Nk'uko byemezwa na BUCUMI Denyse(Madamu wa perezida Petero NKURUNZIZA); Lt. Gen. Adolphe NSHIMIRIMANA amaze gutangaza ko agiye kwica Perezida NKURUNZIZA bigahura n'ubuhanuzi bwa Damascene wemeje ko hazabanza gupfa Adolphe hagakurikiraho Nyiricubahiro Petero NKURUNZIZA/ UDAHEMUKA Eric

Nkurunziza Petero Arashaka manda ya gatatu ngo akomeze iri terambere
 yagejeje ku Barundi!

Uwitwa Lt. Gen. Adolphe NSHIMIRIMANA abatuye umujyi wa Bujumbura bahimba HITLER kubera ubugome bwe burenze urugero muri aka kanya amaze gutangaza ko agiye kwica Perezida Petero NKURUNZIZA. Icyo amuziza nta kindi uretse ko ngo yaba yitegura gutangaza ko ataziyamamariza manda ya 3 mu gihe Adolphe NSHIMIRIMANA we yarahiriye ko NKURUNZIZA agomba kwiyamamariza manda ya gatatu.

Ikibazo cyatangiye umunsi Nkurunziza na Adolphe bumvikana ku ishingwa ry'imbonerakure

Mu ishingwa ry'imbonerakure, NKURUNZIZA na NSHIMIRIMANA babyumvikanyeho ku buryo buhagije, banemeranwa ko uyu mutwe wiswe IMBONERAKURE witwara nk'interahamwe uzabafasha guhatira rubanda gutora Nkurunziza agatsinda amatora muri manda ya gatatu.

Iyi ni nayo mpamvu vuba aha Adolphe Nshimirimana yari aherutse gutangaza ko azakora ibishoboka byose byaba na ngombwa amaraso ye akameneka ariko NKURUNZIZA agakomeza kuba perezida w'u Burundi. Ibi mu by'ukuri nta wavuga ko yabitangaje ahubutse cyangwa abikuye ku busa kuko ahubwo yibukaga neza ibyo yavuganye na Nkurunziza.

Madamu Denyse BUCUMI aremeza ko Lt. Gen. Adolphe Nshimirimana agiye kwica umugabo we perezida Petero NKURUNZIZA

Mu kiganiro ikinyamakuru BUJANEWS.WORDPRESS.COM cyemeza ko cyagiranye na Madamu BUCUMI Denyse NKURUNZIZA kuri telefoni kandi uyu mugore akaba ariwe wari ubahamagaye, iki kinyamakuru cyemeje aya makuru kiranayatangaza kuri icyi cyumweru, taliki 22 Werurwe 2015.

Muri ubwo butumwa yatanze kandi akanasaba ko butangazwa, umupfasoni Denyse BUCUMI NKURUNZIZA, yagize ati:«Generali Dorofu yiyemeje kugandagura Nyenicubahiro kubera ahejeje kwanka gusubira kwitoza. Ndabasavye mubwire abari ku mutwe wibiganiro vyabereye i Roma(Ubutaliyani) yuko umuryango wanje ukeneye ko muwukingira nk'uko bavyemeranije. Ntimumfate nkikijuju ndazi ko patron wanyu ariwe ari ku mutwe w'uyo muhari kuko Mutama yakoresheje telefone yanje kugira bavugane. Naho yari numero masqué(nimero itagaragara)… ijwi ryoryo ndarizi. Shaka muvyandike kuko ibintu bimeze nabi cane ngaha kandi na Mutama(perezida NKURUNZIZA Petero) yaburaniwe!»

