Rwanda.ISESENGURA-MVUGO NA POLITIKI : Kubwa Komisiyo « Mudidi » y’ubukungu mu mutwe w’Abadepite mu Nteko Ishinga amategeko y’u Rwanda ku KIMIHURURA; «Ngo kuba isukari ihenda cyane mu Rwanda si ikibazo cyane kuko uruganda ruyikora rwa KABUYE rwatanze umusanzu ugaragara wa za miliyoni z’amafaranga muri cya Kigega AGACIRO-RUNYUNYUZI kigiye kumaramo umwuka abanyarwanda !!!»

Muri SHIKAMA turakomeza kubasuhuza no kubifuriza amahoro aho muri hose. Turabibutsa kandi ko duherutse kwibaruka IHURIRO SHIKAMA KU KURI NA DEMUKARASI  ariryo muzajya mubona ryitwa SKUD mu magambo ahinnye. Mu minsi mike cyane turabagezaho gahunda y’ibikorwa (Plan d’Action) tubona byihutirwa tuzafatanya namwe kugeraho kandi birashoboka cyane dushyize hamwe kugira ngo ibintu bihinduke mu Rwanda tunyuze mu nzira itavusha amaraso.

Emmanuel(soma Emanweli) MUDIDI

Iyi Demukarasi tuvuga ni nayo ishingirwaho mu kugena abayobora rubanda kuko batorwa mu bandi. Abajya bavuga ko ubutegetsi buvukanwa barabeshya ahubwo umuyobozi w’abantu atorwa muri rubanda kandi akemera kubakorera atabaryarya kuko iyo ababeshye aba asuzuguje igihango yagiranye na bo.

Aya matora niyo nzira nziza abagereki babonaga ishobora kugeza abaturage ku majyambere arambye kandi asangiwe na bose. Ibi byavuzwe kandi bisesengurwa mu gihe cya ba PLATON, ARISTOTE, SOCRATE ndetse no mu gihe cya ba VOLTAIRE.

Mu nama VOLTAIRE yatanze kugira ngo abantu babashe kuyobora abandi, yasobanuye ko hari ibintu bine umuyobozi wese agomba kwirinda kugira ngo ayobore neza rubanda yisunze Demukarasi.  Ibyo bintu bine umuyobozi wese n’ushobora kuzaba umuyobozi agomba kwirinda ni :

Guta umwanya, Gukora icyo utagombaga gukora, Gukora icyo wagombaga gukora ariko ukagikora imburagihe no Gukora icyo wagombaga gukora ariko ukagikora nabi.

Ibi bintu uko ari bine ni ngombwa kwitabwaho ndetse no kubyitwararika cyane cyane ku bayobozi. Muri SHIKAMA, ntabwo duhora tunenga ibyo FPR idatunganya gusa ahubwo dufata n’umwanya wacu tugasesengura n’ibivugwa n’ibikorwa ariko dutanga n’inama n’inyigisho zakwifashishwa ngo tubashe kubisohokamo kuko ibibazo by' igihugu bisumbye kure FPR Inkotanyi.

Inteko ishinga amategeko ku Kimihurura nk’impumyi irandase rubanda ibona!!!

Ubutegetsi bwo mu Rwanda bushobora kurwaza umuntu umutwe ahanini bitewe n’amagambo abategetsi b’i Kigali birirwa bavuga. Impamvu ariko bayavuga nabo sibo ahubwo ni uko FPR na KAGAME baba baramaze kuboza no kubakoropa mu mitwe yabo bityo bakumva kuvuga ibyo bishakiye nta nkurikizi byabagiraho.

Impamvu mvuze ko abadepite n’abasenateri bo mu Rwanda ari impumyi zirandase rubanda ibona ni uko abadepite n’abasenateri ibyo bavuga mu mbwirwaruhame zabo abaturage bahita bumva ko atari byo na gato. Iyo rero bigenze bityo, niho muri SHIKAMA twemeza ko biba bikwiye ko uwari urandaswe n’impumyi kandi areba ahubwo aba akwiye guterura iyo mpumyi akaba ariwe uyiyobora akayigeza kuri Demukarasi.

