Pageviews all the time

ISESENGURAMVUGO NA POLITIKI: «Perezida w'u Rwanda Paul KAGAME yiyubakiye umunara muremure cyane w'agahinda ukoza agasongero kawo mu bicu none ugiye kuzamuturitsa umutima»/ UDAHEMUKA Eric

Bagiye kwiherera ngo babare abo bamaze kwisasira n'abari bukurikireho

Umunyarwanda wapfuye atabonye ubutegetsi bw'inkotanyi i Kigali ntiyabonye iryo azabara. Ku italiki 19 Nyakanga 1994 guverinoma y'inzibacyuho irahirira gutangira akazi nari mfite imyaka 16 nicaye mu ihema munsi y'igiti cy'umunyinya ku Ruhuha rwa Ngenda na Bugesera kuko twari impunzi imbere mu gihugu.

Uwo mugoroba bamaze kurahira, aho mu Bugesera haje abasirikari ba Kagame batwikira mu mazu abahutu bari batuye aho hafi yacu aba akaba ari nabo Faustin Twagiramungu yazize aho yabazaga Paul Kagame niba izo ngabo zishyira abenegihugu ku ngoyi ari iz'igihugu cyangwa niba ari abacanshuro.

Igihugu ntigishobora gutegekwa n'abicanyi ngo kigire amahoro n'iyo batunga iby'isi byose

Ibyo naboneye aho ku RUHUHA byanteye ubwoba kubona abenegihugu batwikwa ku manywa babona. Byatumye nkurikirana imitegekere ya Kagame na FPR bucece umunsi ku munsi none imyaka 21 irabura amezi hafi 5 akiganje. Muri iyo myaka mu Rwanda hapfuye abatabarika, harenganijwe abatabarika, ku buryo izo nzirakarengane zitazatuza gutakambira UHORAHO.

Muri iyi myaka 21 Kagame amaze ku butegetsi, ntacyo atabonye, yaraye mu mahoteli ahenze ku isi, abo yashatse kwica bose yarabishe kandi nta nkurikizi arabona. Kagame yishe abepisikopi ba KILIZIYA GATULIKA, yica abapadiri, Kagame yicishije abasirikari benshi kandi bakomeye mu ngabo ze, Kagame yashyizeho politiki yicisha abanyarwanda inzara ariko ibi byose ntibyamuhaye amahoro.

Paul KAGAME yaguze indege zifite ANTI-MISSILES kugira ngo batazamuhanura mu kirere nk'uko yahanuye HABYARIMANA, FPR yigaruriye amasoko yose yo mu Rwanda, iha akazi abo ishaka, ikenesha abo ishaka,... Umuvumo w'icyaha cyo kumena amaraso y'inzirakarengane uragatsindwa, mu kuvogera ZAIRE, FPR yasahuyeyo DIYAMA na ZAHABU maze KAGAME yubaka inzu isumba zose zabayeho mu Rwanda ariko amahoro mu mutima we yarabuze rwose.

Perezida Kagame yiyambaje abitabiriye umwiherero ngo arebe ko umutima we wapfa gutuza mo gacye bityo afate agatotsi

Burya iyo uyobora urugo uba uzi neza ibibazo biri mu muryango wawe. Iyo uyobora paruwasi uri padiri mukuru kuri misiyoni uba uzi neza ibibazo bihari. Iyo uri minisitiri muri minisiteri runaka uba ukwiye kuba uwa mbere mu kumenya ibibazo biri muri iyo minisiteri ushinzwe. Ni ukuvuga ko n'ibibazo bikomereye u Rwanda, perezida Paul KAGAME abizi neza kurusha benshi muri twe ari nayo mpamvu ahora ahirengeye kuko aho bipfira ahazi, umuti awuzi ariko akaba adafite ubushake bwo kuwutanga.

Mu KINYARWANDA cyumvikana neza cyane yabajije abari i Gabiro ati:«Nimumbwire igishya ejo mwaganiriyeho gitandukanye n'ibyo twagarutseho imyaka 11 mbone natuza umutima». Mu iyigamyitwarire ya muntu, iyo umuntu avuze ijambo akitsamo umutima burya koko aba ababaye. Iyi mvugo ndumva nta munyarwanda wakwihenda ngo avuge ko yoroshye na busa.

