Rwanda.Mu gihe Perezida Kagame yirirwa azenguruka Uburayi ahongera abazungu mu mafaranga FPR yirirwa inyunyuza mu banyarwanda, imbere mu gihugu agatsiko arangaje imbere karakataje mu kwiba umutungo wa rubanda : Muri E.W.S.A, B.N.R, F.A.R.G, MININFRA,…amamiliyari baririrwa bayarigisa nk’abasahuranwa

Umuziranenge, uruhinja  Iranzi
Agatsiko kaburiye tike
ya miliyoni 1 yo kumugeza mu bitaro
mu Buhinde!

Inkumi y'Umuzungu umuherwe Kagame
 yafashije
Miliyoni 47!

Ejo bundi aha nibwo ikinyamakuru cya Kagame na FPR gikorera kuri internet cyitwa www.igihe.com cyatangaje inkuru yari ikwiye kubabaza abanayarwanda bose bashyira mu gaciro kandi bagakunda igihugu cyacu cyatubyaye.

Muri iyo nkuru umunyamakuru wayanditse yavugagamo ko Perezida Kagame yahaye umwana w’umwangavu wo mu gihugu cya Irlande inkunga ingana n’amafaranga y’u Rwanda Mliyoni mirongo ine na zirindwi n’imisago ngo yo kumukorera insimburangingo.

Kagame azajye gusura HVP Gatagara azamenya icyo yari akwiye gukora

Mu itangazamakuru rikoranywe umwuga burya si byiza imvugo zijimije mu nkuru imwe kuko amategeko mpuzamahanga atabyemera ariko kubera ko ibibazo by’u Rwanda birenze urugero n’uruvugiro, biranakwiye kunyuzamo tugaca n’iyo migani twibanda kuy’imigenurano kuko ituma abakunzi ba SHIKAMA murushaho gusobanukirwa.

« Utagera we ntagereranya !!! » Iyi mvugo abanyarwanda bakuze barayizi, ni ukuvuga ko hari imbago udakwiye kurenga mu gufata ibyemezo cyangwa mu bikorwa uteganya. Iyo Kagame atinyuka agatanga Miliyoni mirongo ine na zirindwi mu gihugu cy’abazungu bagashize, biteye ikirenze agahinda.

Mu kigo cy’ababana n’ubumuga cy’i Gatagara mu Murenge wa Mukingo mu Karere ka Nyanza mu Ntara y’Amajyepfo habamo abana n’abakuru babana n’ubumuga bw’ingingo bakaba bayoborwa n’ababikira b’abizeramariya bafatanije n’abafurere b’urukundo (Frères de la Charité).

Icyo kigo cyatangijwe n’umupadiri w’umubiligi witwaga Frepont NDAGIJIMANA. Kubera ko ageze mu Rwanda yabonaga abana benshi baramugaye bigatuma imiryango bakomokamo ibaha akato, yahisemo gutangiza ikigo cyo kubafasha muri byose harimo no kubaha insimburangingo. Muri SHIKAMA, BYUMVUHORE Jean Baptiste yatubera umuhamya kuko ari umwe mu banyarwanda ubu baba barageze ikuzimu iyo adahura na Padiri Frepont NDAGIJIMANA.

Muri iyo mibereho igoye rero, i Gatagara harimo abababaye birenze uriya mukobwa wo muri Irlande ku buryo bibabaje kubona akora biriya bintu. Turetse i Gatagara nimurebe abarokotse Genocide mu Rwanda, bababaye bingana iki? Ese ba bakecuru Dr NKUSI Joseph akunda kwerekana kuri uru rubuga rwanyu SHIKAMA baguweho n’inzu ya surwumwe bo bayabahaye yabagwa nabi?

Agatsiko kabasenyeyeho amazu bariho bonsa ibibondo!

Kwiba igihugu cyawe abaturage bakennye ukajya gusehera abazungu birimo icyaha kiremereye cyane kandi inteko ishinga amategeko niba yakoreraga mu bwisanzure yari ikwiye guhamagaza Kagame kugira ngo atange ibisobanuro kuko bidakwiye kwihanganirwa.

Hari uwambwira ati Kagame se niba yaramufashije mu mafaranga ye bwite bikurya he? Mu gusubiza iki kibazo, ndagira ngo mbanze nshimire abantu bose baba bacyibaza nanabasubiza ko Perezida w’igihugu nta mafaranga ye bwite agira kuko ibya rubanda bose biba ari bye kandi n’ibye byose bikaba ari ibya rubanda.

