Pageviews all the time

Niba FPR igumye ku butegetsi akavuyo yateye mu burezi kagakomeza, aka mwarimu karaba gashobotse: abarimu bariho bararushaho kwibasirwa n’abanyeshuri bigisha babakubita, babatema cyangwa babaharabika. Iki cyorezo kikaba kiri kuva mu mashuri abanza kugeza no muri Kaminuza/NKUSI Yozefu.

Porofeseri Gasoma JB( imyaka 58) wari wivuganywe n'umunyeshurikazi
 Imana igakinga akaboko

 Umunyarwanda wese kuva mu bwana yigishwa ko agomba kumvira ababyeyi akanabubaha, hagakurikiraho kubaha umuntu wese ukuruta. Hejuru y’aba bose ariko, umwana atozwa kubaha mwarimu we nkuko yubaha umubyeyi we ndetse akanarenza ho. Uko umwana agenda yigira imbere abwirwa ko ngo Ubutegetsi buva ku Mana , bityo kubaha umutegetsi nabyo bikaba ari nk’itegeko. Muri uku kubaha aba bantu nashyize mu byiciro bitandukanye, ubu abasigaye bubahwa ni abategetsi gusa naho ababyeyi na mwarimu ibyabo byajyanye na Repubilika ya Kabiri! Shikama iraguha ingero nkeya zerekeye uburezi aho abarimu basigaye bakubitwa n’abo barera kuva mu mashuri abanza !

Mu kigo cy’amashuri abanza cyo kuri Sainte Famille i Kigali, umwana w’umukobwa wigaga mu mwaka wa gatanu w’amashuri abanza yakubise umwarimukazi imbere y’abandi barimu n’abanyeshuri  mu gitondo cyo kuwa 14/7/2014. Uyu munyeshuri akaba yarakoze aya mahano igihe abanyeshuri bari ku mirongo mu gitondo.Uyu mwarimukazi  wakubiswe akaba yari afite uburambe bw'imyaka icumi ku murimo we. Mbere yo gukubita mwarimu wari umaze iminsi amubaza impamvu yiga kabiri ku munsi abandi biga ikigoroba cyangwa igitondo gusa, yari yabanje no gukubita umwana wa mwarimu amunigishije umupira yari yambaye! Uyu mukobwa yari yarabwiye bagenzi be kenshi ko yanga uwo mwarimu kandi ko azamwumvisha we n’umwana we.

Mu mashuri yisumbuye ho ni agahomamunwa! Shikama yigeze kubagezaho imvo n’imvano y’itwikwa ry ‘urwunge rw’amashuri  rwa Byimana rwibasiwe n’inkongi y’umuriro ubugira gatatu muri 2013. Nkuko Shikama yabibagejejeho, abana b’indobanure b’abasirikare bakuru ba FPR /RDF bari batumwe n’ababyeyi babo ngo batwike maze Leta izabohereze kwiga mu mahanga aho abandi bana b’indobanure biga. Polisi yashatse guhana aba bana by’intangarugero, ihabwa gasopo!

Ubu noneho ibyo abo mu Gatsiko batuma abana gukora birenze itwika kuko abana basigaye bahabwa n’imihoro yo kujya gutema abarimu ! Umunyeshurikazi wo mu ishuri ryisumbuye rya Saint Andre, mu mwaka wa kane wa PBC( ubugenge, ibinyabuzima, n’ubutabire) aherutse gukora agashya ubwo yahabwaga amanota yakoreye mu butabire kuri 18/8/2015 agakoresha uburyo bushoboka bwose ngo yihe amanota ashaka, byananirana agafata icyemezo cyo gushyira umuhoro mu gasakoshi ke akaza agatemera mwarimu muri laboratwari mu gitondo kuri 25/8/2015. Umukobwa aho guhanwa ngo n’abandi barebereho, yajyanywe mu bitaro ngo kuko yahungabanye!

