ABANYARWANDA TWESE DUSHYIRA MU GACIRO DUKWIYE VUBA NA BWANGU KWAMAGANIRA KURE UMUGAMBI WA KAMARAMPAKA YO GUHA PEREZIDA Paul KAGAME MANDA YA 3 IKINYAMAKURU THE NEWTIMES CYAHISHUYE KUWA MBERE, TALIKI 19 MUTARAMA 2015 KUKO IRYO TORA RIRAMUTSE RIBAYE Paul KAGAME NA F.P.R BARYIBA NK'UKO BIBYE AYO MU 2003 NA 2010

Dr. Ntawukuriryayo yirukanywe ku buyobozi bwa Sena ngo atazabangamira umushinga wo kongera Paul Kagame manda

Kuwa mbere, taliki 19 Mutarama 2015 ikinyamakuru THE NEWTIMES cya FPR cyandikirwa i Kigali kigasohoka buri munsi mu cyongereza cyatangaje inkuru cyahawe na Minisiteri y'ubutegetsi bw'igihugu, imiyoborere myiza, amajyambere rusange n'imibereho myiza y'abaturage(MINALOC).

Mu mayeri avanzemo ubwoba hagamijwe guca amarenga no gutera icyumvirizo abazungu kuko aribo bumva icyongereza, uwanditse iyo nkuru yayihaye umutwe ugira uti:"Analysing Rwanda's Presidential term limits" bisobanura mu Kinyarwanda ngo "Isesengura ku irangira rya manda ebyiri za perezida".

Iyo usomye witonze utihuta ibyanditse muri iyo nkuru ndende, uhita ubona ko NINALOC yatangije intambara yo gutegeka abanyarwanda kuzatora YEGO muri KAMARAMPAKA ku itegeko nshinga aho bazaba bashaka ko Kagame yongererwa manda. Twe tuzi uko FPR ikora buriya ibisanduku bizitwa ko bizatorerwamo byamaze kubazwa ndetse ubu n'abazatora bariyizi.

Uko mbona ishingiro ry'uyu mugambi wa FPR na Kagame

Ku giti cyanjye nk'umunyamakuru w'umwuga usesengura politiki y'igihugu cyanjye buri munsi, kuba byatangajwe na THE NEWTIMES ni ikimenyetso ko Kagame n'agatsiko ke bafite ubwoba bwinshi. Kagame yiboneye ibyabereye mu Misiri, Tunisia, Libiya, Burkina Fasso, ejo bundi yitegereje ibirimo kubera ku muturanyi we KABILA i Kinshassa.

Ni ukuvuga ko niba atihenda, Kagame abona ko abanyarwanda nabo bashobora kwigaragambya bakamagana umushinga we wo kwiyongeza manda. Ubusanzwe gutegeka imyaka myinshi si bibi ku mutware mwiza utamena amaraso ariko nta munyarwanda utekereza wakwifuza ko FPR ihamana ubutegetsi mu Rwanda ushingiye ku mahano idasiba gukorera abenegihugu. Niyo mpamvu kongera Kagame manda byaba ari ukwimena inda.

Minisitiri Cheikh Mussa Fazil HARELIMANA agomba kuzabazwa n'amateka amahano arimo akorera abanyarwanda

Mu barimo gushuka Kagame ngo yiyongeze ku isonga hariho umwicanyi ruharwa Minisitiri Cheikh Mussa Fazil HARELIMANA wamaze abantu iwabo mu Biryogo i NYAMIRAMBO nk'uko batasibye kumushinja. Uyu Fazil yabwiriye Kagame mu nteko ku Kimihurura mu 2010 mpibereye mu nama y'igihugu y'umushyikirano ko azamugwa imbere mu gihe abandi bavuga ko bazamugwa inyuma mbese ko aho Kagame azagwa bazapfana. Ejo bundi aha minisitiri Fazil yandikishije inkuru mu IGIHE.COM avuga ko mu ishyaka rye PDI bashaka ko Kagame yiyongeza manda yindi.

