Kagame Pawulo yabajije abajyanama b'uturere ibibazo yagombye kubazwa we ubwe: " ibyaha cyo gucuza abakene no gukingira ikibaba abanyamakosa muzabikirira hehe?"/Nkusi Yozefu

1. "Ko mujyaho mukabeshya ngo muri abantu b’Imana. Njya mbona mwese mwirirwa mwarimbye mujya mu misa abandi mujya mu biterane, mwaririmbye mwatwawe. Iyo ubabonye uravuga uti ’hano dufite abamarayika ariko mwarangiza mukajya kwambura umuntu udafite n’inzara zo kwishima?’Ukajya kumutwarira ibyamugenewe kugira ngo abone uko abaho? Icyo ni ikinyoma.” Pawulo Kagame abwira icyo Agatsiko kise  itorero ry’abayobozi b’inzego z’ibanze baherutse gutorwa ryari rimaze iminsi ribera i Gabiro

2. “Ntabwo umunyarwanda biri mu muco we wo gushyigikira ikibi, bagira n’umugayo. Kwanga umugayo, kwaga ikigayitse ariko hari umuco wadutse wo kuvuga ngo reka batangira ngo -------ndarengana.”Pawulo Kagame abwira icyo Agatsiko kise  itorero ry’abayobozi b’inzego z’ibanze baherutse gutorwa ryari rimaze iminsi ribera i Gabiro

Ayo magambo ari hejuru yavuzwe na Pawulo Kagame ubwo yasozaga itorero ry’abayobozi b’inzego z’ibanze baherutse gutorwa ryari rimaze iminsi ribera i Gabiro mu Karere ka Gatsibo. Ni itorero ryari rihurije hamwe abayobozi 834 ryatangiye tariki ya 19 Werurwe rigasozwa tariki ya 31/3/2016.

Ibibazo umuntu yakwibaza

Kuri kiriya kibazo cya mbere yibaza, Shikama yageneye ibisubizo Kagame ikoresheje ibibazo bikurikira:

•  Ese Pawulo kagame ntiyaba yitwa Pawulo atari umukirisitu yifitiye irindi dini akoreramo kuko mbona anenga  abakirisitu n'imigenzo yabo yose?
• Niba we se atari umukirisitu akaba anenga abakora nabi kuko ari abakirisitu, we idini yoyobotse ryaba rimufasha gukora ibinyuranye n'ibyabakirisitu avuga ko bakora nabi, akaba akorera neza abaturage yabohoje?
• Niba ari uko bimeze, kuki adashaka abayoboke b'iryo dini rye ngo maze bamufashe kuyobora nako gutegeka u Rwanda maze abanyarwanda bareke gucuzwa inkunga amahanga yabageneye?

Kuri iriya ngingo ya kabiri Shikama irakebura Pawulo Kagame:

Giselanse, uhora wibaza uti: "ibintu bipfira hehe?" Shikama nta gihe itakubwiye ko ibintu bipfira iwawe!

Guverineri w'intara y'uburengerazuba yaherekeje Indengerazuba

Kuva muri 1994 FPR-inkotanyi yigaruriye u Rwanda hejuru y'imivu y'amaraso, wumvishije abanyarwanda ko batareshya: umututsi ari hejuru akaba agomba gufata byose(ubutegetsi, n'imari), umuhutu agomba gufungwa, kwicwa, ugize amahirwe akaba umugaragu n'umuja. Uribuka ijambo wavugiye imbere y'urubyiruko muri 2013 ko Abahutu bavutse n'abataravuka bagomba kugendana ipfunwe?! None se  muri Shikama ntitujya tukubwira ko witega umwe wa rugondihene: umugaragu n'umuja bashobora bate kwamagana ba shebuja mu gihe bifatiye inka zagenewe rubanda muri ya gahunda Agatsiko kise Girinka, uvuga ko mu gihugu hose ifite ibibazo? 

Ba minisitiri Dg Diyane Gashumba ushinzwe uburinganire na
Musa Fazili ushinzwe umutekano w'Agatsiko

Kugirango ubyumve neza: muri ya gahunda ya FPR-inkotanyi y'ikinyoma n'itekinika, hari abahutu mwagiye mushyira mu myanya, wowe ubwawe uzi ko nta jambo bagira haba mu bayobozi b'abatutsi bagenzi babo ndetse nta n'agaciro abaturage babaha. Bityo Meya w'umuhutu ntazabuza perezida wa njyanama w'umututsi kwitwarira inka ngo abone bwacya kabiri. Niba visi meya w'umututsi yishakiye kwitwarira inka, Meya umukuriye w'umuhutu ntazamubuza urabizi, ibi rero si ugukingirana ikibaba ahubwo ni ukugirango aba Bahutu bacume iminsi ku isi ya Rurema.

