Pawulo Kagame ari ku butegetsi? Igisubizo ni oya kuko hari abatutsi batabarika amaze guca imitwe, abo yicishije, abo yatorongeje ndetse akanahiga n’abana n’abagore babo mu buhungiro. Muri Shikama rero iyi myumvire tukaba tubona itajyanye n’igihe tugezemo kandi idakwiye mu Rwanda rushya turota, aho Umuhutu, Umutwa n’Umututsi bazasangirira ku meza amwe, bagasabana amazi, bagashyingirana, buri wese akifuriza mugenzi impagarike n’ubugingo aho gupanga icyamucisha umutwe.

Nkaba nanzuye iyi nyandiko nisegura ku basomyi kuko yabaye ndende cyane,nkaboneraho kandi n’umwanya wo kubabwira ko ntazongera gusubiza inyandiko nka ziriya, hagiye kujyaho uburyo mwebwe abasomyi muzajya mugira  ijambo ku nyandiko nka ziriya ndetse munanenge n’izo ubwacu muri Shikama tuzaba twanditse, iyo niyo Demukarasi twifuriza abanyarwanda. Tuzakomeza kwandika twamagana uwo ariwe wese tubona afite gahunda zibangamiye inyungu z’u Rwanda turota, yaba Twagiramungu cyangwa Byiringiro, bagomba kumenya ko Abaturage aribo bazajya bihitiramo inzira bashaka kunyuramo abayobozi bakabaherekeza atari Abayobozi bazahitamo inzira Abaturage bakabaherekeza nkuko bimeze ubu ku ngoma y’umwicanyi Pawulo Kagame.

Nkusi Yozefu 

shikamaye.blogspot.no

Shikama Ku Kuri na Demukarasi(SKUD)