Muri kaminuza iki cyorezo nticyahasize kikaba kiyobowe n’abasirikare n’abapolisi ba FPR/RDF. Nigeze kwandika kuri Shikama ukuntu umunyeshuri umwe aho gutegura igitabo umunyeshuri yandika arangije amasomo  ya kaminuza kugirango abone impamyabumenyi y’icyiciro cya mbere cyangwa cya kabiri cya kaminuza, uyu we yarakugendeye aterura igitabo  cyari cyaranditswe n’undi munyeshuri mu myaka yashize, akuraho igifuniko ashyiraho amazina ye akizana mu gashami k’imbonezamubano nayoboraga muri 2009. Iki gitabo cyahawe umwarimu ngo agikosore ariko bihurirana n’uko uyu mwarimu ari we wari warayoboye n’icyo cy’umwimerere. Uyu munyeshuri yaje kwigaragaza asa n’utera ubwoba abayobozi ba kaminuza; yakoraga muri Minisiteri y’Ububanyi n’amahanga. Naje hutegekwa guha uyu munyeshuri umuyobozi mushya wo kumuyobora ngo yandike igitabo gishya. Ndashima Imana ko navuye mu gihugu ntakoze aya mahano.

Nkaba narigeze no kubageza ho ukuntu umwe mu basirikare ba FPR/RDF wari mu rwego rwa Kapiteni yigeze guca kuri umwe mu bayobozi ba Kaminuza ngahamagarwa ngo nze ntange amanota 2 mu isomo nigishaga ry'ibarurishamibare( statistics) kugirango yimuke. Ibi bintu nahise mbyamaganira kure mpita mpa gasopo umpamagaye kutazongera kungaruraho ibibazo nk’ibyo. Uyu munyeshuri yahise anyoherereza mesaje kuri teleoni yanjye igendanwa yo kuntera ubwoba kugirango njye mu cyaha nanze nkunze. « Ibyo unkoreye Nkusi we, ntiwibagirwe ko uri mu Rwanda»

Urundi rugero natanga rwo muri iyi kaminuza , ni umusirikare wagiye afata umuntu uza kumukorera ikizamini, nawe akaba ahari mu kizamini, ariko uwo umukorera akaba ari we utanga urupapuroo rwanditseho amazina ye. Uko imyaka yagiye ishira indi igataha, uyu musirikare yaje kuvumburwa na bagenzi be babwira umwe mu bayobozi bw’aho yigaga. Haje gushyirwaho itsinda ry’abarimu haza kuvumburwa ko uyu musirikare atigeze yikorera ikizamini na kimwe kuva mu mwaka wa mbere kugeza mu wa kane! Ibi bikaba byaramuviriyemo kwirukanwa! Uyu mwarimu akaba n’umuyobozi byaje kumuviramo guhigwa bukware.

Uruhare rwa Leta y’Agatsiko muri aya mabi akorerwa abarimu n’uburezi
Kuri uyu mukobwa wigaga amashuri abanza , biragaragara ko ava mu BISUBIZO( Agatsiko k’amabandi yitwaje intwaro)kuko uburenganzira bwo kwiga amanywa n’ikigoroba yari yabuhawe n’umuyobozi w’ikigo, ibi bikaba byari binyuranyije n’amategeko abandi banyeshuri bagenderagaho. Umuyobozi w’iki kigo akaba yarakoze aya makosa kandi ntanabimenyeshe abarimu ko ariwe byaturutse ho ngo binumire; nkaba navuze ko uyu mwana yavaga mu bisubizo kuko abarimu bahagaritse akazi, bagasakuza ngo uyu munyeshuri ahanwe ariko bikaba iby’ubusa kugeza igihe ikibazo kigiriye mu itangazamakuru.