Gutegeka igihugu imyaka 21 nta kuntu utarwara, nta kuntu umutima utaguhagararana kuko kivuna

Gutegeka igihugu ni inshingano ivunanye cyane. Ubundi icyari kuba cyiza ni ugutwara imyaka mike ugaharira abandi nabo bakabona icyo wabarushije. Muri iyi myaka Kagame amaze ategeka, umunyarwanda wese watinyutse kuvugisha ukuri utarahunze ntafungwe ubu yarapfuye. Gukora utyo imyaka 21 abantu intimba ibagera mu ijosi ku buryo kuvaho ku neza ntaho wabacikira.

Abana FPR yarimburiye ababyeyi n'abavandimwe ubu ni abasore n'inkumi, none rero amahoro yarabuze mu mutima wa Kagame kandi koko birumvikana ndetse natwe twese abanyarwanda mu mitima yacu nta kigenda ariko twe dutandukanye na Kagame kuko twabuze amahoro kubera kurenganywa nawe; we akaba yarayabuze kubera kuturenganya. Ikibazo ni uko abo asaba kumuhera umutuzo umutima nabo ntawo bafite mu mitima yabo. Biteye agahinda gutegekana n'ikipe imyaka n'imyaniko ariko ntimuve mu kibuga.

Ubu aho bigeze, ntibyashoboka gusubiza ibintu mu buryo mu Rwanda FPR ikiri ku butegetsi kubera impamvu zikurikira: Impamvu ya mbere ni uko abafite ukuri badashobora kubona uruvugiro ngo batange umuti. Icya kabiri ni uko ibifi binini byirirwa binyereza umutungo nta mucamanza watinyuka kubijyana mu nkiko kuko yarara yishwe bityo akayoberwa ikimukubise!

Paul KAGAME yiyubakiye umunara ukabakaba mu bicu...

Umunara mvuga hano ntabwo ari inzu yubatswe n'amatafari cyangwa sima. Oya, umunara mvuga ni sisiteme y'imitegekere n'ubwo nzi neza ko n'amazu FPR yayubatse kandi ikaba ibarirwa mu mashyaka ya politiki akize cyane ku isi. Nyamara ibi byose Paul KAGAME abirengaho agahagarika umutima ariko nyamara ntuzatuza bibaho kuko urukundo rwafungiwe amayira mu myaka n'imyaka mu muryango nyarwanda.

Ubwo rero bimeze bitya, nakenyere akomeze bimusenyukireho kuko nta munsi tutavugije ihembe. Izo ruswa twagiye tuzandikaho abanyabubasha bakarakara. Charles KABONERO wakunze kujya acyamura abarenganya abaturage ubu yibera mu buhungiro n'abandi ntarondra. Ako karengane ntidusiba kukamagana,... Niyo mpamvu navuze ko umunara Kagame yiyubakiye uzamuhirima hejuru kandi uzamugiraho ingaruka byanze bikunze kuko Imana ihora ihoze!

UDAHEMUKA Eric
shikamaye.blogspot.no

Shikama ku Kuri na Demukarasi(SKUD)

No comments:

Post a Comment

Muvandimwe, nshuti ya SHIKAMA, turagushimira cyane umuganda utanga wo kubaka URWANDA rushya ubinyujije mu bitekerezo byawe( Komanteri). Kugirango turwanye urukungu rw'Agatsiko ni ngombwa ko buri komanteri ibanza gusuzumwa. Yohereze, irahita ijya ku rubuga mu minota mike niba idatandukira( kuvuga ibitajyanye n'inyandiko), itukana, cyangwa yuzuyemo uburere buke.

Wipfusha komanteri yawe ubusa ukoresha "ANONYMOUS", himba izina urikomeze kuko hari ibihembo mu Kuboza 2016 ku bantu 3 bazaba babaye indashyikirwa mu gutanga ibitekerezo. Dukomeje kubashimira ubwitange n'umurava muhorana. IMANA Y'I RWANDA ihorane namwe iminsi yose.

Dg NKUSI Yozefu
www.shikamaye.blogspot.com
Uharanire ko Ukuri gusimbura ikinyoma.
Email: mahoriwacu@gmail.com; tel: +4745564355