Uravuga ko aba ba nyagupfa bagomba kujya barega izi ndobanure, bazabarega kuri nnde? Hari urega uwo aregaho? Ni bangahe bagejeje ibibazo iwawe mu Rugwiro ntibikemuke? Ese bazabona amahirwe yo kugerayo? Fata ingero ebyiri gusa: wa mwarimu wa kaminuza y'u Rwanda i Butare Lambert wasemuraga kwa Rector, Abatutsi babonye ko uwo mwanya urimo inoti za misiyo ahimbirwa dosiye yo kwinjiza amabombu mu nkongoro muri 2010, afungwa umwaka, umwanya umaze kubohozwa arafungurwa asubira ku kazi ke ubu arigisha! Ikibazo cya wa mubyeyi w'i Byumba , wari umwe mu bayobozi b'ibitaro bya Rwangana uherutse gufatirwa  kuri Nyabugogo, ntuyobewe ko nawe azira umwanya yari amaze iminsi ashyizwemo asimbuye umututsikazi w'ihabara ry'umusirikare wo hejuru mu ngabo zawe! 

Barizeza Kagame nk'ibyo bizezaga Ikinani muri Umasiyo(animation)!

Byose bijya gupfa byahereye iwawe: uribuka ibibazo byabaye hagati ya Bumaya Andereya(Umuhutu) wari uhagarariye Agatsiko muri Libya kuva muri1995 kugeza 1999, abigiranye n'umujyanama we w'ambasade, Alegisanderi(Alexandre w'umututsi)? Ikibazo nyamukuru cyari uko uyu mututsi yumvaga adashobora guhabwa amabwiriza y'akazi n'umuhutu! Byabaye ngombwa ko wowe uza gufunga iyi ambasade muri 1999, Bumaya umugira minisitiri w'ububanyi n'amahanga, utegeka Alegisanderi gukomeza gukora amezi hafi umunani kugirango arangize imirimo yo gufunga ambasade. 

Njye wandika ibi sinageraga muri ambasade yawe i Tripoli ariko kuko nigishaga ( Repetiteur) abana b'abambasederi mu ngo namenyaga amakuru menshi kuri iyi ambasade ya FPR: uyu Konseye yabwiraga bagenzi be bahagarriye ibihugu byabo muri Libya ko Bumaya ntacyo ategeka kuko adashobora guha amabwiriza n'umupalanto( utwara inyandiko ku iposita no mu zindi serivise) wo muri minisiteri  ye! None se hari aho yabeshye? Niba se minisitiri adashobora guha amabwiriza umupalanto, umunyamabanga mukuru cyangwa umuyobozi mukuru b'Abatutsi muri iyi minisiteri nibikorera amanyanga yo kwigwizaho imitungo, hari icyo azakora? Ibi se uzabyita gukingira ikibaba cyangwa kuba Ngurinzira?!

Uribuka muri 2011 umwarimu wo muri kaminuza y'u Rwanda Charles wananiwe n'akazi ko kwigisha ariko wirirwaga uvuga ko kuba yarakuriye muri Uganda nta kabuza bene wabo bashaka ko aza akajya mu zindi ndobanure mu Rugwiro. Uyu mwarimu ufite impamyabumenyi y'ikirenga (PhD) yakuye muri afrika y'Epfo, yigeze guca ibintu asanze umwe mu barimu yicajwe mu biro yagombaga gusangira n'abandi. Yabwiye abanyamahanga bagenzi be ko atashoboye kwihangana kubera ko ibiro bye babizanyemo Umuhutu! Ntihaciye kabiri ahutaza mugenzi we wari mu za bukuru(imyaka 70) avuga ko batareshya kuko we yavuye muri RDCongo.  Nyuma y'ukunanirwa kwigisha n'iyi myifatire n'imvugo bigayitse imbere ya bagenzi be, yazanywe mu Rugwiro mu biro byawe atangira koherereza inyandiko zuzuye ibitutsi Rector Lwakabamba Silas, uyu mugabo nawe utarya iminwa imbere y'akarengane, yahise ahamagara mu Rugwiro yamagana aya mabi. 

Intore nkuru yise into: ibisambo n'abambuzi!

