ISESENGURAMPAMVU NA POLITIKI : «Kubera umuriro w'inkekwe urimo kwenyegezwa n'Ubwongereza, hagati ya perezida w'u Rwanda Nyakubahwa Paul KAGAME na Lt. Gen. Emmanuel KARENZI KARAKE (D.M.I) umwe agomba guhitana undi byanze bikunze cyangwa byaba ngombwa bombi bakajyana»/ UDAHEMUKA Eric

Magayane yahanuye ko Kagame azaraswa umwambi w'igishirira(isasu)
akazabikorerwa n'inshuti ye magara. Aho si Ikinywamaraso Karenzi Karake yavugaga?

Kuva ku italiki 19 Nyakanga 1994 umunsi FPR yafatiyeho ubutegetsi i Kigali no mu Rwanda hose, igihugu cyacu u Rwanda gihorana amakuru akangari ku buryo guhitamo ingingo wandikaho uri umunyamakuru wabigize umwuga bigusaba kubanza gukora imyitozo.

Ifungwa rya Lt. Gen. Emmanuel KARENZI KARAKE ryatumye amaraso ahagarara muri Kigali Paul KAGAME ananirwa kurambika urubavu

Mu mashuri yose yigisha itangazamakuru ku isi hari urugero mwarimu aha abanyeshuri kugira ngo abumvishe byimazeyo igisobanuro cy'amakuru ashyushye. Urwo rugero ni uru : «Ari umuntu wariye imbwa ari n'imbwa yariye umuntu muri izi nkuru zombi ishyushye ni iyihe???» Namwe mwihe igisubizo ariko muzirikane ko igisubizo umushinwa yaguha gitandukanye n'icyo wahabwa n'umunyabiryogo!

Tugarutse kuri KARENZI KARAKE, n'ubwo nzi ko buri munyamakuru, buri musesenguzi afite uburenganzira bwo gusesengura uko abyumva wenda akurikije ubuhanga bwe, ubunararibonye bwe,... Mu ruhande rwanjye hano kuri SHIKAMA ndabona ko ifungwa rya KARENZI ryatunguye Paul KAGAME.

Ubwongereza : Ihwa ry'umushubi mu rukweto rwambawe na Paul KAGAME

Mbere gato y'uko turebera hamwe intambara igiye kubaho hagati ya Kagame na Karenzi kandi ikongejwe n'Ubwongereza, twabanza kwibutsa bimwe byihutirwa hagati ya Kagame na London(UK).

Perezida Kagame yageze ku butegetsi yego abirwaniye ariko byahawe umugisha na USA hamwe na UK. Kagame yabaye inshuti magara na TONY BLAIR akiri minisitiri w'intebe wa UK na nyuma aho aviriyeho barakomezanya kugeza aya magingo ndetse ni n'umujyanama we.

Ubwongereza bwatunguye Kagame bumukoraho filimu RWANDA'S UNTOLD STORY bimuyobeye afunga BBC abongereza nabo bafunga KARENZI maze Kagame yiyambaza CHERY BLAIR umugore wa mucuti we TONY BLAIR birangira Karenzi asubiye i Kigali.

Impamvu KAGAME ashobora kwirenza KARENZI yaturutse kuri KARENZI ubwe

Mu Ugushyingo 2008 nibwo uwari ushinzwe protocol muri perezidansi Lt. Col. Rose KANYANGE KABUYE yafatiwe mu Budage  yoherezwa mu Bufransa arafungwa ashinjwa ibyaha nk'ibyo Karenzi ashinjwa kurya bari no ku rutonde rumwe bombi rw'abicanyi ruharwa.

Rose KABUYE asubiye i Kigali abazungu bamudohoreye, SHIKAMA dufite amakuru ko KARENZI mu rwego rwo gushyashyariza Roza yabwiye Kagame ko abantu nk'abo bafungwa n'abazungu bakabarekura bagasubira i Kigali ko ntawabizera kuko ataba azi ibyo bavuganye na ba Rugigana. Ni uko Roza yisanze yubikiwe imbehe abura byose mu kanya nk'ako guhumbya.

