Ibyahishuwe bya cyenda: menya ibyategetswe Kagame na FDLR mu nama y’iminsi 3 yahuzaga LONI, Afrika Yiyunze(AU), SADC , imiryango mpuzamahanga, n’ibihugu bifite ingabo muri RDCongo; yabaye kuva ku itariki ya 2 kugeza kuya 5 Nyakanga 2014. Ese ibyategetswe aba bombi ntibyaba bifitanye isano n'inkongi z'imiriro zibasiye u Rwanda?(igice cya kabiri)/ NKUSI Yozefu

Mu gice cya mbere cy'iyi nyandiko, twabagejejeho ibyo amahanga yategetse FDLR na Kagame Paul gukora kugirango amahoro asakare mu Rwanda no mu karere. Muri iki gice cya kabiri turavuga ku bishoboka-ndongozi bidufasha kwemeza cyangwa  guhakana niba imyanzuro y'iriya nama ifitanye isano n'imiriro yibasiye u Rwanda. kanda aha usome hano igice cya mbere cy'iyi nyandiko

Igishoboka-ndongozi( soma igishoboka-ndongoozi) cya mbere: Imiriro iraterwa n'ikibazo cy'amashanyarazi.

Urubuga rwanyu Shikama  rwahitishije inyandiko zinyuranye zibereka ko ibyo Agatsiko kemeza ko imiriro imaze iminsi yibasiye u Rwanda ituruka ku kibazo cy'amashanyarazi ari ibinyoma. Ntibisaba kuba warize kaminuza kugirango wemeze ushikamye ko iyi miriro ari igikorwa kigayitse cy'ubugizi bwa nabi bw'Agatsiko k'iterabwoba runaka.

Musa Fazil Harerimana

Ibi kandi na minisitiri Musa Fazili ushinzwe umutekano wa Kagame, yarabyiyemereye ku buryo buziguye ubwo aheruka kugirana ikiganiro n'abanyamakuru ubwo yagiraga ati: " birababaje kubona abanzi b'igihugu(ndlr: FDLR na RNC) biyitirira impanuka ziriho ziterwa n'imiriro, kandi niyo baba aribo ntacyo bizabagezaho kuko n'ibindi bagerageje byabapfubanye" Musa yakomeje yivuguruza kubyo avuze hejuru yerekana ko hari imiriro yigeze kuba ikozwe n'abantu basanzwe batari abanzi:" Mu miriro yigeze kwibasira ishuri ryisumbuye rya Byimana, byagaragaye ko ari abanyeshuri babikoraga"

Gihamya yuko iyi miriro atari impanuka y'amashanyarazi iragaragara neza muri iyi mvugo ya Musa muri iyi mvugo y'amaganya;  aremeza ko ababikora ntacyo bizabagezaho nkuko n'ibindi bakoze mbere ntacyo byatanze. Ibi rero bikaba byemeza ko Musa azi ko biriya bintu hari ababikora bafite umugambi wo guhungabanya inyungu z'agatsiko. Ibyerekeye bariya banyeshuri avuga, Shikama yigeze kubagezaho inyandiko y'ukuntu abana b'abasirikare bakuru batabonye imyanya muri Green Hill College yashinzwe na Muka Kagame na muka Kayumba Nyamwasa abagabo babo bakimara kubohoza u Rwanda, boherejwe kwiga mu Byimana. Base babagira inama zo gutwika iryo shuri kugirango Agatsiko kazabohereze muri USA kwigayo aho aba Kagame biga ubu. Iyi ikaba ari iyindi gihamya ko Musa ashobora kuba akeka ko abatwika bashobora kuba bari mu Gatsiko kubera ikigamijwe runaka.Ahangaha umuntu yakeka nk’agatsiko k’abasirikare baba batishimiye ukuntu Kagame ategeka igihugu.

Izindi gihamya z'uko iyi miriro atari impanuka ni amasaha yagiye iberaho; nta n'umwe wigeze uba mu ijoro, bikaba bigaragara ko ababikora ari abashaka  gutanga ubutumwa runaka ariko bakaba bazi ko babikoze ninjoro hagapfa abantu benshi, mu gihe bafashwe bashobora kuzahanwa bikomeye. Niba mwibuka neza, n'iriya miriro yo mu ishuri rya Byimana, yabaga abanyeshuri batari aho iri bubere, bikaba bisa n'ibyo hejuru!