Ubuhamya ubwanjye nahagazeho bw'ukuntu Paul KAGAME na FPR bibye itora rya perezida wa repubulika mu 2003 na 2010

Ibyo nandika mbifitiye gihamya kuko ni ibintu niboneye n'amaso yanjye. Mu 2003 nari nkirangiza amashuri yisumbuye maze mpabwa ikiraka cyo kuyobora amatora ya Perezida, Itegeko nshinga n'ay'abadepite muri 2003. Icyo gihe nakoreye kuri Ecole Primaire ya URG mu Kibirigi mu Mujyi wa Gitarama rwagati.

Bucya ngo itora rya perezida ribe, kubera ko bari bazi ko nyoboye ibiro by'itora(site) ahagana saa munani z'ijoro numvise abantu bakomanga aho nari ntuye mu RUVUMERA. Narakinguye mbona ni abantu 4 aribo Lieutenant KATIBU ubu ni maneko wa Kagame i Gitarama, GASHUGI ubu ni demob ariko icyo gihe yari umusirikari, Ruth umukada wa RPF wavukiye Tanzaniya na RUTATIKA Jean de Dieu wavuye i Burundi icyo gihe muri 2003 yari umuyobozi w'amatora muri GITARAMA ariko ubu akuriye iyi komisiyo mu ntara y'amajyaruguru.

Nagiye kubona mbona bafunguye imodoka bakuramo ikarito nini cyane barafungura mbona yuzuyemo impapuro zo gutoreraho zose imbere y'ifoto ya Paul KAGAME hariho igikumwe ko ariwe watowe kandi habura amasaha 5 ngo amatora atangire. Bambwiye ko mbibika, mu gitondo bakaza kuntwara. Saa kumi n'imwe za mugitondo ya modoka yaragarutse itwawe na Lieutenant KATIBU turagenga antegeka gukwirakwiza ayo majwi mu bisanduku 12 kuko aho nari nyoboye hari ibyumba 12 byo gutoreramo.

Muri make nihuse, mbahaye urugero kuri aka kaga nahuye nako ko kwibonera n'amaso yanjye DEMUKARASI itsindwa kugira ngo mbereke ko Kagame wibye amajwi muri 2003 akongera gukora ayo mahano no muri 2010 ko ntacyamubuza kongera kuyiba atorera abaturage bose YEGO : KONGERA KAGAME MANDA.Icyiza ni ukureba uko iyo kamarampaka itaba abafata ibyemezo bakanga ko ibaho kuko iryo tora niriba Kagame azakora ibyo ashaka kuko yabonye ko muri 2003 na 2010 nta wigeze akopfora.

Mu itora rya perezida 2010, Dr. Ntawukuriryayo kandida wa PSD yari agiye kwicwa habura gato

Njyewe mu buzima bwanjye sinjya mbeshya nta n'amanyanga ngira. Niyemeje kurwanya ikibi guhera nkiri muto uhereye no mu Byimana aho nize ayisumbuye naburijemo umugambi wari ugiye gutwika ikigo twigagaho. Ukeneye ibindi bihamya azajye mu nteko ishinga amategeko ku Kimihurura abaze Depite MUKARUGEMA Alphonsine wanyoboraga icyo gihe.

Itora rya perezida muri 2010 bwo ntabwo nari nyoboye icyumba cy'itora nko muri 2003 ahubwo ryo narikurikiranye nk'umunyamakuru. Mpagaze i Nyamirambo ku marembo ya Saint Andre muri metero 3 n'aho Dr. Ntawukuriryayo yari ahagaze, yahamagawe na maneko za Kagame zimusaba ko atangaza ko akuyemo kandidature ye kuko natabikora banwica. Ayo magambo narayiyumviye arabasubiza ngo nimushaka munyice.

Buriya hari ibintu abaturage babona bakayoberwa ibyo aribyo kuko biba bibarenze. Dr. Ntawukuriryayo inkotanyi zamuzengereje kuva cyera ejo bundi zimuhimbira icyaha kitabaho ngo perezida wa sena yanywereye menshi nk'aho akennye ku buryo yabura aye koko! Ibi byose bikorwa kubera ubwoba Kagame aba afite ko abaturage batamukunda.