Iyi mvugo ni isobanura ko amafaranga abaturage batanga mu misoro aba ari ay’igihugu hanyuma na Perezida akaba aba ategetswe kuyakoresha mu bikorwa byungura abaturage. Niba ari n’inguzayo yamuhaye yari akwiye kwerekana uko izishyurwa kuko n’abazungu ayo baduha burya abazukuru bacu bazayishyura imyaka n’imyaniko.

Ese 47,000,000 Rwf yafasha abanyarwanda bangana iki?

Abize bakaminuza mu birebana n’icungamutungo bemeza ko abasesagura ari abakize cyane kuko baba barasagutswe nabyo. Nyamara aya mafaranga uyagaruye mu Rwanda ni menshi cyane kuko ashobora kubaka ibigo nderabuzima bibiri byubatswe neza.

Aya mafaranga kandi ni menshi kuko abashomeri barangije Kaminuza barara ubusa bakabura n’agura COLOGATE yo koza amenyo batagira ingano. Nimutekereze uko byaba bihire gufata abasore nk’icumi ukabaha miliyoni mirongo ine na zirindwi maze bagatangira umushinga uciririste.

Miliyoni mirongo ine na zirindwi Kagame yagiye guhongera abazungu bakimaze kandi ashobora gutangiza ikigo cy’imari iciriritse ku buryo cyajya gitanga inguzanyo zitarenga ibihumbi magana abiri ku bakene, mayibobo n’indaya zuzuye muri Kigali maze bakazireka zigacuruza inyanya zikabona ikiziramutsa.

Miliyoni mirongo ine na zirindwi kandi zishobora kubakira abarokotse Genocide makumyabiri na batatu kuko inzu ya rukarakara mu Rwanda idashobora kurenza miliyoni ebyiri bityo bakareka gusembera no kurara bavirwa n’amazu yenda kubahirima hejuru.

BNR mu Kiyovu bayisahuye amamiliyoni akangari

Umugabo w’umuhanga cyane witwa KARL MARX w’umudage yigeze kuvuga ati : ”History repeats itself, first as tragedy, second as farce”, abanyarwanda nabo bati: “Ibyiza n’ibibi bihora bigendana”. Tubaye nk’abagarura iyi mvugo y’uyu mudage w’umuhanga twavuga ko yashakaga kuvuga ko amateka yisubiramo.

Ubujura burimo gukorwa n’agatsiko ka FPR burasa n’ububakungurira buganisha ku mpera y’ingoma yabo igiye kurimbuka nabi kurusha iyo kwa Habyarimana. Mu 1993 umugabo witwa KANYARWANDA Clepophas yari Guverineri w’icyo bitaga B.D.G.L (Banki y’ibiyaga bigari) yari ifite icyicaro cyayo Goma / Gisenyi. Ubu yabaye balinga kuko FPR yayinanije nyamara RD Congo n’Uburundi bafite ubushake.

BNR -Rusizi

Uyu KANYARWANDA Cleophas yari akize cyane maze akagira nyirabukwe witwaga MuKARUHIVU wari utuye i Kirengeri hariya ku muhanda wa Kigali-Butare. Iyo yabaga yagiye gusura nyirabukwe uwo mukecuru yabaga asubijwe.

Kanyarwanda uyu rero muri 1993 bivugwa ko yari inshuti magara n’uwayoboraga BNR maze ngo baza gushwana ubwo Habyarimana yabasabaga ko bakora operasiyo yo kunyereza amafaranga muri BNR kugira ngo hagurwe rwihishwa intwaro zo kurwana na FPR yabicaga bigacika za Kagitumba, Muvumba, Ryabega, Gabiro, Nyakayaga n’i Ndorwa yose.

Icyo gihe Kanyarwanda yarabyanze avuga ko bidashoboka ko watangaza ko BNR yibwe kuko mu mategeko, imicungire n’uburinzi bidashoboka kubona ibisobanuro by’uko BNR yibwe. Ibi bikaba bifitiwe ibisobanuro kuko muri BNR nta mafaranga ahaba ahubwo haba icyo twita RESERVE OBLITAIRE (Bonds Holders) na RESERVE OBLIGATOIRE (Binding Contracts) DES FINANCES DE L’ETAT (Public Treasury).

Iyo Banki nasiyonari imaze gukoresha amafaranga (Banknotes and Coins) ihita iyohereza mu mabanki kugira ngo ayakwirakwize mu baturage batangemo inguzanyo,... Icyo BNR ikora ni ukugenzura icyo twita FLUX MONETAIRE ni ukuvuga uko ifaranga rihagaze ku isoko, uko ritembera, ingano y’umusaruro n’ikigereranyo cya Inflation ahanini iterwa n’ubwinshi bw’abaguzi buba busumba umusaruro uri ku isoko n’ingano y’inguzanyo n’uburyo zishyurwa.

