Isesengurampamvu na politiki: Ingendo y'abeza bashinjagira bashira niyo abanyarwanda twese nta n'umwe uvuyemo tugenda mu 2015 ariko tugomba gushinyiriza kuko kizira kwiyahura/ UDAHEMUKA Eric

Mu 1990 FPR igaba igitero ku butaka bw'u Rwanda abategetsi bariho icyo gihe batangajwe no kubona u Rwanda ruterwa kuko bumvaga bitashoboka. Mu 1993 uko intambara yagendaga ikara isatira Kigali hamwe n'ibinyoma bya FPR tutabashije mu by’ukuri gutahura muri icyo gihe, abanyarwanda bamwe batekereje ko FPR ifashe ubutegetsi bwabarutira ubwa MRND.

Mu 2005 icyo gihe Paul Kagame byagaragaraga ko akunzwe cyane. Mu nkiko gacaca kubera amahano abavuye i Bugande bakoreyemo bahima ABAHUTU kugera no kuyonka, abanyarwanda baketse ko FPR ari ingoma y'ABATUTSI igamije gutsikamira ABAHUTU bakazumirwa.

Amahano FPR yategetse ko akorwa mu nkiko gacaca yashyize inzigo hagati y'abahutu n'abatutsi ku buryo hakenewe GACANZIGO mu muryango nyarwanda

Muri izo nkiko gacaca abenshi bageretsweho ibyaha batakoze abandi bashinjwa ibinyoma imbona nkubone n'abaturanyi babo b'abatutsi ku itegeko rya FPR abaturage babireba baraceceka. Urugero rumwe nigeze kubaha n'uyu munsi ndarugarukaho kuko iyo uvuze ko urwanya ikinyoma ugomba no kucyerekana kugira ngo wereke abasomyi ko ibyo uvuga wabihagazeho.

Mu rubanza rwabereye kuri sitadi ya seminari nkuru ya Filozofiya i Kabgayi haregwaga umucamanza witwa Pasccal wigishaga mu ishuri rikuru Gatulika ya Kabgayi(ICK). Uyu Pascal ntibuka irindi zina rye ariko nkaba nari muri urwo rubanza nk'umuturage warukurikiranaga, yaregwaga na Mbaraga wari ukuuriye abinjira n'abasohoka muri Gitarama.

Mu kuburana Pascal yatsinze Mbaraga biboneka ko ashobora kugirwa umwere ni uko Mbaraga avuga ko yibutse ikindi cyaha yari yibagiwe avuga ko muri jenosidi mu 1994 Pascal yamukubise urushyi agahinduka ikiremba. Umuturage wari hafi aho(kuko gutanga ibitekerezo byari byemewe) yabajije inteko yaburanishaga impamvu mbaraga yavugaga ko yabaye ikiremba kandi nyuma yarashatse akabyara. Umuturage wabajije icyo kibazo nta wamenye irengero rye.

Ihunga rya Gen. Kayumba, Dr. Rudasingwa, Karegeya(+),... ryahinduye byinshi mu mitwe y'abanyarwanda bazi kwitegereza

Muri izi nkiko gacaca abahutu babonaga bibarangiriyeho. Ab'ikambere muri FPR batangiye guhunga no kuvuga Kagame ayica inka, abakurikirira ibintu hafi babonye ko FPR ishobora kuba noneho ari leta y'abagande idashaka abataraturutse i Bugande kandi ikarwanya abanyamakosa muri bo bahunga kuko baba bananiwe inshingano nk'uko Kagame yabivuze.

Siko bikimeze, ubu FPR ni agatsiko k'abantu wabarira ku ntoki kiyemeje kumvisha abatwa, abahutu n'abatutsi uhereye ruhande utarobanuye

Mu ntangiriro y'ingoma ya FPR akazi ka politiki kahabwaga abazi gucinya inkoro b'abahutu ariko iyi turufu na Kagame yarayirishaga cyane kuko byatumaga yereka abazungu ko ubutegetsi busaranganijwe neza. Nyuma inyanya iryoshye yahawe abatutsi. Nyuma imyanya yahawe abavuye i Bugande gusa none aho bigeze n'abo bavuye kwa KAGUTA Museveni barize baba benshi ku buryo basumba kure imyanya y'akazi ihari.

Ubu akazi karahabwa murumuna wa Jenerali nabwo bahahurira barenze umwe bikaba ikibazo. Umuhutu we kwirirwa yimarira udufaranga yari kuguramo isabune ngo arasaba akazi ni ukuruhira Nyanti kuko n'umututsi wavuye i Bugande ukennye atakwiyumya. Ibi nibyo bituma mvuga ko ubutegetsi bwa FPR busigaranywe n'abantu ushobora kubarira ku mitwe y'intoki. Ubwo simvuze mu itangwa ry'amasoko,...

