INYANDIKO ZO MU BUBIKO. Uruhare rwa Jenerali Majoro Kazura J.B , mu rupfu rw'uwari Perezida w'Uburundi Nyakwigendera Melchior Ndadaye!/MBANGURUNUKA Paul

  Iyi nyandiko yaciye bwa mbere kuri Shikama kuri 28/03/2014

Nyakwigendera Nyiri icubahiro
 Perezida Melikiyoro NDADAYE

Bavandimwe Nshuti nongeye kubasuhuza! Ariko ubu ntibyoroshye kuko Afande aremera atange Nyiramongi ariko abone Mbangurunuka P. ku bubi n’ubwiza maze amucagagure. Ubu nandika Abajenerali 2 n'andi masiniya ofisazi menshi arigukorwaho iperereza mu ibanga rikomeye ngo hamenyekane uwaba cg akorana na Mbangurunuka Paul. Ariko se Kagame azashyirwa amenye Mbangurunuka we mbere y’uko iminsi imugera amajanja (Kagame) imunanguye?! Tubihange amaso!!

Reka twirebere impamvu nyamukuru y’iyi nyandiko igira iti:

Uruhare rwa jenerali Majoro Kazura mu rupfu rwa Perezida w’Uburundi Melchior Ndadaye, wagandaguwe taliki ya 21/10/1993.

Ibi byanditse kubera impaka nigeze kumva abantu barenze 5 baterana amagambo igihe nari ndi mu kabari k’umugabane wa Aziya(Igihe singitangaje kubera impamvu z’umutekano wanjye).

Umwe muri abo bagabo(Abanyarwanda n’Abakongomani 2) yashinjaga abandi guhimbira ibinyoma Kagame. Agira ati : "yego Kagame ni umwicanyi ku buryo n’iyonka ibizi, ariko namwe ntimugakabye ngo mugeze naho mumugerekaho impfu z’uwapfuye wese". Ati: "reba nka Ba perezida mumushinja mwarangiza mukamushinja kwica na Ndadaye kandi  yari yibereye mu ishyamba! Ku mutima naramusetse  nikomereza kwivugira igiporutigale kuri phone ngo hato batavumbura ko hari umunyarwanda  uriguta mumatwi ibyo barimo."

Nyuma y’ibyo by’uriya mugabo reka ngerageze kugaragaza bimwe mu bimenyetso bishobora kuba bigira Kagame umwere kuri urwo rupfu cg se bikaba bimushinja. Buri wese usoma ibi afite uko abisesengura kugiti cye. Kagame akimara kugirwa umuyobozi w’Ingabo zahoze ari iza APR, yisanze asigaranye ingabo 426, bitewe n’uko bamwe bishwe ku mufiririzo nyuma y’urupfu rwa Gen fred Rwigema, abandi bahitamo gutoroka kubera umuriro wari uri kubakira kandi abenshi muri bo bwari ubwa mbere bageze ku rugamba.  Abasirikare 426 ni bake cyane bishoboka kugirango ukomeze intambara kuko ntibiba binashoboka kubashyira mu byiciro nk’uko mu gisirikare bikorwa.

Kagame iyo asubira inyuma akanga gukomeza urugamba, Museveni yar iguhita amukubita agafuni, ba Adam, Sam Kaka cg Denis Karera, bari gushobora kuyobora. Kagame w’umunyabwoba kabuhariwe yahisemo kujya kwihisha mu birunga na za ngabo 426. Kujya mu birunga ni nko kuvuga ngo kama mbaya mbaya, aho kugirango Museveni cg inzirabwoba zimpitane, reka niyicirwe na buriya bukonje (bwo mubirunga).

Bitewe n’inzara ivanze n’ubushomeri birangwa muri biriya bihugu byacu, abasivile cg abakada batarimo RIP Inyumba A. na Mary Baine (bari bashinzwe gahunda y’ibiryo), abandi boherejwe za Burundi, Tanzania na Congo kujya kureshya abana b’Abatutsi ngo baze ku rugamba. Abandi bashakisha Abahutu boherezwa mu gihugu imbere kujya gushakayo abandi basore.