Ku byerekeye uyu mukobwa wa Saint Andre, nawe biragaragara ko ari umwana uva ahantu hakomeye kuko mwene Ngofero abuze amanota yakwihata akongera amanota ye naho undi we yaragiye atyaza umuhoro wo kuzakata ijosi rya mwarimu.Kugambirira kwica cyangwa kwica uyu munyeshurikazi yari azi ko bihanwa n’amategeko ariko wenda niba atari n’ababyeyi be bamuhaye uriya muhoro, yari azi ko nta nkurikizi bizagira akurikije igihagararo cy’ababyeyi be muri politike y’igihugu. Icyerekana ko ibi Shikama ivuga ari byo ni uko nta munsi w’ubusa twumva ngo polisi yafunze umunyeshuri woherereje ubutumwa bugufi bagenzi be burimo iterabwoba; nyamara iyi polisi ntacyo twumvise yakoze kuri uriya mukobwa utarateye ubwoba ahubwo wagambiriye kwica kandi akabishyira mu bikorwa!!!! Polisi yahise ishaka inyoroshyacyaha, maze ivuga ko umukobwa yahungabanye ahubwo imujyana kwa muganga aho kumujyana aho berekeza abicanyi nkawe.
Umunyeshurikazi (mu mwaka wa kane)wari wivuganye
 mwarimu kandi yabigambiriye
Ibyambayeho nabyo ni urukozasoni: uriya musoda w’umukapiteni, naje kuvumbura ko mbere y'uko njya kwigisha muri iriya kaminuza, yagiye atera ubwoba  kenshi abarimu ntihagire igikorwa. Iki kibazo nakigejeje mu nama y’ishami ( faculty), nerekana ubutumwa yanditse n’umuyobozi wampamagaye gutanga amanota ariko nahawe urw’amenyo; uyu munyeshuri sinigeze mubona mu matsinda yakurikiyeho nigishije iri somo, umenya yaratsinze uko yabishakaga binyuze mu zindi nzira! Icyo nabwiye abanyumvaga n’ubutumwa nabahaye ngo bamushyikirize ni uko nta muntu n’umwe uzantera ubwoba anyumvisha ko ari umunyarwanda kundusha. Aba basirikare n’aba bapolisi ubundi hafi ya bose baba ari abakozi ba cya kigo cya Jack Nziza gishinzwe kwica abanyarwanda cyitwa DMI.

Iby’uyu munyeshuri wo muri MINAFFET nibyo bisobanura neza ko Leta ifite akaboko muri aya marorerwa akorerwa abarimu. Nkimara kubona ariya mahano nahise nshyikiriza ikibazo ubuyobozi bw’ishami n’umuyobozi mukuru wa kaminuza ushinzwe amasomo, bita mu gifransa Vice Recteur Academique(VRAC). Njyewe, nasabaga ko uyu munyeshuri yirukanwa burundu muri kaminuza nkuru y’u Rwanda. Habaye inama ya mbere y'abayobozi b'udushami(Departments)iyobowe na VRAC, wari umwongereza, n’ushinzwe ireme ry’integanyanyigisho nawe wari umwongereza, numvishwa ko igihano naka gikarishye. 

Ku nshuro ya kabiri naje kongera gutumirwa mu nama imeze nkayo iyobowe na VRAC numvishwa ko ngo uyu mugabo yababarirwa kuko ari ubwa mbere yibye, nabajije niba ari ko n’iwabo babikora yirebera hirya araseka! Ariko naje gutegekwa kujya gushaka umwarimu mushya wo kuyobora uyu mukozi wa MINAFFET, waje kunyiyemera ho uwo munsi aje kureba niba namuboneye umuyobozi mushya, ko kuba umwarimu ari ukuba imburamukoro. Ati:" Ariko ko uri Dogiteri, kuki udashaka akazi, uzi ko umushahara mpembwa ntararangiza kaminuza uruta uwawe kure!".  Ndashima Imana ishobora byose kubona yaramfashije kuva mu Rwanda ntarashyira mu bikorwa ibyo VRAC yashakaga na DMI.

Naho uyu musirikare wakorerwaga ibizamini kuva mu wa mbere kugeza mu wa kane, umunsi afatirwaho,  akimara kwirukanwa yagiye aharabika abamufashe ko ngo basambanya abanyeshurikazai bakabaha amanota, ariko kandi yohereza n’ubutumwa burimo iterabwoba busa na buriya  nohererezwaga na kapiteni w’inka. DMI yaje kwivanga muri iki kibazo ngo aba bantu bafungwe ariko polisi ikora iperereza ryimbitse isanga barengana ahubwo harimo ikintu kimeze nk’itiku . Kuba aba bataratawe muri yombi nkuko DMI yabyifuzaga ni uko bose bari ABATUTSI, iyo baba abahutu ubu baba bawunera nkuko Me Bernard Ntaganda, Madame Vigitoriya Ingabire, Dg Niyitegeka , Ntakirutinka n’abandi bahutu benshi bafunzwe bazira ko ari abahutu gusa.