Madamu Denyse BUCUMI yahishuye bwa mbere ko Nkurunziza atazongera kwiyamamariza umwanya wa Perezida wa repubulika

Muri iryo tangazo ritunguranye yanyujije mu kinyamakuru, Madamu BUCUMI biraboneka ko yahishuye ko NKURUNZIZA yahisemo kutazongera kwiyamamaza. Ibi niba ari ukuri kuzuye, abarundi bari bakwiye kubyishimira kuko ubutegetsi bwaba bugiye gusimburana mu mahoro noneho hagasigara harebwa uko icyo kibazo cya Lt. Gen. Adolphe NSHIMIRIMANA nacyo cyarangizwa mu mahoro.

Ibi ariko na none ntabwo biramutse ari byo byaba bivuye ku busa! NKURUNZIZA amaze iminsi yotswa igitutu n'abantu bo mu nzego zitandukanye baba abarundi bibumbiye mu mashyaka ya politiki, imiryango yo muri sosiyete sivili, abanyamahanga,... Ku buryo ku giti cyanjye mbona niba ataranabyitangariza, NKURUNZIZA nta yandi mahitamo asigaranye uretse kubererekera abandi.

Ubuhanuzi bwa Damascene wemeje ko i Burundi hazabanza gupfa Lt. Gen. Adolphe NSHIMIRIMANA hagakurikiraho Nyiricubahiro Petero NKURUNZIZA ubanza bugana ku kuri kwambaye ubusa

Mu buhanuzi butabarika buvuga ku kaga gategerejwe mu karere k'ibiyaga bigari, ubuheruka ni ubw'uwitwa Damascene. Ubu buhanuzi bwatangajwe bwa mbere na RADIYO IMPALA, bwongera gutangazwa na IKAZE IWACU na SHIKAMA tubuvugaho. Uwavuze ko yahawe n'Imana ubu buhanuzi yabanje guterwa ubwoba nyuma aza gufungirwa i Bujumbura.

Damascene yavuzemo byinshi bireba u Burundi, Rwanda, RD Kongo, Tanzania, Uganda, n'ahandi. Tugarutse ku Burundi kuko aribwo bugambiriwe muri iyi nkuru, Bwana Damascene yavuze ko Imana yamubwiye ko hazabanza kwicwa Lt. Gen. Adolphe NSHIMIRIMANA hagakurikiraho kwicwa kwa perezida Petero NKURUNZIZA.

Impamvu n'ubwo ntaragura ariko ncishiriza nkabyemeza ni uko ubwo muka perezida atangaje biriya, kuri Petero NKURUNZIZA icyihuturwa kuruta byose ni ukuvana mu nzira Lt. Gen. Adolphe NSHIMIRIMANA kuko nyine nk'uko byumvikana natinda kumwirenza we ntazamutindira. Ibi mbyanditse ntya kuko nzi ko muri politiki nta mpuhwe zibamo ko ahubwo AKARUTA AKANDI KAKAMIRA(RAPPORT DE FORCE). Birahita byumvikana ko NKURUNZIZA nawe namara kwirenza Adolphe azaba ari mu muriro nawe utazamusiga amahoro.

Ubanza uwaburira abatuye umujyi wa Bujumbura gukizwa n'amaguru ataba agumuye abaturage

Mu itangazamakuru, kirazira gukangurira abaturage guhunga igihugu cyabo kuko bifatwa nk'icyaha cyo kugumura rubanda. Nyamara urebye intambara irimo guca amarenga i Bujumbura, biraboneka ko icya mbere umuryango mpuzamahanga ukwiye kurushaho gukangurira abarundi kumvikana mu mahoro kuko intambara ntacyo yunguye abaturage.

Ikindi ni uko buri wese mu batuye u Burundi muri rusange n'abatuye Bujumbura by'umwihariko akwiye gufata umwanzuro ku ruhande rwe akurikije uko abona ibintu n'uko abyumva. Imana ikomeze abavandimwe b'abarundi kuko bari mu bihe bigoye.

Byakuwe kuri www.bujanews.wordpress.com/ bikorerwa isesengura na UDAHEMUKA Eric

shikamaye.blogspot.no/

Shikama ku Kuri na Demukarasi(SKUD)