Agatsiko ka FPR rero, kubera ko batageze mu ishuri bakaba bategeka abanyarwanda bunyeshyamba kubera ibibazo bafite bahisemo gutangaza ko BNR yibwe Miliyoni magana abiri na mirongo itatu  (230,000,000 RWF) maze mu Kiganiro Guverineri John RWANGOMBWA yahaye abanyamakuru avuga ko n’uwayatorokanye yaburiwe irengero.

Muri SHIKAMA amakuru yose n’imigambi icurirwa mu Rugwiro tuba tuyafite mu biganza, nimwibuke inkuru twababwiye yavugaga ko mu kanama k’abo mu gatsiko b’ikambere yabereye ku Kimihurua ku cyicaro cya FPR na RWANGOMBWA yari ayirimo aho yavuze ko isanduku ya BNR isigayemo ubusa.

Ibyo tukaba twari tubibabwiye mu nkuru yavugaga ko bagiye gukuraho intara, gusigarana uturere 15, gusigarana imirenge 208, n’utugari-mbarwa. John RWANGOMBA wavuze ko isanduku irimo ubusa niwe uvuze ko abasahuye BNR baburiwe irengero.

Mu 1994 umusaza w’inyangamugayo witwa MUTEMBEREZI Franncois niwe wayoboye BNR maze FPR iramuburabuza kuko yamusabye kenshi kunyereza amafaranga ngo batangaze ko yibwe agahitamo kubangira niko kumweguza ubu yibera mu rugo rwe ku Kicukiro.

Amakuru yandi dufite muri SHIKAMA ni avuga ko Kagame yakunze gushwana na KANIMBA Francois umunyagikongoro wasimbuye MUTEMBEREZI muri BNR bamusaba kenshi kunyereza umtungo wa BNR ngo awuhe FPR. Kubera ko KANIMBA Francois ari mwene wabo na MAKUZA Anastase uyu washinze MDR Parmehutu,

Bikubitiyeho na Film yakozwe na Dr Petero Damiyani HABUMUREMYI yavugagamo ko MAKUZA ariwe watumye bicika, Kagame yiyenjeje kuri KANIMBA bamusaba kubibira amamiliyoni muri BNR abyanze, kubera ubuhanga bwe mu icungamari, bamuvanamo bashyiramo umugande mwene wabo RWANGOMBWA John.

Ibi bikaba byarakozwe nyuma gato y’uko na MAKUZA Bernard bamwirukanye kuri Minisitiri w’intebe bagashyiraho Dr Petero Damiyani HABUMUREEMYI wamukoreye ishyano amuteranya ku gatsiko ahimba NDUMUNYARWANDA ubu bikaba ari ibibazo gusa gusa. Tuzabigarukaho mu nkuru yacu izakurikiraho kuko SHIKAMA twabakoreye ubushakashatsi bwimbitse kandi dufitiye n’ibimeyetso bifatika.

Mu gusoza aka gace, bikaba bidashoboka kwiba Banki Nasiyonari y’u Rwanda ahubwo ari inyerezwa ryumvikanyweho bikanakubitiraho ko n’abanyamakuru basabye RWANGOMBWA gutangaza amazina y’uwo avuga wayanyereje akabihorera akaruca akarumira.

Ayo mafaranga akaba yaribwe ku kagambane kugira ngo ajye gukoreshwa mu guhigisha uruhindu abo Kagame avuga ko batabyumva kimwe nawe ku isi yose atitaye ku bibazo biri imbere mu gihugu by’ubukene n’inzara igiye kumara abaturage.

Muri EWSA na MININFRA naho agatsiko ka FPR kibyemo Miliyari zirenga makumyabiri n’eshanu   

Hari amakuru SHIKAMA dufitiye gihamya avuga ko ubu Kagame byamuyobeye akaba arimo kureba ukuntu amafaranga bakomeza kuyasahura maze mu minsi mikeya agatsiko k’amabandi ayobora u Rwanda kitwaje intwaro kakazisubirira i Bugande kuko gasumbirijwe.

Abayobozi ba PAC bumva ibisobanuro bya EWSA/FOTO. igihe.com

Aba bose bari mu ikinamico: ibyo barimo barabizi: aho amafranga yagiye barahazi.Ni ukugirango ejo abari abayobozi nibabazwa ibyo barindaga bazavuge bati : twabisobanuriye INTEKO yariho iratwumva!!!!! Mureke ubucakura, ngo n'uwendeye nyina mu nyenga yaramenyekanye.

