AKUMIRO MURI DEMUKARASI:«Paul KAGAME afite inyota y'ubutegetsi nk'uwavutse ejo, amaze kubwira Jeune Afrique ko muri 2017 icyemezo kizafatwa n'abanyarwanda, yirukanye minisitiri KARUGARAMA Tharcisse na Martin NGOGA kuko bamubujije guhindura itegeko nshinga none minisitiri BUSINGYE Johnston ushinzwe kubahiriza ibirango bya Repubulika niwe uherutse gutangaza ko itegeko nshinga rigomba guhinduka ngo Kagame azapfire ku butegetsi!»/ UDAHEMUKA Eric

Minisitiri Businge Johnston

Ariko ibyo mu Rwanda mvukamo byaranyobeye rwose! Noneho ndumiwe! Ni ubutegetsi buryoha bukagira icyanga kirenze cyangwa ni abategetsi babutwerera n'ibyo butifitemo? Kugira ngo muri iyi nyandiko mbashe kwereka abanyarwanda muyisoma ko igihugu kirimo kugwa mu mwobo bucece,

Ndagerageza gufata imyitwarire n'imitegekere bya FPR na Kagame mbihuze n'ibikubiye mu gitabo cyitwa:«DE L'ART DE GOUVERNER PAR LES LOIS ET PAR LA FORCE» cyanditswe n'umutyazabwenge akaba n'umunyapolitiki ukomoka mu Butaliyani witwa NICOLAS MACHIAVEL wavutse mu 1469 akitaba Imana mu 1527 afite imyaka 58 y'amavuko.

Tubanze dutange igisobanuro cy'umutwe w'iki gitabo cyanditswe na Machiavel

Iki gitabo cyitwa «DE L'ART DE GOUVERNER PAR LES LOIS ET PAR LA FORCE» tugenekereje mu Kinyarwanda twavuga ko Machiavel yashaka kwerekana uburyo umutegetsi akoresha mu kuyobora abaturage be yifashishije amategeko n'imbaraga cyangwa ingufu cyangwa se igitugu nk'uko tuza kubibona.

Ubu butegetsi buteye butya bukaba bwarabayeho kuva no hambere kugeza aya magingo aho usesenguye neza wasanga ko mu Rwanda hari igitugu kiremereye cyane kurusha hafi ya hose ku isi. Ibyo bigaragarira mu kubuza abaturage uburenganzira bwo kuvuga ibyo batekereza ahanini bibusanya n'umurongo leta ya FPR yimirije imbere nko muri iki gihe Kagame arimo kwitegura gufata manda ya 3 abanje guhindura itegeko nshinga.

Machiavel yagaragaje ko umunyagitugu agomba kuba indyarya no kunyunyuza abakene nk'uko Paul Kagame amaze kubibwira JEUNE AFRIQUE

Machiavel yerekana ko kugira ngo umutegetsi acume iminsi acyicaye ku ntebe agomba kuba indyarya ya karahabutaka kandi akanyunyuza abaturage atitaye ku miruho yabo. Duhereye ku kuba indyarya, muri kamere ya Paul KAGAME ubu ufite ubwoba bupima toni kubera kwibaza icyo iminsi imuhishiye, ararindagiza abantu kandi abategetsi bose bamweretse ko atagomba gukora ku itegeko nshinga yarabirukanye mu kazi ubu bakaba birirwa inyuma y'inka zabo.

Paul Kagame muri iki gitondo mu nkuru SHIKAMA dukesha RFI, abajijwe na JEUNE AFRIQUE niba azahindura itegeko nshinga kugira ngo yiyamamarize manda ya gatatu. Kuri iki kibazo igisubizo kiroroshye, yagombaga gusubiza ati NZARIHINDURA cyangwa SINZARIHINDURA ariko nyamara siko yasubije ahubwo avuze ko igisubizo gifitwe n'abaturage.

Kugira ngo tubyumve neza ukuntu Kagame ari indyarya, nimwibuke ijambo yavugiye muri RWANDA DAY mu Bubiligi abenshi mufite muri mobile zanyu, icyo gihe yaravuze ati:«Ba bandi birirwa bababeshya ngo bazabanza bakureho Kagame...ryari se? Byanyuze mu yihe nzira? Demukarasi se? Amatora se?...Barabashuka!!!»

Machiavel yagaragaje ko umunyagitugu arangwa no kwica no guha amarozi abatavuga rumwe nawe nk'uko Kagame na FPR babikorera abanyarwanda

Kuva mu 1990 kugeza uyu munsi, abanyarwanda ntibasiba kwicwa kandi ari inzirakarengane. Sinarondora abicwa ngo binshobokere ariko icyo ngamije hano ni ukwerekana ko amarozi FPR ikwirakwiza ahari abanyarwanda hose ari intwaro y'umunyagitugu kugira ngo yice abamurwanya bityo amare kabiri ku butegetsi.

