Pageviews all the time

Rwanda& Burundi.Kwibuka Ludoviko Rwagasore: mu Rwanda no mu Burundi, Abahutu n’Abatutsi bazicana kugera ryari ?


Ubukwe bwa Rwagasore na Mariya Roza

Intwari ya mbere y’u Burundi ni igikomangoma ngenerwamurage Ludoviko Rwagasore wo mu bwoko bw’Abatutsi wagandaguriwe i Bujumbura le 13/10/1961, afite imyaka 29 gusa, arashwe n’umugereki witwaga Joroji Kageorgis. Intwari ya kabiri y’u Burundi ni uwari ministiri w’intebe bwana Petero Ngendandumwe w’umuhutu wagandaguriwe i Bujumbura le 15/01/1965 arashwe na Gonzalve Muyenzi, umututsi w’umunyarwanda wari warahungiye i Burundi. Petero Ngendandumwe bamuteze avuye mu bitaro gusura umugore we wari umaze kubyara. Intwari ya 3 y’u Burundi ni nyiricyubahiro perezida Melikiyori Ndandaye w’umuhutu wandaguriwe i Bujumbura le 21/10/1993 yishwe n’abasirikari b’abatutsi bashakaga gufata ubutegetsi ku ngufu. Bamwiciye hamwe n’abafasha be ba hafi 13, harimo n’umugore wa Silivestiri Ntibantunganya n’umwana wabo w’uruhinja. Intwari ya 4 y’u Burundi ni nyiricyubahiro perezida Sipiriyani Ntaryamira w’umuhutu wagandaguriwe i Kigali le 06/04/1994 hamwe na mugenzi we w’u Rwanda Yuvenali Habyarimana. Indege barimo hamwe na bamwe mu bafasha babo ba hafi yahanuwe n’abasirikari b’abatutsi bo mu nyeshyamba za FPR.

Ejobundi le 13/10/2012 hazibukwa imyaka 51 izaba ishize umuhisi Ludoviko Rwagasore atabarutse. Rwagasore yari imfura y’umwami Mwambutsa wa 4 Bangiricenge (16/12/1915- 08/07/1966) n’umugore we wa mbere Teresa Kanyonga. Rwagasore yavukiye i Gitega le 10/01/ 1932. Amashuri abanza yayigiye i Bukeye, i Kanyinya n’i Gitega. Mu w’1945 yagiye kwiga amashuri yisumbuye mu Rwanda, mu mugi wa Butare icyo gihe witwaga Astrida. Yahamaze imyaka 6. Nyuma yagiye kwiga kaminuza Anvers mu Bubiligi. Yagarutse mu Burundi mu w’1956, aherako yinjira mu bya politiki agamije ukwikukira kw’u Burundi.


Mu w’1958 yashinze umugambwe w’abadasigana UPRONA. Intego yawo yari Imana, Umwami n’Uburundi”. Ise wumvaga ko umwanya w’igikomangoma ngenerwamurage utari mu ruhando rw’amashyaka, ko ahubwo uri mu kwitegura kuzaba umwami yamwohereje gutwara ahitwa i Butanyerera ; undi aranga yikomereza ibya politiki. Amatora y’amakomini mu kwa 11/1960 yabaye Rwagasore afungishijwe ijisho, ahagararirwa n’Ababiligi, UPRONA iratsindwa, hatsinda ishyaka riharanira demokarasi ya gikirisitu (PDC) ry’umuganwa Petero Baranyanka. Amatora y’abadepite ya le 18/09/1961 yabaye noneho Rwagasore adafungishijwe ijisho, ahagararirwa n’umuryango w’abibumbye, UPRONA iratsinda cyane kuko yegukanye amajwi 80%, ubwo Rwagasore aba abaye ministiri w’intebe ugomba gushyiraho leta no kuyiyobora. Hashize iminsi 25 gusa ahitanwa n’isasu ry’umugereki Joroji Kageorgis, igikuba kiracika mu Burundi, ariko Abarundi ntibasubiranamo. Rwagasore yari yarashakanye le 12/09/1959 n’umukobwa w’umuhutukazi witwaga Mariya Roza Ntamikevyo, babyarana abana 2 b’abakobwa.

Kageorgis yarafashwe, araburanishwa, akatirwa urwo gupfa. Umwami Boduwe w’Ububiligi yashoboraga kumugirira imbabazi, agahabwa igihano cyo gufungwa burundu. Ministiri w’ububanyi n’amahanga w’Ububiligi, bwana Paul Henri Spaak yamugiriye inama yo kudatanga izo mbabazi kugirango abakunzi ba nyakwigenedera Rwagasore badasara, bagateza imvururu ndetse bakaba barya n’Ababiligi bari bakiri mu Burundi. Kageorgis yarashwe le 30/06/1962 bucya Uburundi bwikukira. Abari bamutumye nabo barafashwe, baraburanishwa, bakatirwa urwo gupfa bamanitswe. Abo ni Yohani Batista Ntidendereza na Yozefu Sebatwa Birori, abahungu b’umuganwa Petero Baranyanka, hamwe na babyara babo Yohani Batista Ntakiyica na Antoni Nahimana, n’umucuruzi w’umugereki witwaga Misheli Iatrou. Bamanitswe le 15/01/1963 kuri sitade i Gitega. Petero Baranyanka wari ufite icyo gihe imyaka 73 yakatiwe gufungwa imyaka 20, ariko ntiyatinda gufungurwa, aza kuzira urw’ikirago le 19/07/1973.

Aho byavuye: 
Mu Burundi no mu Rwanda, Abahutu n’Abatutsi bazicana kugeza ryari ?
(Byavanywe mu nkoranya Wikipedia no mu gitabo “Burundi ieri e oggi” cya C.Bakara na D. Hakizimana, bishyirwa mu kinyarwanda n’ubwanditsi bwa leprophete.fr)
· 

No comments:

Post a Comment

Muvandimwe, nshuti ya SHIKAMA, turagushimira cyane umuganda utanga wo kubaka URWANDA rushya ubinyujije mu bitekerezo byawe( Komanteri). Kugirango turwanye urukungu rw'Agatsiko ni ngombwa ko buri komanteri ibanza gusuzumwa. Yohereze, irahita ijya ku rubuga mu minota mike niba idatandukira( kuvuga ibitajyanye n'inyandiko), itukana, cyangwa yuzuyemo uburere buke.

Wipfusha komanteri yawe ubusa ukoresha "ANONYMOUS", himba izina urikomeze kuko hari ibihembo mu Kuboza 2016 ku bantu 3 bazaba babaye indashyikirwa mu gutanga ibitekerezo. Dukomeje kubashimira ubwitange n'umurava muhorana. IMANA Y'I RWANDA ihorane namwe iminsi yose.

Dg NKUSI Yozefu
www.shikamaye.blogspot.com
Uharanire ko Ukuri gusimbura ikinyoma.
Email: mahoriwacu@gmail.com; tel: +4745564355