Ni muri uru rwego n’ibigo bitaribwa mukwiye kwitegura ko nabyo bitahiwe. Duhereye muri MININFRA ubu iyoborwa n’uwo i Butare bitaga UMUTARIPFANA Frof LWAKABAMBA Silas waje kuzamurwa ashyirwa muri MININFRA ibibazo yasanzemo ntibigira ingano.

Muri SHIKAMA duherutse kubacira amarenga twigendera tuvuga ku mushinga wa GAZ METHANE mu kiyaga cya Kivu ubu waburiwe irengero kandi warashowemo amamiliyari atabarika yashoboraga kubaka ibindi bikorwa-remezo bigateza imbere abaturage.

Mu gihe Madamu Ingeniyeri LINDA BIHIRE yayoboraga MININFRA (Minisiteri y’Ibikorwa Remezo) uyu mushinga wari witaweho ariko ubu warasinziriye kandi baravugaga ko uje kongerera abanyarwanda amashanyarazi none mu gihugu hose nta mashanyarazi akiharangwa abantu LAPTOP barabitse mu tubati, amapasi barabitse ntawe ucyambara umwenda ugoroye, firigo zo nta wavuga igihombo bizwi n’abacuruza imbuto n’inyama.

Guhera i Rusizi, ukazamuka Huye, ugaca Muhanga, ukaminuka za Nyagatare na Musanze ntushobora kubona umuriro mu gihugu guhera saa kumi n’ebyiri z’umugoroba kandi aribwo abantu baba bawukeneye cyane mu ngo zabo no munganda. Ku manywa naho ubura buri kanya.

Mu kiganiro MININFRA yahaye abanyamakuru yavuze ko hari Miliyari zagombaga kongera umuriro mu gihugu zaburiwe irengero. Depite Maitre NKUSI Juvenal ukuriye Komisiyo y’abadepite ishinzwe Ingengo y”imari no kurwanya RUSWA asa n’umaze kumirwa kuko ibigo byose bimugeze imbere bigaragaza inyerezwa kandi ntihagire uhanwa ahubwo bagakomeza akazi.

Muri EWSA Umuyobozi Mukuru wayo Bwana NTARE Jules KALITANYI aherutse kwitaba inteko ishinga amategeko ku Kimihurura maze avuga nta n’isoni ko muri EWSA Mliyari cumu n’eshatu n’imisago(13,000,000,000RWF) zaburiwe irengero. Icenga ririmo rero ni uko na Depite NKUSI wigaragaza nk’ubakangaranya nawe ashobora kuba ari ku isiri na FPR kuko atabaza amazina y’abanyereje ayo mafaranga.

Muri FARG naho biracika. Mu gusoza iyi nkuru irebana n’icungamutungo cyane SHIKAMA turamagana ubu busambo burenze urugero kandi turasaba abakora muri ibi bigo kwima amatwi abo mu gatsiko babashuka kuko umutungo ari uw’abenegihugu kandi igihugu gihoraho.

Abategeka u Rwanda ubu bamaze kuzuza amazu i Asmara muri Erithrea no mu Bwongereza ku buryo bashobora kwigendera umunsi ku munsi kandi abo bashukwa bagahombya abaturage bayanyereza nta na rifuti bazabaha muri izo ndege za Kagame ziyoborwa na Prof NSHUTI Manasseh.

Nimukomere ku muheto!!!

BAZIGUKETA F.
shikamaye.blogspot.no
shikama ku kuri na Demukarasi(SKUD)

______________________________________________________________
PS:NKUSI Yozefu: Urakoze muvandimwe Baziguketa. Icyo nakongera kuri iyi nyandiko yawe icukumbuye nkuko usanzwe ubigenza, ni uko uyu mugabo Rwangombwa bajyanye muri BNR gusahura ibya Rubanda babyerekeza mu mahanga, Kagame na FPR bamushyize muri BNR amaze gushinga cya kigega bise Agaciro.! Murabona ko ubuhanuzi bwa Magayane bwarangije gusohora:" abo bavantara bazarya akaribwa n'akataribwa barangajwe imbere na Rwabujindiri rurya ntiruhage. Mu minsi yabo ya nyuma kandi igihugu kizaba cyuzuye agahiri n'agahinda, ubugome ndetse n'inzara rugeretse!" Ni aha Nyagasani niba dukomeje kurebera gusa mu gihe bariho badusamburiraho inzu twugamyemo.