Muri aka kavuyo kose FPR yateye mu burezi, abantu bakaba barangiza kaminuza batazi gusoma no kwandika, noneho bikaba bigeze aho abarimuu bicwa nk’inshishi , ntitwabura kurangiza tuvuga ko ibyo Leta yise guha agaciro umugore nabyo biri mu bizambije uburezi bikaba bigeze aho igitsinagore ugisanga muri aya mahano.Urugero ni uyu mukobwa wo muri Saint Andre, bagenzi be bafatanye umuhoro ashaka konogonora mwarimu, bamumukiza ati: " yari agiye kumfata ku ngufu!".Ibi akaba yarabivuze kuko azi ko ari yo ntero ya FPR! Aba bakozi ba DMI nabo nta kindi cyaha babonye bashinja ababafashe usibye kubaharabika bavuga ko bakora injyanishabitsina n’abanyeshurikazi bakabaha amanota, ibi byose bikaba bitesha agaciro igitsinagore mu Rwanda muri rusange; ibi bakaba barabikoze nanone kuko bazi ko ari yo ntero ya FPR.

Nta muntu ukora akazi kavunanye nka ka mwarimu mu gihugu icyo ari cyo cyose. Arategura, akigisha, agakurikirana abo yigisha, agasuzuma imikoro n'ibizamini, agakora ubushakashatsi, n’ibindi. Ibi byose bituma mwarimu akora ubutaruhuka  ku buryo aba ari mu kazi ku ishuri, mu rugo naho akaba ari ku kazi, ku buryo nta gihe abona cyo kiyitaho no kwita ku muryango we. Ikibabaje ni uko mu Rwanda, mwarimu uyu ari we uhembwa intica ntikize!Urugero rutari kure ni uko umuntu utarize ayisumbuye ufotora mu Rugwiro kwa Kagame Pawulo ahembwa miliyoni ebyiri z’amanyarwanda(2,000,000FRW) mwarimu warangije kaminuza gahembwa ibihumbi mirongo itandatu(60,000FRW), abarimu ibi bakaba barabifashe nka ya mvugo ngo AKAJE KAREMERWA. Sinzi niba noneho bazanemera ko bigisha bakatwa amajosi n’abana b’Agatsiko cyangwa bakubitirwa imbere y’abo barera. Igihe ni iki cyo gusaba ko Leta yikubita agashyi igaha umwarimu agaciro, kuko ejo hashobora kuzaba ari kera.

Ngo abwirwa benshi akumva bene yo!

urutonde rw'amagambo:
injyanishabitsina:  iri ni jambo ry'urusobe rigizwe n'amagambo abiri: Injyana n'ibitsina; tukaba dutekereza ko rifite igisobanuro cyimbitse kandi rikaba ari na rigufi kurusha irindi ubu rikoreshwa mu Rwanda: "imibonano mpuzabitsina

Dg NKUSI Yozefu
shikamaye.blogspot.no
Shikama ku Kuri na Demukarasi(SKUD)

No comments:

Post a Comment

Muvandimwe, nshuti ya SHIKAMA, turagushimira cyane umuganda utanga wo kubaka URWANDA rushya ubinyujije mu bitekerezo byawe( Komanteri). Kugirango turwanye urukungu rw'Agatsiko ni ngombwa ko buri komanteri ibanza gusuzumwa. Yohereze, irahita ijya ku rubuga mu minota mike niba idatandukira( kuvuga ibitajyanye n'inyandiko), itukana, cyangwa yuzuyemo uburere buke.

Wipfusha komanteri yawe ubusa ukoresha "ANONYMOUS", himba izina urikomeze kuko hari ibihembo mu Kuboza 2016 ku bantu 3 bazaba babaye indashyikirwa mu gutanga ibitekerezo. Dukomeje kubashimira ubwitange n'umurava muhorana. IMANA Y'I RWANDA ihorane namwe iminsi yose.

Dg NKUSI Yozefu
www.shikamaye.blogspot.com
Uharanire ko Ukuri gusimbura ikinyoma.
Email: mahoriwacu@gmail.com; tel: +4745564355