Mu bagiye I Burundi, bashoboye kuzanamo umwana wivukaniye imigisha yo gusangira amaraso na Sebuja. Uwo ntawundi ni umutipe witwa Kazura J. B !

Ibya Kazura byagenze bite?

Mu ngabo Kagame yari afite, abenshi bari Abagande cg Abanyarwanda bamize ikigande abenshi bakaba bari abesikoti ba bamwe mu mafandi yanganaga urunuka na Kagame. Niyo mpamvu abana bashya bazaga, abenshi (bitewe no kuba clever cg igihagararo n’amashuli) bacaga imbere ya Kagame kugirango, bamwe abadeplowinge bajye gusimbura ya mesikoti  hanyuma babashe kuneka gahunda zose za babafande kubuyo kudeta yo mu ishyamba itari gushoboka. Aha niho mwumva ngo abana benshi bariye agafuni kuko bariya bakamandazi nabo ntibishimiye kurindwa n’abana batazi batitoranyirije. 

Ikindi abenshi muribo babaga barinzwe n’abana bivaniye Uganda bavuga ikigande warangiza ukabazanira imyigaguhuma ivuga ikirundi n’igifaransa. Kubera iyo mpamvu rero, Afande runaka yahimbiraga icyaha umwana bamuhaye kumurinda nako kumuneka akamuhimbira amakosa runaka, hanyuma umwana akarya agafuni. Benshi cyane barakariye bitewe n'uriya mutego Kagame yihaye gutega atazi ko uzahitana inzirakarengane.

Kuri Kazura we, byabaye ibindi bindi! Uyu mwana, Kagame yamubonyemo imbuto nziza izamubyarira amatunda aryohereye. Kagame yaramugumanye kuko yari azi akazi azamukorera imbere gato. Kuba Kazura yari azi igifaransa, igiswayire n’icyongereza , byatumye Kagame amwizera cyane kuko mission yose yahabwa, Kagame ntazirirwa akenera umusemuzi ku magambo amwe na mwe yakoreshwa muri Codes.

Nibwo Kagame yamuhaye akazi karyoshye(hot seat) ko kumubera umusemuzi. Aho abandi bana udufuni tw' abafande ndetse n’urufaya rw’imakasi bibageze kubuce, Kazura we ingendo yari azimereye nabi, arara mu mahoteli ahenze I Burundi, ndetse anavugana akanahabwa icyubahiro  n’abantu b'ibikomerezwa yajyaga abona mu makuru cyangwa mu binyamakuru iyo Mu Kamenge. Ibyo bikomerezwa by’I Burundi yabonanaga nabyo, yabaga abijyaniye ubutumwa buvuye kwa kibamba bwo guhitana Perezida! Iyicwa rya Ndadaye, nta telefoni cg ibyombo byakoreshejwe. Hakoreshejwe iposita y’umusore witwa Kazura Jean Bosco, ubutumwa abutanga neza ku mpande zombi mission irangira neza cyane, Boss we amukurira ingofero amuhemba ipeti rishyushye rya Majoro.

 Heee! Majoro n’ubwo n'ubundi risanzwe ari ipeti rikomeye cyane ( kuko burya Majoro akurikirwa na Kapiteni, uyu nawe agakurikirwa na Liyetona ariko intera iri hagati ya majoro na Kapiteni ni ndende cyane iyo uyikompaye n’irihagati ye na Liyetona), Majoro rero w’intambara irangira ntanaho ahuriye na Jenerali w’ubu. Kiriya gihe Majoro yari akomeye cyane ku buryo utabyiyumvisha keretse uramutse   umenye  uko ba Nyakwigendera Majoro Kigofero, ba majoro Gashayija, Gumisiriza, Katabarwa n’abandi bari babayeho nibwo wahita wumva Majoro w’icyo gihe icyo yaricyo. Niba umpinyuza wegere Kapiteni Jean Marie Ntagwabira (Umutoza)wahoze ari kiyongozi wa Kigofero mbere y’uko atabaruka azize yandwara. Ariko wenda Ntagwabira ntiyamuvuga neza da, kuko uyu mwana wari serija ntiyatinye guhangara ikizungerezi Afande we yari asize maze nacyo kikamuzimanira ku mpano sebuja yari agisigiye!

