Pageviews all the time

Kuwa 01 Nyakanga 1962 – Kuwa 01 Nyakanga 2014 : Isabukuru y’imyaka 52 y’Ubwigenge bw’u Rwanda. Kwikunda birenze urugero no gushaka kwikubira ibyiza by’igihugu nibyo byatumwe FPR Inkotanyi yonse ibere rya UNAR ihakana ubwigenge igihugu cyabonye ikagera n’aho igira umwihariko wo gukora ishyano ku isi ishwanyaguza ibirango bya Repubulika ku manywa y’ihangu(yavuguruwe 1/7/2014,13:39GMT)













Ubwigenge oyeeeee !!! Independance oyeeeeee !!! Uhuru oyeeeee !!! : Aya ni amagambo y’umuhezagiro yo kwishimira ko igihugu runaka kibonye ubwigenge. Hari ku italiki 01 Nyakanga 1962, ku mpeshyi amasaka yeze mu gihugu hose, nta nzara y’ibiryo ihari ariko imitima itari mu bitereko ku bana b’u Rwanda bitewe n’amacakubiri yari amaze gukwirakwizwa n’agatsiko gato cyane k’abari bakomeye ku mwami bashaka kumushuka ngo abahutu bakomeze kuba abaja ibwami.
                              
Kuri uwo munsi u Rwanda rwabonyeho ubwigenge nari ntaravuka ariko Sogokuru yari umusaza w’imvi wagiye gutora muri KAMARAMPAKA kandi na Data icyo gihe yari umusore w’intarumikwa. Abanditsi bamwe bemeza ko abanyarwanda baharaniye ubwigenge abandi bakavuga ko abanyarwanda batigeze babuharanira ahubwo babuhawe n’ababiligi ku mpuhwe gusa.


    Indirimbo yubahiriza ibendera ry'igihugu
Ibendera ry'u Rwanda ryazamuwe kuri 1/7/1962


Ibi bitekerezo bibiri ni nabyo ndi bushingireho inyandiko yanjye maze dusesengure turebe niba koko abanyarwanda baraharaniye ubwigenge ndetse tuze no kureba niba hari amazina azwi agaragara muri iyi nkundura cyangwa niba koko ababiligi barabuduhaye ku mpuhwe, ubwo mu yandi magambo ni ukuvuga ko babuduhaye tutabukwiye.

Kamarampaka yo ku italiki 25 Nzeri 1961
Orukesitiri Impala yigeze kuririmba iti: “1959 itanu irashize, 1961 itumara impaka, abari bafite ipfunwe barumirwa!” Iyi mvugo nta mwene gihugu n’umwe ipfobya kuko abazungu bayoboye uwo muhango w’amatora na Demukarasi wari ugamije guhitamo ikigomba gukorwa, kwemerwa no gukurikizwa na buri wese.

Muri ayo matora abaturage nta n’umwe uhejwe (abahutu, abatutsi n’abatwa) buri wese yagombaga gutora ko yemera cyangwa ahisemo Repubulika cyangwa ko ahisemo ubwami. Uyu mwitozo wa demukarasi urahita usubiza cya kibazo nibazaga mu gutangira iyi nyandiko bikaba rero byumvikana neza ko abanyarwanda baharaniye ubwigenge batabuhawe nk’abagiriwe impuhwe kuko batoye bakabwemera ku bwiganze burunduye.

Imyanzuro nyuma y’ibarura ry’amajwi yerekanye ko abenshi mu banyarwanda bahisemo ubwigenge basezerera ingoma ya gihake kandi kugira ngo hano nisobanure neza, ntabwo rubanda nyamwinshi yirukanye ubwami twayisanisha n’abahutu gusa bivugwa ko aribo benshi mu Rwanda kuko harimo n’abatutsi ndetse bari ibikomerezwa bahisemo gusezerera ubwami bagashyigikira Repubulika(amazina turayafite).

Umwami Kigeli V Ndahindurwa mu kibazo kugeza magingo aya
Muri iyi minsi mu nyandiko nyinshi zirirwa zicicikana mu bitangazamakuru binyuranye ku isi yose bivuga k’u Rwanda hagarukamo cyane indagu za Magayane na Nyirabiyoro ariko bagatsindagira cyane ko Rukara rw’igisage ruvuga isi igatigita azagaruka mu Rwanda ingoma ya Kagame imaze guhirima igahinduka amateka.
Ibyo kuba Kigeli azagaruka mu Rwanda nk’umunyamakuru w’umwuga ntacyo bintwaye kuko nawe ari umunyarwanda ufite umugabane ku byiza by’igihugu cye ariko na mbere yo kuvuga ko azagaruka reka ahubwo tubanze tunibaze uko yagiye. Yagiye ate? Ko abaturage bari bamaze gusezerera ubwami kuki we atemeye kuyoboka inzira ya Repubulika? Ese yari wenyine? Ese yirukanywe na nde?
Ndahindurwa Yohani Batisita wabaye umwami wa nyuma w'u Rwanda
Kurya abanyamakuru tuba tuzi kwandarika amatwi kandi tukumva byinshi kuko twigerera ibwami, umunsi umwe umuntu wegereye Kagame cyane kandi w’inshuti ye yamubajije impamvu FPR yibarutswe na UNAR yatashye ntitahane n’Umwami w’u Rwanda KIGELI V Ndahindurwa. Iki kibazo abanyarwanda benshi n’inshuti z’u Rwanda zirukunda zikarwifuriza ibyiza barakibaza.