Igishoboka- ndongozi cya Kabiri: Imiriro yaba ikorwa n'abo Agatsiko kita abanzi ?

Iyi miriro ikimara  Kubura muri uyu mwaka, ibinyamakuru binyuranye bikorera FPR n'Agatsiko byahise bitangaza ko biriho bikorwa na FDLR na RNC. Muribyo twavuga rutwitsi Kanguka nshya RUSHYASHYA, Chimpreports yo muri Uganda, na East African. Murabaza Shikama muti ese kuki Igihe.com yo itarimo? FPR ifite politike itoroshye, impamvu  ni uko niba koko ibi biriho bikorwa n'abo bita abanzi, kubicisha mu Gihe gisomwa n'abanyarwanda benshi ba giseseka, byatuma abaturage bata icyizere  bari bafitiye Leta ku byerekeranye n'umutekano wabo bigatuma bumva ko Leta yabo igeze aharindimuka.

Dr Rudasingwa Theogene

 Ndetse  bamwe bagatangira gushaka uko bakwisunga ikipe iriho itsinda nkuko biherutse kugaragara mu ntara y'Amajyaruguru aho abategetsi benshi bashinjwa gufatanya na FDLR, umwe Kagame akaba yarategetse ko araswa ku manywa y'ihangu. Guha rero ikiraka ibinyamakuru bya FPR bikorera mu mahanga bigasomwa cyane n’abanyamahanga ndetse binitwa ko ntaho bihuriye n’ubutegetsi buri mu Rwanda,  ni ukugirango batangire bumvikanishe ko abo amahanga ashaka ko bagirana ibiganiro ari ba Rutwitsi, abicanyi ntetse bagashyiraho n'akarusho ko kubita abajenosideri ngo bibutse ibyabaye muri 1994.

Ariko se FDLR ifite inyungu mu gutwika? 

Muri iki gihe FDLR ihagaze neza mu rwego rwa politike mpuzamahanga dore ko mu rwego rwa gisirikare rwo yari isanzwe ari NTAGANZWA; nta nyungu ifite mu kwangiza ibikorwa remezo n'imitungo y'abantu izakenera ejo imaze kugera ku butegetsi binyuze mu nzira z'ibiganiro cyangwa iminwa y'imbunda. Ibi kandi bikaba bigaragarira buri munyarwanda ko uyu mutwe w'inyeshyamba ushaka amahoro ari mu mvugo yabo yatangaje kandi igashimisha abanyarwanda b'amoko yose( reba ikiganiro Col. Byiringiro yagiranye n' Ijwi ry'itahuka: ibibazo yabajijwe n'abaturage n'uko banyuzwe n'ibisubizo bye, kandi bagashima ukwihangana bagize mu bibazo byose batewe n'ingoma ya FPR), no mu ngiro igihe yemera gushyira intwaro hasi ikayoboka inzira y'amahoro n'ibiganiro kandi ikemera gufatanya n'andi mashyaka y'abanyarwanda arwanya ubutegetsi bw'Agatsiko.

None se RNC yo ifite inyungu mu gutwika?

Ari Kagame, RNC cyangwa undi wese, ntawe ufite inyungu mu gutwika ibikorwa remezo n'inganda bigize ubukungu bw'igihugu ejo azakenera ageze ku butegetsi aharanira cyangwa ashaka kugumaho. Ibi nibyo Perezida Habyarimana yavugaga kuri Radiyo RFI ku itariki ya 2/10/1990 ati: "Abo biyita impunzi zitahutse baza barasa imbere yabo bica abo basanze basenya ibikorwa remezo ni bantu bwoko ki?" ; ibyo yavugaga turareba icyo byabyaye muri 2014. Ariko byaragaragaye ko FPR n'abo yareze bose batatinya gukoresha uburyo bwa Makiyaveli ngo bigerere ku butegetsi cyangwa babugumeho.

Dore ingingo umuntu yashingiraho akeka( aha turakoresha inshinga gukeka, si ukwemeza kuko turi mu bishoboka-ndongozi) ko RNC ishobora kuba ifite uruhare mu miriro:

Ukurikiranye neza urubanza rwa Lt Yowel Mutabazi, usanga RNC yaramaze gushinga imizi mu Rwanda imbere kugeza aho igera no mu banyeshuri ba kaminuza n'ayisumbuye. Ibi ikaba ibikora bisa no gutanguranwa n'ibiganiro by'amahoro bishobora kuba hagati ya FDLR na FPR, RNC yaburamo ijambo kandi ubutegetsi bwajyaho itarimo bushobora guhita bushyikiriza bamwe mu bayobozi bayo inkiko z'u Rwanda na Mpuzamahanga.