Ngaho rero ndebera ubuzima bw’uwo mumajoro hanyuma umbwire ubwa Kazura umwana wari kw'ibere kwa Kagame yinjira adakomanze! Kazura yaragorororewe pe, ku buryo bihita bikwereka ko hari ikintu kidasanzwe yakoreye Boss! Urugero natanga ni igihe mu mpera za 1995 (hafi aho) Kazura yigeze afungirwa Camp Kigali ku mpamvu zari zizwi na Kagame wenyine. Icyo gihe amesikoti arenga 20 yarapanuye ahantu hose no mu biti mbega wagirango arinze Perezida.  Nyuma y’igihe gito Col Musitu yafungiwe muri kasho imwe n’iyo Kazura yari yafungiwemo(yaziraga kurasa aho imbwa z’Abanyamerika zateguraga ibisasu zari zicumbitse), Col Musitu yahawe ama escorts 2 gusa!! Kugirango uve kuri Majoro ugere kuri Col bigusaba urugendo rurerure rwo kubanza guca kuri LT Col.

Si ibyo gusa kuko iyo urebye abana binjiriye rimwe cg mbere ya Kazura uhita ubona ibintu atari shyashya, Kazura yinjiye nyuma ya ba Col Philemon Bayingana (uyu akaba yarakoze akazi gakomeye cyane ku rugamba), nta na kimwe yamurushaga kuko nawe yize ariko reba asezerewe akiri col undiwe ari jenerali. N'iyo usubiye inyuma gato ukareba igihe Kazura yarwanaga na Kayizari C. muri kariya kabari kari imbere ya hotel des mille Collines, ukareba uburyo Kagame ntacyo yigeze amukoraho kandi ariwe washotoye Afande Kayizari, hanyuma ukabigereranya n’inshyi Jenerali Muhire yakubiswe na Kagame ubwo yatungaga pisitoli Kalisa BCDI igihe Kalisa yari amucyuriye mu cyayenge ko ari umutwa(yamutumirije mushikaki-Brochette- y’intama), uhita ubona ko Gen Kazura ari undi wundi imbere ya Kagame. Ibindi iyo witegereje ijambo afite muri gahunda y’ikambere mu bwiru usanga uyu mujenerali wabaye number 1 muri mission yo kwica Abaperezida, Boss yarabimushimiye cyane. Mvuze ikambere mu bwiru kuko iyo Kagame atumije umuntu ukomeye(ministers, Col cg Gen) akenshi aba yicaranye na Musoni James hamwe na Gen Kazura. Iyo Kagame atakubatuye urushyi, Kazura ubwe ararukwasa cg Musoni akagucira mumaso.

Col Patrick Karegeya amaze kwigizwayo, icyizere cyose Kagame yacyimuriye kuri Gen Kazura. Kuba Kazura yarafashe umwanya wari uw'umuntu ukomeye nka Karegeya, bigaragaza ko kwicisha Ndadaye byamugororeye bikomeye. Ibi mbivugiye ko Col. Karegeya mu bihe bye byiza yari akomeye cyane, uko gukomera kwe Pasteur Bizimungu aramutse adapfuye yazabitangamo ubuhamya ku gatendo kamukoreweho ubwo yategekwaga kwegura ku ngufu. Ukukweguzwa kwe kukaba kwaraturutse ku buryo yarakaje Kagame cyane ku buryo byaviriyemo Kagame kumena amadarubindi yari yambaye kubera umujinya. 