Tugarutse kuri ya mategeko yanditse yifashisha akongeraho n'igitugu, nibyo bimufasha gushyira mu bikorwa imigambi ye mibisha kandi abategetsi b'ibyegera bye babusanije nawe, kabone n'iyo baba bavuga ukuri akabica, akabafunga, akabagambanira, akabambura imyanya y'akazi nk'uko Paul KAGAME yabigenje ubwo minisitiri KARUGARAMA Tharcisse wari uw'ubutabera yerekanye ko bidakwiye guhindura itegeko nshinga ubu akaba yirirwa aragiye inka ze!

Minisitiri Johnston BUSINGYE ushinzwe kurinda ibirango bya Repubulika niwe ubaye uwa mbere mu gushuka Paul KAGAME ngo yice amategeko

Ubundi mu rurimi rw'Igifaransa niho byumvikana neza. Minisitiri w'ubutabera mu mvugo y'intiti zize tumwita GARDE SCEAUX bisobanura umuyobozi ushinzwe kurinda IBIRANGO BYA REPUBULIKA. Ibi birango ashinzwe kurinda ni 3 aribyo IBENDERA RY'IGIHUGU, INDIRIMBO YUBAHIRIZA IGIHUGU N'IKIRANGANTEGO CYA REPUBULIKA.

Uko abirinda biteganywa n'itegeko ariko navugamo bicye. Mu kirangantego handitsemo UBUMWE-UMURIMO-GUKUNDA IGIHUGU. Murabona ko minisitiri BUSINGYE urimo gushuka Kagame ngo afate indi manda, umunsi mu Rwanda havutse imyivumbagatanyo abantu bakamagana Kagame amaze kurihindura bwa bumwe busanzwe bujegajega buzasandara bityo BUSINGYE abe ateshutse ku nshingano ze!

Perezida Paul KAGAME afite inyota y'icyanga cy'ubutegetsi ku buryo wagira ngo yavutse ejo

Muri aya mayeri yo gukora ibishoboka byose ngo yongere yiyamamaze, Kagame arimo gukoresha amakosa abantu banyuranye uhereye mu nkandagirabitabo n'inkundarubyino ukagera mu bagererwa be bo mu rwego rwo hejuru. Bamwe barategekwa kuvuga ko Kagame nadatorwa baziyahura. Abandi baravuga ko adategetse u Rwanda rwahita rusibama ku ikarita y'isi.

Uheruka ni minisitiri w'ubutabera Johnston BUSINGYE wavuze ko Kagame agomba guhindura itegeko-nshinga. Ibi byose nta muturage ubyibwiriza, nta mutegetsi ubirota ahubwo bose babipakirwamo n'intumwa za Paul KAGAME ufite inyota y'icyanga cy'ubutegetsi cyane ku buryo wagira ngo yavutse ejo.

Nyamara Kagame si umwana, muri Kenya ubwo aheruka NAIVASHA akanahakorera impanuka y'imodoka, mu kiganiro yahaga abayobozi b'intara za Kenya, abanyamakuru bamubajije iby'urupfu rwa Col. KAREGEYA Patrick asubiza ko INSHINGANO YE ARI UKURINDA INYUNGU ZA NYAMUKE(ABATUTSI).

Muri uko kurinda inyungu z'abatutsi, Kagame azi neza uko byagenze kugira ngo agere ku butegetsi, Kagame azi neza kandi yiyumvisha bihagije umubare w'inzirakarengane yisasiye kugira ngo agere mu URUGWIRO, Paul Kagame azi neza rwose ko abo batutsi arinze, bamwe muri bo yabakoresheje amakosa ku buryo azi neza ko umunsi azaba atagihari umugabane wabo uzaba muri gereza no mu bihome(Ndavuga abakoze ibyaha)! Si ibyo gusa,

Kagame azi neza rwose ko manda za Bourguiere na Fernandez Milerez zisinziriye mu tubati mu Bufaransa na Espagne ku buryo umunsi azaba atakiri perezida agihumeka agomba gutanga ibisobanuro ku mamiliyoni y'inzirakarengane yishe(yategetse ko zicwa) zirimo Abasenyeri i GAKURAZO ku italiki 05 Kamena 1994, KIBEHO, MAPPING REPORT(R.D.C), abategetsi batandukanye yishe, abanyamakuru bishwe ku ngoma ye,...

Ibi byose ndondoye n'ibindi nibagiwe, n'ibindi ntazi byo mu rwego ruhanitse,... Byose ni umusaraba Kagame ahetse kandi kuri we kuwutura azi neza ko bitazamushobokera ariyo mpamvu we yumva icyamuha agatotsi ari ukuguma ku butegetsi ku kiguzi icyo aricyo cyose kuko kuburekura azi neza ko imbwa zamurya atararenga umutaru!!!

Kuri we uko abyumva kandi abyibwira, agomba kuba perezida w'u Rwanda kugeza ku isegonda azapfiraho!!! Murabona rero ko mu by'ukuri u Rwanda nta mahoro na mba rufite kandi ejo hazaza harwo habuditse umwijima ku buryo uwavuga ko rugana ikuzimu ataba yibeshye! Iminsi iza iduhishiye byinshi ntayo turabona!

UDAHEMUKA Eric

shikamaye.blogspot.no

Shikama ku Kuri na Demukarasi(SKUD)