MINALOC iragereranya FPR n'ibihugu byuje ituze, amahoro, ubwisanzure na demukarasi mu gihe nta mahuriro

Muri iyo nkuru ya MINALOC baravuga ko hashobora kubaho REFRENDUM - KAMARAMPAKA byemejwe n'abadepite n'abasenateri kugira ngo abaturage bemerere cyangwa bangire Kagame indi manda. Muri iyo nkuru barasetsa abantu bavuga ko mu Bwongereza, muri Singapour n'ahandi ntarondoye ngo hashobora kubaho manda zirenze ebyiri.

Ibi nanjye ndabizi, ariko se muri ibyo bihugu muzabaririze mwumve ko hariyo minisitiri w'intebe wishe abasenyeri nka Kagame, muzabaze niba hariyo uwarimbuye impunzi nka KAGAME n'ubu akaba arimo arwanira kongera kwambuka Kongo kurimbura abenegihugu, ko hariho ufunga abajrnerali mu ngabo z'igihugu cye abanje kubapfukamisha bo kubakubita inshyi nk'ukubita ababoyi uretse Paul KAGAME, muri ibyo bihugu iyo utsindiye akazi barakaguha kuko uba werekanye ko ugashoboye. Ariko mu Rwanda siko bimeze.

Abanyarwanda twese kimwe n'umuryango mpuzamahanga dukwiye kwamaganira kure umushinga wa Kagame wo guhindura itegeko nshinga

Kubera inyungu za politiki, muri village Urugwiro barasoma iyi nkuru bakanyita umwanzi w'igihugu nyamara ibyo ndimo nsaba na perezida Kagame bimufitiye inyungu kurusha bose. Turasaba inteko ishinga amategeko y'u Rwanda kugira ubutwari ikanga umushinga urimo guca amarenga.

Turasaba abanyarwanda bose kwamagana uyu mushinga kuko FPR itegetse u Rwanda indi myaka 8 abanyarwanda bakwimanika mu kagozi kuko ari ingoma itagira impuhwe yica itababarira, itarobanura, yikunda, ivangura abenegihugu kandi abanyarwanda barebera ku baturanyi bacu bo muri Kongo Kinshassa ukuntu birunze mu mihanda bakotsa igitutu Kabila akisubiraho no mu Rwanda rero byashoboka kuko akarengane abaturage kabageze aho gateye icyo n'iki.

Turasaba kandi umuryango mpuzamahanga n'ibihugu byose bitera inkunga y'amafaranga Kagame ngo abone amafaranga yo kutwica no tuduhigisha uruhindu ko nabo bakwiye kumwotsa igitutu bakamufungira inkunga banamubuza guhindura itegeko nshinga kuko nibakomeza kumutera inkunga azabona ko nta kibazo bityo babe bateshutse ku ihame bagenderaho rya demukarasi n'imiyoborere myiza.

Icyaruta ni uko KAMARAMPAKA yaburizwamo kuko nibaho, nta kabuza KAGAME na FPR baziba amajwi nk'uko bayibye muri 2003 na 2010

Icyihutirwa ni ugukora ibishoboka byose iryo tora ntiribe kuko niriramuka ribaye Kagame azavuga ko abaturage bose batoye YEGO. Kugira ngo itora ritaba ni ngombwa gutambamira itambutswa ry'uyu mushinga ku Kimihurura mu nteko imitwe yombi. Bizakorwa na nde? Gute? Niyo mpamvu Kagame yirukanye perezida wa sena Dr. Ntawukuriryayo agashyiraho mubyara we MAKUZA Bernard kuko nzi neza ko Ntawukuriryayo ari umugabo utaniganwa ijambo kandi udakorera ku bwoba.

Kagame yafashe abagore abuzuza mu nteko, yongeramo ba Bamporiki benshi cyane ku buryo badashobora kuvuguruza icyemezo icyo aricyo cyose cyafatirwa muri FPR. Mu kuri nta kwitega umusaruro kuri iyi nteko ariyo mpamvu abaturage ku gushyigikirwa n'imiryango mpuzamahanga aritwe dufite urufunguzo rw'ejo hazaza heza hacu. Nimuhaguruke mwange ko FPR ibamaraho kuko mutaremewe kwicishwa udufuni n'imigozi ahubwo twaremwe ngo twese twishimire gutura mu gihugu cyacu, ubuhunzi bucike, ubusumbane n'akarengane biveho.

UDAHEMUKA Eric

shikamaye.blogspot.no

Shikama ku Kuri na Demukarasi(SKUD)