IMUNGU MU BUKUNGU BW'U RWANDA : «Nyuma gato y'uko guverineri wa BNR Bwana John Rwangombwa yari aherutse guha gasopo abanyamakuru biha ibyo kwandika no gutangaza inkuru zirebana n'ubukungu, leta ya FPR yibye ku mugaragaro mu isanduku ya leta miliyari 15 ziyongera ku zindi miliyari 114 yibye guhera muri 2008»/ UDAHEMUKA Eric

Guverineri Rwangombwa arabeshya ko muri aka gasanduku hari
amafaranga asigayemo kandi karimo ubusa!

Mu kiganiro aherutse guha abanyamakuru i Kigali mu cyumweru gishize, SHIKAMA twamenye ko guverineri wa banki nkuru y'u Rwanda Bwana John RWANGOMBWA yahaye gasopo abo yise abanyamakuru biha gutangaza inkuru zirebana n'ubukungu bw'igihugu kandi abo banyamakuru ari abaswa badasobanukiwe ibirebana n'icungamari rya leta.

Guverineri Rwangombwa ndamwumva ariko yari afite ikindi agamije kiganisha u Rwanda mu bujyahabi

Nibyo koko inkuru zirebana n'ubukungu bw'igihugu zirarushya kuzitara, kuzandika no kuzitangaza bikaniyongeraho ko abanyarwanda badashishikazwa no kuzisoma kuko muri kamere yabo bikundira BYACITSE.

Birazwi neza ko abenshi mu banyamakuru bakorera imbere mu Rwanda batize Kaminuza kandi n'abake bayize bize ishami ry'itangazamakuru ku buryo badasobanukiwe ibirebana n'ubukungu. Nyamara muri SHIKAMA tubona ahubwo Rwangombwa yari akwiye kwibuka ko muri byinshi umunyamakuru iyo ahuguwe abikora neza.

Niba navuga ngo kuva muri 2008 leta ya FPR imaze kwiyiba miliyari 129 cyangwa niba nakwandika ko (...) byanyobeye uko mbyandika ariko ikigaragara ni uko harimo ubujura. Icyo Rwangombwa yashakaga kwari ukugira ngo hatazagira ukopfora mu gihe FPR irimo gusahura BNR amanywa ava.

Ibintu bikakaye cyane nka BNR, ISOKO RY'IMARI N'IMIGABANE abaturage babifata nk'ibintu bitabareba ndetse bidakwiye kubatesha umutwe

Mu myumvire y'umunyarwanda uyu usanzwe wituriye mu cyaro, umusanze mu kabari, mu isoko cyangwa mugahura MISA isohotse ukamubwira uti muri BNR bibyemo miliyari 129 z'amafaranga y'u Rwanda yaguseka kandi akakubwira ko ibyo umubwira bitamureba ndetse nta n'icyo bimubwiye.

Nyamara nk'uko SHIKAMA dukunze kubibasobanurira akantu kose gakozwe ku ifaranga ry'igihugu kagira ingaruka ku mwenegihugu wese uri ku buso ayo mafaranga akoreshwaho. Niyo mpamvu nabyise ubujura buciye icyuho kuko harimo iyeri rya FPR rikomeye : Ko Rwangombwa atangaza ko bagujije kuki adatangaza ko bishyuye?

Ingengo y'imari ya leta iva mu misoro hamwe n'inkunga ihabwa n'amahanga. Kuki leta ya FPR iguza BNR?

Iki kibazo benshi mu banyarwanda musoma SHIKAMA mushobora kukibaza kandi gifite ishingiro. Ntabwo ari ikosa ko Leta ishobora kubona igenamigambi ryayo rikeneye amafaranga aruta aboneka mu misoro n'inkunga. Ariko hari ibintu bibiri bigomba gukorwa FPR ica ku ruhande ari nayo mpamvu igikorwa gihinduka ubujura.

Icya mbere ni uko iyo ayo mafaranga leta iguza BNR ari ayo kunganira ingengo y'imari agomba gusabwa mu gutangaza ingengo y'imari kandi nayo akaba abariwemo. Icya kabiri ntibyemewe kuguza inshuro ebyiri, eshatu, enye,...utarishyura aya mbere kuko ari ubwambuzi.

Ikindi ni uko kuguza inshuro 8 zikurikiranya(2008-2015) byereka buri wese usesengura ko ubukungu bw'u Rwanda bwazambye ndetse bugeze aharindimuka. Bikaba byumvikana ko abatarabashije kwishyura imyaka 7 yabanje nta cyemeza ko bazishyura icyarimwe imbumbe.

Amafaranga akoreshwa mu bikorwa by'umwijima mu gihe mu giturage nta gafaranga kaharangwa

Birazwi ko leta ya FPR ari leta ikoresha amafaranga menshi cyane mu iperereza ryayo. Hano icyo nita ibikorwa by'umwijima ni ibikorwa bihitana inzirakarengane. Ibibazo ubu mu gihugu ni byose ku birebana n'ubukungu.

Leta igujije mu gihe no mu cyaro kimwe no mu mijyi by'u Rwanda nta gafaranga kakiharangwa ahanini bitewe no kwaka buri wese umusanzu wo gufunguza Lt. Gen. Emmanuel KARENZI KARAKE. Iki gikorwa muri SHIKAMA tukaba tucyita ubujura kuko amafaranga yaratanzwe, Karenzi arafungurwa, amafaranga ntiyahabwa Ubwongereza kandi ntiyanasubizwa abayatanze. None se ayo mafaranga yagiye he?

Iyi nkuru nyiteguye kugira ngo nerekane ibibazo birebana n'ubukungu biri mu Rwanda kandi ngira ngo mbonereho kwihanganisha abagizweho ingaruka n'ifungwa ry'imihanda ihurira ku nzu ya Kagame. Mboneyeho kandi kubwira abanyarwanda bose ko iminsi iza mu bukungu bw'u Rwanda izarushaho kuba mibi.

UDAHEMUKA Eric

shikamaye.blogspot.no

Shikama ku Kuri na Demukarasi(SKUD)