Ikibazo twakwibaza : Kuki abanyarwanda bemera kurandatwa n’impumyi kandi bo bazirusha kubona ? Ese bishoboka bite gufata umuntu w’impumyi muri Demukarasi ukamutegeka gushorera rubanda rureba neza ko arujyanye mu manga ?

Ese bizakomeza kumera gutya ugeza ryari? Ese abadepite b’u Rwanda bazi amagambo umuyobozi agomba kubwira abaturage n’ayo atemerewe kubabwira? Ese abadepite b’u Rwanda bazi agaciro k’umuturage n’uburemere bwako? Nawe wakongeraho ibibazo byawe bijyanye n’ibi tuvuze aha.

Komisiyo MUDIDI ejo yakoze ishyano kuri Televiziyo y’u Rwanda

Tubanze twibutse ko mu miterere y’inteko Ishinga amategeko y’u Rwanda umutwe w’Abadepite harimo amakomisiyo. Aya makomisiyo niyo asuzuma amadosiye ayareba bashingiye ku rwego rw’ikibazo runaka noneho imyanzuro Komisiyo ibonye ikayishyikiriza umutwe wose w’abadepite mu nteko yabo isanzwe cyangwa idasanzwe biterwa n’ibyihutirwa.

Perezida w’umutwe w’abadepite niwe ugena ingengabihe y’inteko n’uko zizaterana ndetse n’uburyo buzakurikizwa mu gutondeka isuzuma-bibazo n’imishinga y’amategeko iba yasuzumiwe mu makomisiyo arebana nayo kurusha andi.

Kuwa gatanu, ku italiki 07 Gashyantare 2014, Komisiyo y’ubukungu mu nteko ishinga maategeko Umutwe w’Abadepite mu Rwanda ikuriwe na Depite MUDIDI Emmanuel yasuye uruganda rukora isukari ruherereye i Kabuye mu Mujyi wa Kigali k muhanda ujya i Byumba.

Uru ruganda rweguriwe umushoramari witwa MADIVAN ukomoka mu Buhinde, twigeze kubandikira kuri uru rubuga rwanyu SHIKAMA muknda muri benshi tugaragaza ukuntu FPR yarumweguriye ikamuha n’uburenganzira bwo kuzagurisha isukari abanyarwanda ku giciro cyose ashaka bitewe n’uko FPR ikiri mu ishyamba yajyaga abaha ibibatunga ku rugamba.

Iyi Komisiyo Mudidi ijya muri uru ruganda ngo yari igiye kureba ibibazo biriyo. Mu kiganiro bagiranye n’izo ntumwa, ubuyobozi bw’urwo ruganda bwasobanuye ko imashini zabo zifite ubushobozi bwo gukora toni ibihumbi makumabiri z’isukari ku mwaka ariko kubera ubucye bw’bisheke byera ku butaka bw’u Rwanda ku mwaka rukora isukari toni ibihumbi icumi gusa.

Depite:Marie Claire Ingabire, Francis K. , n'abandi( hari muri 2009)
Aha, abadepite bariho batora

Abayobozi b’uru ruganda basobanuye ko ubucye bw’ibisheke byera mu gishanga cya Nyabarongo aribwo butuma igiciro cy’isukari ku kilo kimwe kiri hejuru cyane ku isoko ryo mu Rwanda. Ibi rero bifite ibisobanuro byumvikana mu icungamutungo n’ibaruramari. Ikibitera ni uko izo mashini zikora isukari ziba zirimo gusaza.

Uko gusaza kw’izo mashingi rero kuba vuba cyane iyo zikora akazi gacye kuruta ko zaba zikora ibingana n’ubushobozi bwazo. Ibi bisobanuye ko umuguzi ari we UMUTURAGE NYAKUGORWA ariwe ugomba kwishyura ikiguzi, ubwisazure bw’izo mashini (Amortissement/Amortization), no kuzikanika byose binyujijwe mu giciro cy’isukari iba yakozwe.