Niyo mpamvu bashobora gukoresha inzira bazi neza zagiye zikoreshwa aho bagiye banyura haba muri Uganda  cyangwa  Mozambike ngo ushaka kugera ku butegetsi abugereho byihuse..

Inyandiko ya Dr Theogene Rudasingwa aheruka gucisha ku mbuga nyuma y'uko Kagame ashyiraho guverinema nshya, wabonaga yuzuyemo kunnyega Kagame ko atagombaga guhindura guverinema kandi imiriro imwugarije ku buryo ishobora no kuba intandaro yo guhirima kw'ingoma ye. Muri iyi nyandiko ntabwo Dr Rudasingwa ashinja ingoma ya Kagame kugira uruhare muriyo nkuko RNC abereye umuyobozi ihora ibigenza iyo gerenade ziturutse mu Rwanda aho bahita bazegeka kuri Kagame na FPR(bikaba bigoye guhakana cyangwa kwemeza ko ari FPR iba ibikora koko). Ahubwo Dr Rudasingwa arakomeza ashushanya uko Leta nshya igiye kujyaho vuba ihuriweho n'abanyarwanda bose izaba imeze n'imigabo n'imigambi zayo nkaho yarangije guhirika Kagame. Ahandi umuntu yashakira akaboko ka RNC muri iyi miriro ni mu manza zimaze iminsi ziba mu Rwanda nkuko tubibona hasi aha.

Kizito mu kwemera ibyaha bye mu bisobanuro atanga avugamo cyane imigambi ya RNC yo kugera ku butegetsi.  Biragaragara ko RNC ishaka gufata ubutegetsi ku kiguzi icyo aricyo cyose harimo n'intambara, ndetse no kwica Kagame nkuko Kizito Mihigo abivuga. Ikindi kigaragara ni uko wumvise ubuhamya bwa Kizito Mihigo, RNC niyo ishaka kugena politiki u Rwanda rugomba kugenderaho muri ejo  hazaza harwo. Abantu bo muri RNC ngo  bemezaga Kizito ko intambara yaba yarangiye mu mezi atanu gusa bazi ibitwaro Kagame arunze n'abicanyi afite mu gihe iya Kinani barwanaga nayo yari yifitiye ingabo zitarenze 2000, nta ntwaro barwanye nayo imyaka hafi ine yarabaniye kugeza ubwo batekereje kuri Ruhekura. Muri iki gihe gito rero gutya ni uko n'uburyo bukarishye busa n'iriya ruhekura nk'imiriro nabyo bashobora kubyifashisha, bakaba bazi ko byashegesha Kagame nta maraso meshi amenetse, kandi nibyo koko.

Kagame rero n'Agatsiko bakaba bazi ibiriho biba kuko ibi byose nabo bagiye babikora ahandi kandi ingaruka bazi uko zagiye ziba. Niko Kubwira Musa Fazil, umuhutu ugenda nk'ukandagira ku magi nkuko Dr Rudasingwa abona abahutu bari mu ngoma ya Kagame, ngo atangaze ko imiriro ari agisida ( Gisita) yibasiye abanyarwanda atari igikorwa cy'umwanzi ariko akabivuga nabi yivuguruza ku ngero yatangaga abishaka cyangwa ururimi runyereye nkuko twabibonye hejru. Aha Agatsiko kakaba gashaka kwereka abaturage n'abashoramari ko umutekano ari wose, nta mwanzi wahangara u Rwanda rwa Paul Kagame, intare batinya!

Igishoboka-ndongozi cya Gatatu: ingoma ya FPR yaba ariyo iriho itwika ngo iburizemo imyanzuro yafashwe na ya nama twavuze hejuru ku kibazo cya FDLR.