Kagame yasubije uwo wari umubajije ko atacyuye Kigeli V Ndahindurwa kuko muri 1959 yakoze ikosa rya politiki. Uwo muntu yakomeje kubaza Kagame ikosa Kigeli yakoze, Kagame amusubiza nta n’isoni ko ikosa yakoze ari uko yemeye ko abahutu bigarurira ubutegetsi bagashyiraho Repubulika kandi ko ahubwo atagombaga kubyemera ahubwo yagombaga kurwana hakaba inkundura bitewe n’uko yari afite abayoboke ubwami bukagumaho.

Iyi mvugo ya Kagame yuzuyemo kwishongora no gucyocyora abaharaniye ineza y’abanyarwanda bose niyo shingiro ryo gukuraho ibirango bya Repubulika. Iyi Repubulika kandi yaharaniwe n’abasore b’intwari barimo MAKUZA Anastase, MBONYUMUTWA Dominiko, KAYIBANDA Gerigori n’abandi ku buryo Kagame yabishaka atabishaka badateze gusibangana mu mateka y’u Rwanda.
Uhereye iburyo  ba Nyakubahwa :Perezida Kayibanda G.,  Mbonyumutwa D. na Makuza A.
Nigeze kumirwa numvise Kagame utagira isoni avugiye kuri Sitadi amahoro i Remera ko u Rwanda nta bwigenge rwigeze rubona. None se ubu ni ingoma ya cyami??? Kagame ubwe mu ma nama akomeye  mu ngendo yirirwa akora apfusha amafaranga y’u Rwanda ubusa bamuhamagara Perezida wa Repubulika y’u Rwanda kandi akitaba akajya kuvuga ijambo cyangwa gutanga ikiganiro.

Aya mayeri ya Kagame yo gusuzugura ibyo yemera mu ibanga ryo guheza irari rye no gutesha agaciro abenegihugu no kujijisha amahanga aherutse kuyinjizamo na munywanyi we wa nyirarureshwa Lt. Gen MUSEVENI nawe wavugiye kuri stadi amahoro i Remera ku italiki 07 Mata 2014 ijambo ry’urukozasoni ko nta bwigenge u Rwanda rwabonye.

Nta gushidikanya ko ibi bintu MUSEVENI yategetswe na Kagame kubivuga kuko Museveni atari aziranye na Kayibanda cyangwa Mbonyumutwa kandi niyo yanabamenya ntakwiye kwivanga mu bibazo by’u Rwanda nk’aho Uganda ifite bicyeya byo gucyemurwa.

Hamwe n’ibi bisobanuro rero, abatutsi bahunze muri 1959 bahunze kubera ko bari banze ibyemezo byavuye muri Kamarampaka ntabwo bahunze kuko batwikirwaga n’abahutu amateka agomba gusobanuka ntibakirirwe bajijisha abantu. Ibi kandi binemezwa n’umwami Kigeli ubwe aho yivugiye ko ntacyo apfa n’abahutu kandi ko atirukanywe n’abanyarwanda ko ahubwo yirukanywe n’abazungu akaba akiri umwami w’abanyarwanda bose.

Umucurabwenge Dr Tito RUTAREMARA ku isonga ry’ibibazo u Rwanda rurimo muri iyi minsi
Abantu benshi mu Rwanda, niba atari bose, bajya bishuka ko ikibazo u Rwanda rufite muri iyi minsi ari Kagame wenyine mbese ko avuye ku butegetsi byanaba ngombwa (…) u Rwanda rushobora kugira amahoro. Ibi rero sibyo kuko Kagame ni umwubahiriza ushyira mu bikorwa ibyatekerejwe kandi bikemezwa n’ubwonko bwa FPR ariwe Dr RUTAREMARA Tito.
Tito Rutaremara umucurabwenge wa UNAR na FPR
Tito Rutaremara umwe mu ba UNAR bake bakiriho niwe washyigikiye bikomeye igitekerezo cyo guhindura ibirango bya Repubulika no gushyiraho ibigoreka amateka y’u Rwanda ibi bikajyana no guhindura umunsi w’ibyishimo rusange ku bene gihugu nk’aho ahari umunsi w’iya 01 Nyakanga, Kagame na Tito bawuvunjiye muri taliki 04 Nyakanga ngo yo kwibohora.

Uku kwimakaza amataliki y’inzaduka kwajyanye no gutinyuka guhindura ibirango bya Repubulika birimo ibendera, ikirangantego n’indirimbo yubahiriza igihugu. Ibendera ry’u Rwanda ryari rifite amabara atatu: Umutuku, umuhondo n’icyatsi kibisi kadi koko ibisobanuro by’ayo mabara byari bihuje n’ukuri kw’ibyabaye.