Aho uviriye mu mahanga wihoreramo, wabwiye uyu Charles uti: " Uwananiwe no kwigisha si hano azashobora" ariko kuko ngo umwana uri iwabo avuna umuheha akongezwa undi, wahise utegeka ko ajyanwa muri RDB aho akuka nkuko yari gukuka muri perezidansi yawe, kuko imishahara y'ibi bigo ari imwe. Ndakeka ko ubu ari hejuru y'umushahara wa  2,000,000 ku kwezi! None se ibi nibyo byagombaga gukorwa, cyangwa hagombaga ibihano? Hagakorwa n'amatohoza ku myigishirize y'aho uyu muntu yize ngo ejo hatazagira undi munyarwanda uhoherezwa.?

Urundi rugero naguha ni urwa Madamu Zayinah wayoboraga Haguruka, akaba n'umujyanama  wa Nyiramongi Janeti muri Imbuto Foundation, mukawe. Giselansi, uzabaze uzasanga uyu mudamu wari ufite isomo rimwe gusa abandi bafite make barigishaga amasomo ane(1) kandi agahembwa umushahara wose nk'uwabo, ariko iri rimwe naryo yananiwe kurikosora ngo arirangize, kugeza igihe abanyeshuri berekanye agahinda n'akababaro baterwa n'uyu mwarimu utarabonekaga, bityo bakaba batarashoboraga kwimuka ngo batangire umwaka mushya w'amashuri! Ndakwibutsa ko abanyeshuri yayoboraga mu bitabo byo kurangiza amashuri binubiraga ukuntu abakosorera muri Hoteli aho kuba muri Kaminuza iyo bagize Imana bakamubona! 

Ndakwibutsa ko nari umukuru w'agashami, biba ngombwa ko mfata icyemezo cyo gusaba ko uyu mugore ahagarikwa kwigisha kugirango abana bigishwe isomo yari yarahawe ariko hagashira amezi 2 atarakandagiza ikirenge mu ishuri! Uzabaze muri Kaminuza aho iki kibazo cyangejeje kugeza ubwo mpunga igihugu. Uyu mugore amaze kubona ko umushahara we utakiza kuri konti ye, yaje kuntukira mu biro anyumvisha ko azanyereka: ati: "Uri mubi kurusha Interahamwe, ariko bizakugaruka vuba". Si amazimwe, inyandiko twandikiranye ndazifite hano, uzambwire nguhe kopi yazo!

Umuyobozi w'intore : RUCAGU

Ari Umuyobozi wa kaminuza, ari umwungirije, ari ushinzwe Ishami(Faculty) bose bihunzaga iki kibazo banga kwiteranya na Nyiramongi Janete mukawe, ariko mu ibanga bakambwira ko turi kumwe. Byaje kurangira, agiye kuko n'umushahara we utagarutse, ariko reba ingaruka byangizeho kubera kwamagana ibibi: "mpeze mu buhungiro"!!!. Nyamara Zainah we nyuma mwamushinze cya kigo cyajugunye impfubyi mu muhanda kitwaga ko gikorera abana, murangije mumugororera umwanya muri Afrika yiyunze (African Union) ubu akaba ahagarariye uyu muryango muri Tchad!!!

Si Zainah wenyine, kuko hari undi musore wari warigize akari aha kajyahe witwa Cyuma M. wavugaga ko yigisha muri kaminuza, ariko akamara n'umwaka atarangije kwigisha isomo na rimwe nyamara umushahara we ukajya kuri konti ye uko wakabaye, impamvu yatangaga ni ubudahangarwa bwe bwo kuba akorana n'umugore wawe Janeti Nyiramongi mu Mbuto Foundation; uyu we yambereye imfura kuko nkimara gutorerwa kuyobora agashami yabarizwagamo, yahise asezera.

Guverineri w'intara y'amajyaruguru yaherekeje Intore z'injyaruguru

Giselanse, ingero ni nyinshi, ubishatse naguha n'izirenga 100 zose zerakana ko byose bipfira iwawe. Niyo mpamvu burya igihe watungaga urutoki rwa mukubitarukoko bariya bagererwa bawe, izisigaye enye zose zerekezaga kuri wowe, zikwereka ko uri nyirabayazana w'ibibazo wavugaga biterwa nabo; ongera urebe videwo y'uwo munsi, niko uri bubisange! 

Duca umugani mu kinyarwanda ngo Arimo gishegesha ntavura kandi ngo umwera uturutse i Bukuru bucya wakwiriye hose.

Yewe Abumva, niba wumva mvuze ngo iki?

Dg NKUSI Yozefu

www.shikamaye.blogspot.com

Muzamenya Ukuri maze kubabohore.