Nta ntwaro Kagame atakoresheje ngo asenye umutwe w'inyeshyamba za FDLR zirinze umutekano w'impunzi zarokotse ikizitwa jenoside yakorewe abahutu muri RDCongo. Hakoreshejwe Intwaro mu ntambara ya mbere n'iya kabiri ya RDCongo, ubugambanyi: Kimya ya I na II, umoja wetu, RDF gufata abagore ku ngufu muri RDCongo bakicwa rubozo bagahita babishyira mu itangazamakuru bavuga ko ari FDLR yabikoze, gushyiraho imitwe y'inyeshyamba itabarika: Mai Mai Mutomboki, Cheka, M23,.. n’indi ntarondoye,  yose igamije gutsemba FDLR n'impunzi z'abahutu ziri mu mashyamba ya RDCongo, Kugambanira FDLR muri Loni biciye ku mwanya u Rwanda rufitemo w'imyaka 2 mu kanama kayo gashinzwe umutekano ku isi, gusebya FDLR imbere n'inyuma y'u Rwanda n'ibindi bikorwa bigayitse bya FPR bigamijje kwanga kugirana ibiganiro na FDLR ngo amahoro atahe mu Rwanda.

                                                                       ibirango bya FDLR

Igishimishije rero, ni uko muri izi nzira mbisha FPR yagiye ikoresha ngo itsinsure FDLR(Rwara rubundiye mu mashyamba nk’uko ubuhanuzi bwa Magayane bwita uyu mutwe w’inyeshyamba) ibone uko igira abahutu bo mu Rwanda imbere abaja n'abagaragu ubuziraherezo, amahanga yamaze kuzivumbura zose, amenya ko ububi bwa FPR itegeka u Rwanda iburusha abo yahinduye amashitani atagomba kuba ku isi ya Rurema. Niyo mpamvu, bahise bategeka Kagame na FPR gufata abo muri FDLR nk'abantu kandi b'abanyarwanda bagafatanya gukora igisirikare cy'igihugu, abatari abasoda akabasubiza mu byabo.

Dusanishe imyanzuro y’inama n’imiriro imaze iminsi mu Rwanda

Abataratinye gutega amabombe muri 1990 i Kigali, gutera gerenade abo batumizaga mu nama muri Byumba muri 1990, guhanura indege y'umuntu uvuye gushaka amahoro bazi ibibi bishobora gukurikiraho, kohereza abicanyi kuri za bariyeri, ntibatinya no kwifashisha inkongi n'andi mabi yose ashobora kuzadutungura mu minsi iri imbere, bagamije kuburizamo biriya byemezo by'umuryango mpuzamahanga. Muti none se byashoboka bite ko FPR yayiburizamo yitwaje inkongi?

 FPR yifitiye ikibazo cy'amafranga nkuko Shikama itahwemye kubibagezaho. Niyo mpamvu rero  ishobora kubikora kugirango yereke amahanga yuko ibyo asaba bikeneye amafranga atubutse kandi kubera imiriro yabaye hirya no hino mu gihugu, iriho ishaka uko yasana ibyangijwe n'iyo miriro, bityo ikaba nta bushobozi ifite bwo kuzuza inshingano yahawe n'ayo mahanga! Muri bwa buriganya rero, amahanga ashobora gusuka amafranga mu Rwanda bakayagira nkuko bagize aya BNR na EWSA( icyahoze ari Electrogaz) aho amamiliyari atabarika yaburiwe irengero kandi ntawe ukopfora.Mu bucakura FPR isanganywe, ishobora guhita ibwira amahanga kwigizayo itariki ntarengwa yo gushyira ibyo yategetswe mu bikorwa, yitwaje ko igisana ibyangijwe n'umuriro, naho byahe byo kajya!

Kugirango Kagame abereke ko rwose ko ibyo bamusabye ashaka kubishyira mu ngiro ariko ari ubushobozi buke, yababwira ko hari ingabo za FPR zirenga 800 aherutse no gusezerera mu rwego rwo gushaka kubona imyanya ihagije  y'ingabo zizava muri FDLR. Ibiri amambu ariho akaza umurego muri LONI no mu baterankunga be ngo bakomeze baharabike FDLR hirya no hino ku isi kugeza amahanga yumvise ko ari abantu atagomba kugirana imishyikirano nabo, ko n'igihugu bariho bagitwika kandi batarakigeramo. Amaradiyo, ibinyamakuru byigenga byo hanze, ibicungwa na FPR imbere n'inyuma, byose bigahabwa amafranga atubutse yo kurucaga ngo iriya migambi iburizwemo. Sosiyete sivile ya RDCongo amwe mu mashyaka ya Politike nayo akabona akayabo kugirango akangurire abayoboke bayo gusaba ko icyitwa umuhutu cyose kcyirukanwa ku butaka bwa RDCongo vuba na bwangu. Ni muri urwo rwego ibinyamakuru by'abatsiko biriho bitangaza inkuru zidasobanutse ko abo muri FDLR bariho bashakirwa ibihugu byabakira nk'impunzi.