Umwe mu badepite wari kumwe na Mudidi yafashe ijambo kuri televisiyo maze agira ati : « Kuba isukari ihenda cyane mu Rwanda si ikibazo; cyane cyane ko uru ruganda ruyikora rwa Kabuye rwubatse ibyumba by’amashuri abanza muri uyu Murenge rugatanga n’umusanzu ugaragara wa za Miliyoni  mu Kigega Agaciro Development Fund!!!» Ni akumiro koko!!! Ngaho namwe nimunyumvire iri jambo rya Depite ngo watowe n’abaturage kugira ngo ajye kubashingira amategeko ku Kimihurura.

Iturufu ya FPR yo guha amakomisiyo akomeye abadepite b’abaswa cyane!!!

Ikintu kindwaza umutwe kikantera n’agahinda ahari ntateze kuzashira ni ukubona ibintu byose bipfa ku kagambane kandi kateguwe na FPR. Muri 1994, FPR igera ku butegetsi ngo yari yarateguye amayeri ibihumbi n’ibihumbagiza izakoresha mu kuroha abanyarwanda ngo irabayobora.

Mu gusesengura iy mvugo y’uyu mudepite intumwa ya rubanda, tugiye kwifashisha ububasha bwa Depite n’uko bugenwa n’amategeko muri Repubulika y’u Rwanda. Iyo Depite avuze ijambo agatanga igitekerezo aba agitanze ku giti cye ariko ku nyungu za rubanda n’imbaga-nyarwanda yose nta n’umwe uvuyemo.

Iyo depite ageze mu nteko ishinga amategeko ntabwo aba agihagarariye inyungu z’umutwe wa politiki runaka wamutanzeho umukandida. Ikindi ni uko nta mudepite ushobora gukurikiranwa ku magambo yavuze cyangwa ku gitekerezo yatangiye muri komisiyo cyangwa mu nteko rusange y’abadepite. Bigenda gutya no ku Basenateri.

Amategeko akoze neza cyane ku buryo umuntu asigara yibaza aho bipfira akumirwa. Ni iki gituma abadepite n’abasenateri bo mu Rwanda bahorana icyoba no guteshaguzwa mu magambo bavuga? Igisubizo nakibabwiye ni ya mayeri ibihumbi n’ibihumbagiza FPR yagennye yo guha imyanya ikomeye abaswa cyane naho umuhanga utinyuka ikamutegeka kudakopfora byaba ngombwa akajya guhinga igihingwa kimwe epfo iyongiyo.

Kuba isukari ihenda si ikibazo…!

Twibaze : Iyi mvugo y’uyu mudepite yayivuze ku giti cye cyangwa bamutumye nako bamutegetse kuyivuga? Ntekereza ko n’uwaba atarageze mu muryango w’ishuri atatinyuka kuvuga iri jambo imbere ya Televisiyo y’igihugu irebwa n’abanyarwanda benshi.

Kubw’uyu mudepite isukari guhenda ntacyo bitwaye, nta cyo bivuze kuko ahembwa menshi kandi akaba atabura ayo kuyigura kuko we ajya muri SIMBA SUPER MARKET cyangwa NAKUMATT akagura iyitwa EQUINOX ikilo kimwe kigura 2,500 Rwf. Ubugira kabiri kuba isukari ihenda si ikibazo kuko abana be batazabura iyo banywa kubera ko iyo agiye guhembwa ajyana umufuka w’ishanda.

Ku bw’uyu mudepite, kuba ibisheke byo mu gishanga cya Nyabugogo birengerwa n’amazi bigatuma ibisarurwa biba bikeya n’isukari ikaba nkeya ntacyo bivuze kuri we kuko abana be badateze amaramuko muri iki gishanga we na bene we / wabo bageze iyo bajya!!

