ISESENGURAMVUGO NA POLITIKI : «Mu ndahiro ye kuri iyi taliki 20 Kanama 2015 perezida Petero NKURUNZIZA yongeye guca amarenga ko uteza akaduruvayo ka politiki muri Bujumbura amuzi neza kandi ko ashobora kuzagubwa gitumo bityo ubuhanuzi butegerejwe na benshi bakazabubonesha amaso yabo»/ UDAHEMUKA Eric

Nkurunziza na Kagame

Hano kuri SHIKAMA mbere y'uko akaduruvayo ka politiki kaduka muri Bujumbura twari twarabagejejeho inyandiko ntibuka umubare zababwiraga ko Kagame yarahiye akirenga ko agomba gutera Uburundi.

Kuva icyo gihe kugeza magingo aya hari byinshi byahindutse ndi bugarukeho ariko ikigaragarira buri wese ni uko idosiye y'Uburundi Paul KAGAME imaze kumuzengereza, ku buryo yagirwa inama yo kureka kugaba igitero cya gisirikari kuri Burundi.

Nari naricecekeye none mpisemo kongera kwegura ikaramu kuri dosiye y'Uburundi

Nk'uko nari mbivuze haruguru gato, kuva akaduruvayo kakwaduka muri Bujumbura nirinze kugira inkuru n'imwe mandika kuri iki gihugu. Ahanini nabitewe n'uko iyo umuturanyi arimo kuyacekwa burya rimwe na rimwe iyo umwanditseho haba ubwo yagira ngo uramushungera.

Muri iyi nkuru hano kuri SHIKAMA ndashaka kuvuga ibintu bitatu byonyine : Icya mbere ni ukuntu iyi ntambara Kagame yasoje kuri Bujumbura izarangirira i Kigali kandi Kagame akayitsindwa, icya kabiri ni ibimenyetso byerekana ko NKURUNZIZA arusha KAGAME amayeri n'amacenga ya politiki hanyuma nze gusoreza ku nama ngira KAGAME ko rwose ibyo mu Burundi yabihagarika kuko biboneka neza ko imaze kumuzengereza ahanini bitewe n'uko Uburundi butandukanye cyane na RDC Kigali yinjiramo uko ishatse n'igihe ishakiye.

Iyi ntambara Kagame yasoje kuri Bujumbura izarangirira i Kigali kandi Kagame n'abe bazayitsindwa nta kabuza

Nkurunziza yarahiye kongera kuyobora Abarundi indi myaka itanu

Kugeza ubu nibwira ko nta muntu ubona neza ibibera mu karere k'ibiyaga bigari wahakana ukuboko kwa Kigali mu bibazo biri i Bujumbura. Mu gusoza ijambo yabwiye abari bitabiriye umuhango w'irahira rye, Nyakubahwa Petero NKURUNZIZA perezida w'Uburundi yagize ati :

«Dutangarije ubugira kandi uburundi n’amakungu ko inyuma yaya matora, hagiye kuba ikiringo c’amahoro, umutekano n’iterambere, tukanagabisha ko uzokwitambika imbere yavyo, ari umurundi canke umunyamahanga azohigura n’Imana mushobora vyose, ivyago bizomushikako giturumbuka atagitabara ; Imana yo mw’ijuru niyo cabona; Imana yaduhaye Burundi, ikabudutungira».

Muri iyi nteruro uyisesenguye neza, ukayigereranya n'izindi mbwirwaruhame yavuze vuba aha biraboneka neza ko Perezida NKURUNZIZA azi neza uteza akaduruvayo mu gihugu cye ku buryo binabaye ngombwa ashobora kuzamwivuna.