Karenzi ndatekereza ko atazabona amagambo yo kumvisha Kagame ko we adakwiye gukanirwa urwo yakaniraga abandi na cyane cyane ko uwafunze Karenzi afitanye ibibazo uruhuri na Kagame. Twibuke ko Kagame azi neza ko ubutegetsi azabwamburwa n'umuzungu wabumuhaye binyujijwe ku nshuti ye magara. Ashobora gukeka ko abongereza bahaye akabanga Karenzi ko kuzamubakiza.

Impamvu KARENZI afite ubushobozi bwo kwirenza KAGAME ishingiye ku gihagararo KARENZI afite mu gisirikari n'iperereza mu Rwanda

Nk'uko nari mbivuze mu kanya, Karenzi azi neza ibyabaye kuri Roza KABUYE. Ikindi ni uko Karenzi ageze ku kibuga cy'indege cyitiriwe GREGOIRE KAYIBANDA i Kanombe atahabonye inkundarubyino nk'izagiye kwakira Roza KABUYE(Turashaka Roza wacu). Icya gatatu ni ijambo Kagame yavugiye mu mihigo y'abayobora uturere Karenzi yaraye asesekaye i Kigali.

Muri iryo jambo Kagame yavuze ko gufungura KARENZI bidahagije ko akeneye ibisobanuro by'inyongera. Abo Kagame asaba kuzamuha ibisobanuro muri SHIKAMA ntabwo tubona ari Ubwongereza nk'uko bamwe mwabikeka : Mubazasabwa ibisobanuro harimo na KARENZI ubwe.

Hamwe n'ibi bimenyetso byose, hamwe n'ubuhanga bwa Karenzi mu gupangira abandi akabahanantura, ashobora kubona ko ntaho ari agasanga abongereza baramubambye agafata icyemezo cyo gutanga uwo akeka ko yamushyira aho yashyize abatari bake. Kandi urebye igihagararo cya Karenzi mu ngabo z'u Rwanda byashoboka.

Kagame na Karenzi bashobora kujyana bombi

Kugeza ubu umuntu rukumbi uzi ukuri ku byabaye n'ikigamijwe mu minsi iri imbere ni umuntu umwe gusa : «Lt. Gen. Emmanuel KARENZI KARAKE» ariko muri uku kuba azi uko byamugendekeye ntibyabuza Kagame utagira icyo atinya kumuhitana. Nyamara rero Kagame uhorana amakenga aramutse afashe icyemezo cyo guhitana KARENZI byaba ari mbuze uko ngira kuko yaba azi neza ko nawe ingaruka zamugeraho ako kanya.

Ibi twabigenzurira mu myitwarire ya Kagame n'uko yagiye yikiza ibikomerezwa mu ngabo birimo n'abakoraga muri uyu mwanya KARENZI arimo. Nko kuri KAREGEYA batinye kumwicira i Kigali bamutegerereza mu buhungiro baramukindura. KAYUMBA NYAMWASA bashoboraga kumwicira i Kigali ariko KAGAME agatinya ingaruka byamugiraho kugeza n'ubu rukigeretse.

Kuri KARENZI rero ntabwo Kagame yakwemera ko asohoka mu gihugu ngo ahunge kubera amabanga amubikiye atagira ingano. Ndetse byinshi mu byemezo Kagame yagiye afata bigayitse ijambo rya nyuma yaribwirwaga na Karenzi kandi akaryubahiriza.

Niyo mpamvu muri SHIKAMA tubona ko Kagame aramutse yibeshye gato agafata icyemezo cyo kohereza Karenzi iwabo wa twese nawe yahita amukurikira kuko ingufu KARENZI afite muri RDF zingana ndetse urebye neza wasanga zisumba iza shebuja babanye bagasangira akabisi n'agahiye bagakorana amabi menshi kuva 1990 none imyaka ikaba ibaye 25. TUBITEGE AMASO!!!

UDAHEMUKA Eric

shikamaye.blogspot.no

Shikama ku Kuri na Demukarasi(SKUD)