Ku bw’uyu mudepite, FPR yamaze kumwoza mu gihanga ku buryo asigaranyemo gusa ijambo IKIGEGA twebwe muri SHIKAMA twita RUNYUNYUSI IGIYE GUHEZA BENE KANYARWANDA UMWUKA. Mbega umudepite Nyagasani mana waremye isi n’ijuru!!! Naragenze ndabona nka wa musazi ati: ”Naragenze ndabona nageze i Gisari na Kibanda!!!”

Ku bw’uyu mudepite nako ngo ni intumwa ya rubanda, Leta ishobora kugena ibiciro byose ishatse niyo byahenda bihotora abaturage we ntacyo bimubwiye kuko bamutegetse ibyo avuga kandi ntihagire umukurikirana.

Ku bw’iyi mvugo y’uyu mudepite, nta kosa ririmo gushinyagurira abanyarwanda abakina ku mubyimba yishimira ko ibiciro bibahenda ku sukari we bimunejeje. Mbega umudepite!!! Nose se ubundi ko kuvuga ari ugutaruka, Komisiyo Mudidi yari jyanywe i Kabuye no gushimagiza Ikigega AGACIRO twe muri SHIKAMA twabatije RUNYUNYUZI?

Ku bw’uyu mudepite, Komisiyo y’ubukungu ahagarariye cyangwa abarizwamo, nta muturage ivuganira ahubwo ikwiye kwamamaza ibirebana n’ikigega RUNYUNYUZI kuko nawe bazamuha kuyo bamaze kwiba abanyarwanda barundamo!!!

Ariko seuyu Mudepite aho ntiyaba yaravuye i Bugande? Nkureikije ibibazo n’akaga twagiyemo guhera muri 1994, ndatekereza ko nta muntu wari mu Rwanda muri 1994 wavuga atya rwose. Aho yavuye ntuhandeba hato bitangusha mu mutego wo kuvangura amoko dore ko abanyarwanda benshi barwaye indwara y’ivanguramoko.

Depite ukuriye abandi Mukabalisa D.( ibumoso), Uwimanimpaye J.DA(hejuru),
Mukama A. ( iburyo). Bararahira kutazahemukira FPR na Kagame

Ku bw’iyi ntumwa ya rubanda, ubukungu bw’u Rwanda burangirira ku gutunda bamena mu Kigega RUNYUNYUZI naho ibindi byose abaturage bazirwariza uwo bizananira aziyahure muri Nyabarongo ya mazi yo mu rufunzo twavugaga arengera bya bisheke isukari igahenda nawe azamutware niko abyumva rwose!!!

Uyu mudepite usesenguye iyi mvugo ye neza, ashobora kuba afite igikomere cyamuteye kwanga abanyarwanda bose nawe atiretse kuko nta muntu muzima watinyuka kubwira abenegihugu akaminuramuhini kangana gatya. Umva nanjye ngo ndanjwa!!! Yunze mu ryo Kagame yavugiye mu Mashengesho muri SERENA ejo bundi aha ngaha le taliki 05 Mutarama 2014

Muri SHIKAMA nk’uko twiyemeje Guharanira ko UKURI gusimbura IKINYOMA mu Rwanda uhereye mu Rugwiro ukagera mu rugo rw’umunyarwanda usanzwe nyarucari, turasaba ko uyu mudepte yagabanyirizwa umushahara kuko ushobora kuba ariwo umutera kurengwa byibagiza gukinga akagera n’aho akina ku mubyimba abana b’u Rwanda bahindutse imigata kubera inzara.