Kubera intambara irimo guca ibintu bucece mu Rwanda hagati y’abanyiginya barangajwe imbere na Gen. Kayumba Nyamwasa na Maj. Dr. Rudasingwa bo muri RNC n’abega bari ku butegetsi kandi bafite byose brangajwe mbere na Perezida Paul Kagame ubu no kuba waravuye i Bugande kandi ukomeye ntibihagije kugira ngo uhabwe akazi ugomba kuba auri UMWEGA.

Ubutegetsi buteye butya n'abafite byose ntibafata agatotsi kuko MASLOW abashyira mu rubanza imbere ya ba nyakugorwa

Mu isomo rirebana n'ubukungu hari umugabo witwa MASLOW watanzemo umusanzu ukomeye cyane. Muri uwo musanzu isi izamwibukiraho ingoma ibihumbi yashushanije umutemeri werekana ibintu abantu bakenera mu buzima bwa buri munsi n'uko bigenda bikurikirana uhereye ku by'ibanze ukazasoreza ku byo umuntu adatunze atagira icyo aba kuko ari ibya’abanyamurengwe.

Nk'uko byakumvikana n'ubusanzwe bitabaye ngombwa kuminuza, icyo abantu bose bakenera ku ikubitiro ni UKURYA, KUNYWA no KWAMBARA hakiyongeraho kumesa(kuko utakwambara imyenda yuzuye ico), ubwo birumvikana bijyana no koga bisaba kugura isabune, kuba ufite amazi,... Ibi byose ndondoye hari benshi mu Rwanda batabibona uko bikwiye kandi babikeneye hakaba n’ababibona babanje kubivunikira cyane.

Ibi bigira ingaruka kuri ba bandi bacye cyane bo mu gatsiko bafite byose bikubiye ubukungu bw'igihugu kuko dufite umugani mu Kinyarwanda uvuga ko AKANWA KARYA NTIKAGUHE KAVUZA INDURU NTIWUMVE. Aba nabo rero bahorana ubwoba abanyapolitiki bagahora bikanga ko abo bacuze cyangwa abo bimye ku mugati bazababirandura umunsi umwe baahindukira baasaba abo bimye kandi amateka ku isi atwereka ko kenshi bikunze kubaho.

Ingendo y'abeza bashinjagira bashira niyo abanyarwanda twese tugenda muri 2015

Muri ibi bibazo byose ndondoye n’ibindi akangari ntavuze, nta munyarwanda n'umwe watinyuka kwihandagaza ngo avuge ko bitamugiraho ingaruka. Iyi nteruro INGENDO Y'ABEZA BASHINJAGIRA nayumvise bwa mbere mu ndirimbo ya Ben Kipeti Ngabo, nongera kuyumva mu ndirimbo ya Masabo Nyangezi ikaba ari imvugo iziguye igenura KWIYUMANGANYA NGO HATO BATAMENYA IBYAWE ARIKO UBA WARASHIZE.

Icya mbere umunyapolitiki ufite inkota mu biganza bye yongeramo ubugi ukopfoye akica, uvuze ikitagenda ati mu buroko agamije kugundira wa mugati. Icya kabiri gushinjagira dushira ubyitegereza neza mu isoko aho ibiciro bizamuka cyane abakene ntibabashe kwigondera ibihahwa nkenerwa mu buzima bwa buri munsi. Icya gatatu ni uko abari mu gihugu bateza ubukene bene wabo baba mu mahanga kuko basangira ibyo bahashye.

Icya kane ni ingaruka ziba ku bavandimwe b'abavuga ukuri bakamagana ikibi nk'uko Kagame yigeze kwivugira ati:"Abirirwa banenga FPR iyo mu mahanga, mujye mwibuka ko mwasize bene wanyu hano mu Rwanda". Ubwo icyo yashakaga kuvuga muracyumva. Niyo mpamvu navuze ko abanyarwanda twese uhereye kuri Kagame ukamanuka hasi ukagera ku mukene wa nyuma dushinjagira dushira turi ba babona ngenda, bucyanayandi, sinzibiramuka, ejo nzamera nte n’andi mazina nkayo!

Nyamara rero dukomeze dushinyirize ariko dushaka ibisubizo by'ibibazo byacu, duharanira kwimuka ikibi mu Rwanda ari nacyo gituma bamwe bikubira byose abandi bakiyicira isazi mu maso, twirinda kwiheba no gucika intege kuko byadutera kwiyahura kandi tuzirikane ko uwitonze akama ishashi(ndavuga inyana iri hafi kwima, ntabwo mvuga ishashi bapfunyikamo amandazi).

UDAHEMUKA Eric

shikamaye.blogspot.no/

Shikama ku Kuri na Demukarasi(SKUD)