Kagame nareke gutekereza gisirikare

Uwahoze ari perezida wa Sudani, Jenerali Jafar EL Nimeri( 1930-2009), yahuye n' ibibazo mu gihugu cye muri 1983 biturutse ku mujyanama we magara Al Hassan Turabi wamugiriye inama yo  gutangaza ko Sudani igiye kuyoborwa n'amategeko ya kiyisilamu (Shariya).  Yahise yugarizwa n'imyigaragambo y'abaturage n'abanyeshuri barwanyaga iyo mpinduka ariko we kubera kwizera igisoda yumva ataganira n'abigaragambyaga, dore ko nta ntwaro bari bafite nk'ibitwaro bya rutura yari arunze. Perezida wa Misri bahana imbibe yaramuhamagaye ngo aze i Cairo barebere hamwe uko yaganira n'abigaragambyaga.

Yageze mu Misri atera utwatsi inama yagirwaga na mugenzi we wa Misri; agisoka mu nzu baganiriragamo, yahise yumva ko ba banyeshuri n'abaturage bafatanyije n'ingabo bafashe ubutegetsi muri Sudani! Jenerali Jafar Nimeri yasazije imigeri avuga ko agiye muri Sudan kubahonyora bose mu munota umwe. Perezida wa Misri yaramurebye amukubita  agashyi k'ubucuti ku rutugu amwinginga anamwenyura ati:" reka gutekereza gisirikare, guma hano Misri ikurimdire umutekano." yagumye mu Misri kugeza muri 1999,ariwo mwaka yasubiye muri Sudani. Abo yaganiraga nabo bose ari mu buhungiro, yababwiraga ko kubura ubutegetsi bwe byatewe ni uko yumviye inama z'uwo yitaga inshuti magara n'umuhanga mu bya politike Al Hassan Turabi icyo wari wibereye ku ibere ry'ingoma yamuhiritse!

Kagame nawe nareke gutekereza gisirikare, ayoboke inzira y'amahoro nkuko uwo yahitanye yabikoze. Kwizera ibikorwa bigayitse nko kwica, gutwika, n'ibindi ntarondoye,  aratanga urugero rubi abashaka ko u Rwanda rujya iburyo nabo bashobora kwifashisha mu gihe akomeje kwinangira maze igihugu kigahinduka nka za Liban, Libya cyangwa Irak. Itwikwa ry'ishuri ryisumbuye rya Byimana rimubere urugero rufatika ko byose bishoboka. Niba aba bana baratwikaga barya neza  bakaryama aheza, bizagenda gute kuri  za miliyoni  z'abanyarwanda zitagira icyo zirya n'aho gukinga umusaya, haje inkonkobotsi ikazibwira ko kugirango nazo zibeho neza, zigomba gukoresha uburyo Kagame yakoresheje ngo agere ku butegetsi no kubugundira? Ese niba koko abo yita abanzi bafite uruhare mu nkongi zibasiye u Rwanda, siwe ugomba kugira ipfunwe kuba yaranze kugera ku butegetsi akoresheje inzira y'amahoro agahitamo imena ry'amaraso akaba ari nayo akomeje kuyoboka ngo abugundire?

Kagame, witekereza gisirikare kuko wibeshya cyane, Karugarama Tarisisi niwe wakundaga kuvuga ko ngo inkono ihira igihe! Umunsi wa ngirente nugera nk'uriya wa Nimeri, ntuzavuge ngo iyo ntumva Rutaremara T., Musoni J, Nyiramongi, na Jack NZIZA kandi ugifite igihe cyo kugorora ibyo wagoretse amahoro agataha mu Rwanda.

kanda hano utange igitekerezo cyawe kuri iyi nyandiko usome n'ibyatanzwe n'abandi

NKUSI Yozefu

shikamaye.blogspot.com

shikama ku kuri na Demukarasi(SKUD)