Uyu mudepite akwiye kwegura cyangwa akeguzwa ku ngufu za Leta

Depite Emmanuel MUDIDI uyobora iyi Komisiyo y’Abadepite ishinzwe ubukungu, akaba yaravuye i Bugande, akaba azwiho n’udushya twinshi muri Politiki y’u Rwanda kuko ariwe munyarwanda wa mbere mu mateka y’u Rwanda wayoboye Kaminuza ya K .I. E afite amashuri macye cyane maze akabivanga ibi bitavugwa,

Turamusaba ko yakoresha ubushobozi afite mu kuyobora Komisiyo y’ubukungu maze agasabira uyu Mudepite kweguzwa akava ku Kimihurura intebe ye bakayihera umuntu wishwe n’inzara uzi agaciro k’isukari mu muryango nyarwanda n’uburyo ibiciro bihenda bivuna abaturage.

SHIKAMA turatanga inama itari akana

Hari ibintu bigomba kumvikana no gusobanuka muri Politiki : Nta mudepite ushobora kuzizwa ko atafashe ijambo. Ariko na none aho kugira ngo umudepite avuge imvugo-nshinyaguzi nk’iyi yuzuyemo ubuswa, ubugoryi no kwishongora, birutwa n’uko yakwicecekera rwose.

Ikindi nk’uko twabisabye, na kera na kare kuyobora birigwa ntabwo umuntu abyuka ngo bamugire Minisitiri. Iyi ni nayo mpamvu mu Rwanda ibintu byose byapfapfanye kuko nta kubahiriza amategeko mpuzamahanga agenga uko rubanda iyoborwa.

Mu Rwanda rwa Kagame uje akora ibye kandi akabikora uko abyumva nta no kwikanga ingaruka bizamugiraho : Abajenerali batazi kwandika no gusoma, abameya bibera mu biro, Abaminisitiri batazi kuvuga ikinyarwanda (Dr Agnes Bingwaho MINISANTE, Frof Dr Silas Rwakabamba MININFRA. Mbega RWANDA we!!!

Mu gusoza iyi nyandiko iteye agahinda, n’ubwo tuzi neza ko SHIKAMA mu Rwanda ifunzwe ariko ikaba isomwa kubera ikoranabuhanga ryacu unyuze muri www.google.com ukandikamo ANONYMOUSE ugakanda kw’ibendera ry’Ubwongereza ugakomeza, ukandikamo www.shikamaye.blogspot.no ugakanda kuri Surf anonymously,

Tuzi neza ko inzego z’iperereza zo mu biro kwa Muzehe Kijyana Paul KAGAME zihita zibisoma tukimara kubishyira kuri uru rubuga rwacu SHIKAMA. Kubera iyi mpamvu, turasaba izi nzego z’iperereza zishinzwe gusoma no kujora ibyanditse ku mbuga bo bita ko zirwanya Leta ya Kigali, kubwira MUDIDI agasaba uwo mudepite kwandika yegura.

Ibyo gusaba imbabazi abanyarwnda byo ntiyabitinyuks kuko yababaza impamvu Kagame we atazisabye ku byo yavugiye muri Kigali Serena Hotel we akaba asabwa kuzaka kandi avuze byoroheje ugereranije n’ibyo Nyir’igitinyiro mu Rwanda hose Paul KAGAME yavuze. Kandi uyu Mudepite yabatsinda bamushoye mu rubanza mu rukiko!!!

Abadepite n’abasenateri mwese ku KIMIHURURA, muri SHIKAMA turabatashya. Mukomere bavandimwe!!!

GATENDO A.

Shikama ye

_________________________________________________________________________

PS/ NKUSI Yozefu

Gatendo, uzaseka uruhe ku ngoma ya Kagame!

IYI nkuru ya GATENDO inyibukije tumwe mu dutendo tw'izi ntumwa za Kagame

1. Rimwe nigeze guhura n'umwarimu wigisha muri KIE,turayaga, ambwira ibya KIE mubwira ibya NUR(UNR), we rero icyo yatsimbarayeho nkibuka ni uko yambwiraga ko hari umugabo witwa MUDIDI wagize KIE uko ibintu bimeze uku. Ati burya izina niryo muntu, byose yabigize umudidi(inzoga ibishye, akenshi babivuga ku marwa yabishye aho gushya ngo arure, aba nk'igikoma cy'umweru kirenduka ku rurimi)! Nti ese ubu ari hehe?( niyo nari nkigera mu Rwanda muri 2007 nyuma y'imyaka 22 nari maze muri Libya, ntazi ibyo ku Kimihurura).Ati Kagame yamujyanye ahamukwiye; nti ni hehe se ? Ati yamugize umudepite!!!

