SHIKAMA iriho irarwanywa n’abafite imbuga zitwa ko zirwanya Leta ya Kagame bayibibaho urukungu amanywa n’ijoro!

                       

Hari abari bufate iyi nkuru nk’urwenya nyamara ni ukuri kwambaye ubusa! Kuva twashinga  SHIKAMA nshya muri Gicurasi 2015, hari bamwe mu bafite imbuga zikorera hanze babuze amahwemo. Ibi byagiye bigaragarira mu guhindagura kenshi gahunda  zahitaga ku mbuga zabo. Ntibyahagarariye aho kuko bagiye bakoresha uko bashoboye bifashisha ikoranabuhanga bakohereza urukungu( spams) kuri Shikama ahantu babona hahurira abantu benshi nko mu IHURIRO cyangwa Komanteri. Ibi byagiye bikorwa kugirango imbuga zabo zidahagarara dore ko zubakiye kuri komanteri aho kuba guhitisha inyandiko nyinshi. Bakeka rero ko Komanteri za SHIKAMA zikoze, imbuga zabo zahagarara cyangwa bikabasaba umwanya uhagije wo gutegura inyandiko kenshi kugirango imbuga zabo zikomeze zisurwe.

Aba bantu babanje kwikoma IHURIRO rugikubita, nyamara babonye ko nta gikorerwaho bahita bahagarara. Ariko bongeye kuzura umugara tuvuze ko ahagenewe komanteri hagiye gukora nyuma y’amavugururwa; aha byatumye bamwe bahindura imiterere y’imbuga zabo inshuro zirenze 2 mu kwezi  kumwe. Ntibarekeye aho kuko bibasiye ahatangirwa komanteri ku nyandiko zimwe na zimwe kuri Shikama nshya  maze   bohereza urukungu ubutitsa, uko rwoherezwa tuzabibagezaho  vuba aha. Hagiye hibasirwa inyandiko bakeka ko yasomwa n’abantu benshi kandi bakibasira cyane inenga Agatsiko kugirango bayobye uburari abantu bakeke ko ari Agatsiko kariho kabikora! Urugero ni inyandiko «Ibyahishuwe bya 18. Menya ukuntu inkomamashyi zo ku Kimihurura zabaye ikiraro  FPR icaho isahura umutungo mu bigo bya Leta iwerekeza i Buraya gutegura imanza z’amaraso». Aba barozi bibasiye iyi nyandiko bayoherezaho urukungu inshuro 15,892 mu gihe imaze gusomwa n’abantu barenga 25,325; ibi byatumye aba bose nta n’umwe  ubona  uko atanga igitekerezo cye ( komanteri) nkuko aba bagome babyifuzaga.

Kuki se ataba Leta ya Kagame Pawulo ibikora?

Iki ni ikibazo twagiye twibaza rugikubita ariko twirinda kugira umwanzuro dufata tutabanje gukora amatohoza dore ko mu bugome nk’ubu iyo ushyize icyaha ku mwere uba uhaye ingufu ukora ubu bugome. Impamvu twaje kubona ko atari Leta ya Kagame na mbere y’uko dokoresha ikoranabuhanga, ni uko SHIKAMA isomwa mu Rwanda amanywa n’ijoro  mu gihugu hose nta nkomyi, 60% y'abasomyi bacu bari mu Rwanda mu migi no mu byaro aho badusomera kuri za mobayilo. Si ukuvuga ko byananiye Agatsiko kuyikomatanyiriza mu Rwanda nkuko kabigize ku zindi mbuga nyinshi zikorera hanze. Hakurikiyeho gukoresha ikoranabuhanga rikaba rigenda rigaragaza ko Leta y’Agatsiko ntaho ihuriye n’ubu bugome, iby’iri koranabuhanga dushobora kuzabibagezaho vuba aha amatohoza arangiye.

Twarangiza tubwira aba bakora ubu bogome ko kurushanwa kwiza ari uguhora uhanga udushya atari ukuroga abaje mu irushanwa.

Ngo abwirwa benshi akumva bene yo.

Dg NKUSI Yozefu

Shikamaye.blogspot.no

SKUD