Ikirangantego cya Repubukika cyatowe na Kagame ndagira ngo mbwire abasomyi ba SHIKAMA ko nta kintu na kimwe kirusha icyo ku itangazwa rya Repubulika kuko icya mbere cyarimo icumu rivuga ubutwari n’uruhabuzo (umuhoro wa Kinyarwanda) uvuga ko ari igikoresho gakondo twakoreshaga mu kongera umusaruro mu gihe igishya kirimo ishaka.

Kandi iryo shaka nyine niryo wa muhoro wa Kinyarwanda navugaga ku nteruro ibanza usarura maze abana b’u Rwanda bagatunga bagatunganirwa. Indirimbo yubahiriza igihugu yo kuri Repubulika yitwaga RWANDA RWACU. Mu bitero bine byari biyigize twagira icyo tubibutsamo :

Rwanda rwacu Rwanda gihugu cyambyaye ndakuratana ishyaka n’ubutwari iyo nibutse ibigwi wagize kugeza ubu nshimira abarwanashyaka bazanye repubulika idahinyuka independence twatsindiye twese hamwe tuyishyigikire nimuhaguruke turubumbatire mu mahoro n’ubumwe.

Nimucyo dusingize ibendera ryacu harakabaho na Perezida wacu harakabaho abaturage b’iki gihugu….. Impundu nizivuge mu Rwanda hose Demukarasi yakuye ubuhake, ubukolonize bwagiye nk’ifuni iheze, gatutsi, gatwa na gahutu namwe  banyarwanda bandi mwabyiyemeje…………..


Kwishyira ukizana, dufatanyiriza amajyambere
Uko iyi ndirimbo yumvikana n’uko najyaga nirirwa nyiririmba niga mu mashuri abanza turi muri animasiyo, ndabona nta vangura ririmo iryo ariryo ryose ku buryo bitari ngombwa ko isimbuzwa RWANDA NZIZA idashinga kandi idafite icyo irusha iyi yo hejuru. Iki cyemezo cy’urukozasoni kikaba ari umwihariko k’u Rwanda kuko mu bihugu byose byo kuri iyi si ni FPR yonyine yatinyutse guhindura ibirango bya Repubulika.
Mu gusoza iyi nkuru turagira ngo twifatanye n’abanyarwanda bose bashyira mu gaciro mu kwizihiza isabukuru ngarukamwaka y’imyaka 52 u Rwanda rubonye ubwigenge. Kagame uvuga ko atabwemera sinzi icyo yemera kuko nk’uko nabivuze ni Perezida wa Repubulika y’u Rwanda keretse niba ari umwami w’u Rwanda.

Perezida Kayibanda G. na Jenerali Majoro Habyarimana J.

Abapfukiranwe namwe mukaba mwumva ko ibyo FPR yirirwa ibabeshya byerekeranye n’amateka y’u Rwanda bayagoreka, numukanguke musome ibitabo byanditswe n’abahanga ku Rwanda birahari ku bwinshi kandi mwijukire kujya musoma kuri uru rubuga rwacu SHIKAMA kuko twatangiye kubandikira amateka y’u Rwanda.

Ntitwasoza kandi tutavuze ko ibi byose FPR yabikoze igamije kongera guhindura abanyarwanda abaja nk’uko ba sogokuru birirwaga bahetse umwami intugu zigashya banamwururutsa bagakubitwa ibiboko, birirwa bapfukamirije no kububakamo icyoba n’igihunga aho usanga umuntu afite ubutware bw’icyitiriro ariko nta bubasha bigendana afite. Birababaje dukwiye kongera kubiganiraho turi hamwe hakarebwa igikwiye.  

BAZIGUKETA F.
Umuyobozi mukuru wungirije wa SHIKAMA
shikamaye.blogspot.no
Shikama ku Kuri na Demukarasi(SKUD)

No comments:

Post a Comment

Muvandimwe, nshuti ya SHIKAMA, turagushimira cyane umuganda utanga wo kubaka URWANDA rushya ubinyujije mu bitekerezo byawe( Komanteri). Kugirango turwanye urukungu rw'Agatsiko ni ngombwa ko buri komanteri ibanza gusuzumwa. Yohereze, irahita ijya ku rubuga mu minota mike niba idatandukira( kuvuga ibitajyanye n'inyandiko), itukana, cyangwa yuzuyemo uburere buke.

Wipfusha komanteri yawe ubusa ukoresha "ANONYMOUS", himba izina urikomeze kuko hari ibihembo mu Kuboza 2016 ku bantu 3 bazaba babaye indashyikirwa mu gutanga ibitekerezo. Dukomeje kubashimira ubwitange n'umurava muhorana. IMANA Y'I RWANDA ihorane namwe iminsi yose.

Dg NKUSI Yozefu
www.shikamaye.blogspot.com
Uharanire ko Ukuri gusimbura ikinyoma.
Email: mahoriwacu@gmail.com; tel: +4745564355