Nta gihe cyashize, mpura n'umwe mu badepite mubaza uko bakora, muririra ko twe abarimu akazi kaduhitanye kandi duhembwa ubusa, yarandebye araseka. Ati twebwe, iyo utari muri komisiyo isobanurira inteko ibyo iriho ikora, ushobora kuza mu nteko ukisinzirira cyangwa ugafata roman ukisomera!!! Nahise numva ibyo uyu mwarimu wo muri KIE yavugaga!

2. HONORABLE( Nyakubahwa)

Kubera ibanga ry'akazi simbabwira ibibazo abarimu ba Kaminuza bahura nabyo biterwa  n'abadepite bigisha bamwe muri izi ntumwa, zibakuba umushahara inshuro10 zirwanira ko impapuro zabo zose zandikwaho HONORABLE( Nyakubahwa), ibi bikaba ari ukugirango urubona wese ahite yibwiriza ku manota n'izindi serivise. Ndasaba Kagame ko ibi bintu yabica bidatinze kuko iri ni iterabwoba rikorerwa abarimu, n'abayobozi ba za Kaminuza n'aba bantu ntabonera inyito. Mvuze ibyambayeho hano ntawazongera gusuhuza umwe muribo!

3. None se Gatendo, umudepite nka MUDIDI usa n'uwatangiranye n'iriya nteko, fata umushahara we wa buri kwezi urenga miliyoni ukube n'imyaka irenga 15 amaze ku Kimihurura, urumva niyo washyira ikilo cy'isukari kuri 100,000FRW( ibihumbi ijana ) yazamenya ko ihenda koko?

4. Nkurikije inyandiko ya Gatendo, ni ukuvuga ko kiriya kigega bise AGACIRO,( kitagira ugicunga, uwo giha raporo,aho kibarizwa, kitagira imishinga izwi) uzajya akijugunyira mu kanwa wese azajya yica agakiza mu Rwanda nkuko bimeze kuri uyu muhinde Madivani.

5. Ntibibatangaze mubonye uriya mudepite wavuze biriya ejo abaye minisitiri w'intebe. Muti ese kuki? Uriho abatavuga rumwe na Kagame baramuhigira kubura hasi no hejuru( reba ijambo rya Dr Rudasingwa Theogene, ku ijwi ry'Itahuka umunsi bashyingura Nyakwigendera Koloneli Karegeya P.) yaravuze ati:" Kiriya gishushanyo ngo ni Minisitri w'intebe mukihorere kizabona"! Nyamara Kagame nawe yari amaze iminsi amunengeye muri SERENA Hotel muri ya masengesho yabahagamo Gahunda y'abo yishe n'abo agiye kwica. Kagame yaravuze ati: " Mperutse gusoma, kuri Twitter ibyo abayobozi bamwe bavuga ku rupfu rwa Karegeya. Minisitiri w'intebe aravuga ko uzahemukira abanyarwanda atazagira amahoro. Bati nimwe mwamwishe. Ngo hoya , reka sitwe rwose.Njyewe Kagame ndibaza: Kuki atarimwe? Mwagombaga kuba mubikora!"

Uyu mudepite rero urabona ko yujuje ibyangombwa by'abayobozi Kagame ashaka ko bafatanya guhotora abanyarwanda: kwica rubanda ukanabyigamba ku mugaragaro!

6. Ese intumwa za rubanda zagombaga kuba i Kigali, cyangwa kubana n'abo zita ko zihagarariye ngo zimenye ibibazo byabo?

                                          GENDA RWANDA URI UWO GUSABIRWA