ITEMWA RY'INSINA KU KIBUYE: «Gahunda na politiki zahindaguwe huti-huti na FPR nizo nkomoko y'inzara igiye guhotora abanyarwanda ku buryo ubu abatuye akarere ka RUTSIRO ku KIBUYE barimo kuvumira ku gahera Perezida Paul KAGAME kubera kwararika insina hasi ku gahato bagategekwa guhinga INDABO N'IBITUNGURU»/ UDAHEMUKA Eric

Amakuru SHIKAMA ifitiye gihamya aturuka ku Mugonero mu karere ka Rutsiro ahahoze hitwa ku Kibuye aravuga ko umuyobozi w'ako karere witwa goronomu Gaspard BYUKUSENGE afatanije n'abanyamabanga nshingwabikorwa b'imirenge n'abagoronomu mu mirenge bamariye hasi insina z'abaturage ku ngufu bakabategeka kuzisimbuza indabo n'ibitunguru.

Abanya-Rutsiro kimwe n'abandi banyarwanda barasonjeshwa bucece

Mu minsi ya vuba Dr. NKUSI Joseph aheruka kubagezaho inyandiko icukumbuye ku nyandiko ya GARISSON muri USA aho yerekanaga ko leta ya FPR na Paul KAGAME irimo gukorera abanyarwanda genocide bucece. Mperuka kubagezaho inyandiko yavugaga uko abaturage bakikije RUGERAMIGOZI i KABGAYI barimo guhatirwa guhinga IBITUNGURU.

Nk'uko kandi nigeze kubigarukaho mu magambo arambuye, nta mutegetsi ubyuka ngo arimbure imbaga. Oya ntibishoboka, agomba kubanza gushyiraho politiki zirindagiza abo agamije kuzarimbura. Ibyo bikorwa bitegura kurimbura imbaga nibyo twita ETHNOCIDE aribyo bivuga kubanza kwica UMUCO. Umuturage ukamuvana ku biryo akabura uko agira akagwa neza kandi akumva ko bimukwiye!

Ukabanza ukavana mu mutwe w'umunyarwanda insina n'ikijumba kandi ukamutegeka kubyibagirwa burundu. Mu muco w'abanyarwanda bose na RUTSIRO irimo tuzi akamaro k'insina nyamara FPR na Kagame ujijisha i Gabiro banze ko ikomeza kubaho kuko bazi neza ko umuturage agurisha akagwa(urwagwa) akabonamo agasabune.

Abatuye akarere ka Rutsiro baravumira ku gahera perezida Paul Kagame kuko ingoma ye ibakuye ku nsina ya ba sekuru

Amakuru SHIKAMA ifite aravuga ko ubu insina zose bamaze kuzararika mu Rutsiro kandi bikaba byarakozwe ku gahato. Abagoronomu bose bo muri ako karere kimwe n'abanyamabanga nshingwabikorwa b'imirenge bategetswe kubwira abaturage bose gusimbuza urutoki indabo n'ibitunguru.

Kubera ko abanya-Rutsiro bananiwe kumva no kwakira iyo politiki idafututse, niyo mpamvu ubu barimo kuvuga ko Paul KAGAME ingoma ye ibakozeho maze bakabivunjira mu nteruro ivuga ko insina zabo zirimo gusagarirwa zirimburwa amanywa ava.

Meya BYUKUSENGE Gaspard wa RUTSIRO waminuje mu bugoronomu ntacyo yavuze ubwo yari i GABIRO

Ubwo mwumva insina zirimo kurimburwa muri Rutsiro, ntimukeke ko abahayobora batazi iby'ubuhinzi. Bwana BYUKUSENGE Gaspard uyobora aka karere ni agronome wabyigiye ufite impamyabumenyi ihanitse yakuye muri ISAE-BUSOGO mu Ruhengeri. Iki muri SHIKAMA tukakibona nk'icyaha cyikubye kabiri ndetse kenshi uburemere kubona goronomu aba ku isonga ryo gusonjesha abo ayobora.

Mu mwiherero wabereye i Gabiro, na meya wa Rutsiro BYUKUSENGE Gaspard yari ahari ariko ntacyo yavuze. Igihe Kagame yababazaga ati mwambwira icyo mwaganiriyego gitandukanye n'ibyo twavuze mu myaka 11 ishize, uyu muyobozi yari abonye umwanya mwiza wo gutangariza Kagame ko abaturage ayoboye barimo kumuvuma kuko ingoma ye ibatemera intoki ariko ntabyo yavuze bisobanuye ko ashyigikiye Kagame na FPR biyemeje kwicisha abanyarwanda inzara.

Ibintu FPR ikorera abanyarwanda nta kabuza birakungurira igihugu kandi nayo ntibizayisonera

Ku italiki 24 Ugushyingo 2015 nzuzuza imyaka 38 y'amavuko kuko navutse kuri 24 Ugushyingo 1977. Nibuka ko mfite imyaka 6 ubwo hari muri 1984 mubyara wanjye twakoze urugomo maze dufata imihoro twirara mu masaka n'insina turatema. Kubera ko umurima wari hafi cyane y'urugo, ababyeyi bahise baturabukwa maze baca inturusu turakubitwa karahava ku buryo n'uyu munsi iyo nkoni ntarayibagirwa.

Ababyeyi badukubitaga batubwiye ko «UMWANA UTEMA CYANGWA AKARANDURA IMYAKA ABA AKUNGURIRA IGIHUGU AGISURIRA INZARA N'UBUTINDAHARE KU BISEKURU BIZAZA». Ku buryo nibuka neza ko SOGOKURU yahise atumiza UMUSE batunywesha ISUBYO kuko ngo twari twakoze amahano.

Kuva icyo gihe nziko gutema imyaka kimwe no kuyirandura ari ubukunguzi. Noneho twibaze: Niba ababyeyi bavuga ko ari ubukunguzi mu gihe bikozwe n'ibitambambuga, ubwo twabyita iki itegeko ribigena ritowe n'abadepite, perezida Kagame akarisinyaho, bikozwe na goronomu, gitifu, meya na minisitiri??? Buri wese yihe igisubizo.

UDAHEMUKA Eric

shikamaye.blogspot.no

Shikama ku Kuri na Demukarasi(SKUD)