Ibyago bizamugwa gitumo bimutunguye nta gitabara

Ni kenshi twagarutse ku nteruro imwe igaragara mu buhanuzi ku Rwanda ivuga ko Igitero Kagame azohereza mu Burundi kizamuhindukirana kikamutera (Ubuhanuzi GAKWAYA DAMASCÈNE. Ibi birashoboka cyane kuko Nkurunziza abaye perezida wemewe n'amategeko n'ubwo hari abavuga ko abwibye. Ibi ntawabitindaho kuko muri politiki na dipolomasi byose birashoboka.

Urebye uko amahanga arimo kumuhahana nta wari uziko Zuma yakohereza intumwa muri uwo muhango. Hano icyo umuntu yakwibutsa ni uko burya nta leta ibura inshuti. Ibi bisobora gutuma Nkurunziza yitabaza ibihugu runaka(...) ateza ubwega asobanura ikibazo akaba yakumvwa kandi ndabona bishoboka cyane ndetse mu gihe cya vuba kuko akavuyo nigakomeza hazafatwa ingamba zihutirwa zo kugahagarika burundu.

NKURUNZIZA arusha KAGAME amayeri n'amacenga bya politiki kandi byose akabikora bucece

Nimwibuke ari mu nama mu Busuwisi, Kagame yavuze ko Nkurunziza akwiye kuvaho kuko abarundi batamushaka. Nyamara NKURUNZIZA nta na rimwe arahingutsa mu kanwa ke u Rwanda muri aya mezi arenga 4 y'akaduruvayo mu gihugu cye.

Abarwanya Nkurunziza bose bihindiye i Kigali nk'aho bari bahamagawe na mbere y'uko umugambi wo guhunga upangwa bahita bakora umutwe wo kurwanya Bujumbura. Umuhigo wa mbere wari uw'uko bagombaga gukora ibishoboka byose italiki ya 24 Kanama 2015 NKURUNZIZA yari kuzarahiriraho ntibizashoboke.

Nyakubahwa NKURUNZIZA rero aberetse ko akaze muri politiki kuko iyo bamugabaho igitero gikaze muri Bujumbura atararahira bashoboraga kuzamuzengereza ariko ubu ni perezida wemewe n'amategeko ku buryo mbona ko kumutsinda bizabagora n'ubwo ntirengagije ko nawe ari mu bibazo by'urudaca bishobora no kumuhitana arebye nabi.

Abateje akaduruvayo muri Bujumbura bashatse bagahagarika kuko bigaragara ko nabo bizabagiraho ingaruka

Mu gusoza iyi nkuru ndibaza ibibazo bitatu bikurikira : Ese koko Nkurunziza umushotora aramuzi neza? Ese koko afite ubushobozi bwo kumugabaho igitero gitunguranye? Ariko se koko ko iminsi iza iduhisha byinshi izo ngabo abapfumu bemeje ko Kagame azohereza gutera Uburundi zikamuhindukirana bitunguranye zizaba zihawe amabwiriza na nde? Ese icyo gitero kizabaho Paul Kagame agihumeka ari i Kigali akazakibonesha amaso ye???

Hano niho nanjye bincanga umugani wa ya mvugo ubu igezweho. Impamvu bincanga ni uko iri jambo BITUNGURANYE ryavuzwe n'abahanuzi n'abapfumu none NKURUNZIZA nawe akaba amaze kurisubiramo inshuro ebyiri zose.

Uko byamera kose ntawakwishimira ko intambara ihitana inzirakarengane. Nyamara dushingiye no ku miterere y'u Rwanda n'Uburundi haramutse habayeho impamvu yatuma ibi bihugu byombi birwana, ingaruka zaba mbi cyane.

Kugira ngo bitazagera aha, birakwiye ko uwateje akaduruvayo muri Bujumbura arekeraho agasubiza inkota mu rwubati, Nkurunziza nawe akareba niba koko hari ibitanoze akabinoza, byaba ngombwa akicarana ku meza amwe n'abatavuga rumwe nawe maze amahoro agasagamba mu Burundi no mu Rwanda.

UDAHEMUKA Eric

shikamaye.blogspot.no

Shikama ku Kuri na Demukarasi(SKUD)