Uwo mujinya waturutse igihe Col Joseph Karemera yari minister w’amashuli then Pasteur(president) bari mu nama atonganya cyane Karemera(kubera amakosa yari yakoze ariko bitewe na Kagame kugirango ananize Bizimungu mu mitegekere), hanyuma arahindukira areba Kagame amuhamagara n’agasuzuguro kenshi ngo “Kagame, akira abasirikare bawe”! Kagame yararakaye, arongera ararakara pee! Ngo umujinga w’umuhutu ansuzugure imbere y’abantu banjye sha, ndumwe n’imbwa sha, ndumwe n’imbwa! Icyo gihe Kagame yahise atangira gukaza gahunda ye mu kwirenza Bizimungu, atangira kwanga gusinya amwe mu madosiye  kugeza amwirengeje. Ikibi kiruta ibindi kuri Kagame ni uko niba arakaye, umujinya we ntushira ahubwo uriyongera. Niyo mpamvu usanga umurakaje wese ashirwa aruko amwishe cyangwa amukenesheje bishoboka

. Ibyo abiterwa n’indwara y’igifu yamuzonze igatuma atanywa inzoga(anywa juice n’amazi) ndetse na Soda ntayemerewe kubera gaz. Iyo rero arakaye kandi akunda kurakara, igifu kiba kirekereje  kigahita kimwadukira nawe si ugukaza umujinya ye!  Iyo arakaye mwongera kuvugana iyo mugize amahirwe Arsenal FC(ya kipe yo mu bwongereza) igakina kandi igatsinda. Icyo gihe Kagame arishima kandi ukabibona kuko akunda iyi kipe cyane ku buryo iyo Arsenal iri bukine ntatangwa uwo mukino. Hari igihe ntibuka neza ibirori byabaye nko muri 6years ago, Arsenal yagombaga gukina na West Ham icyo gihe Kagame yari avuye ku Gisenyi agomba kuza kwifatanya n’abandi muri ibyo birori bikomeye. Ariko bihutishije ijambo rye ryatangiye igihe kitari giteganyijwe, ahita agenda abantu basigara babyibazaho. Icyari kimujyanye shishi itabona ni match!

Jenerali Kazura rero ukurikiranye imizamukire ye, ukareba uburyo afite ijambo (kuburyo adatinya no kurwana cg gutuka ba byara ba Kagame nka Major Kanyoni na Kapiteni Rushema kandi ari abagabo badapfa gukorwaho)bikwereka ko mu Baperezida Kagame yishe, Ndadaye ashobora kuba yaramushimishije cyane. Uko kugirwa igikomerezwa bya Afande Kazura byatumye abantu benshi babihomberamo. Urugero natanga ni urwa Serija Otakenge, wahawe ipeti na rya sous-lieutenant na Lt Col Ibingira hanyuma Majoro Kazura akanga kurisinyira (kugirango yerekane gusa ko ari igihangange) biviramo Otakenge kudezatinga. Uyu Serija Otakenge niwe warashe umusirikare w’umufaransa mu ivi kuka Butare (I Butare) mu mpera za June, 1994 (abari mu Rwanda icyo gihe niba mwibuka neza mu makuru ya saa sita na 45, bavuze ku iraswa ry’uwo musirikare aho bavuze ko Inkotanyi zatangiye kwadukira n’Abanyamahanga zikaba zarashe Umufaransa).

 Icyo gihe Ibingira yakunze cyane Otakenge kuko atamutabye mu nama igihe Kagame yari yamuhagaye ku cyombo amubuza kwinjira umujyi wa Butare kubera warning yari yahawe n’Abafaransa ko bari bukoreshe ibitwaro bya kirimbuzi niba Inkotanyi zikomeje kwadivasinga. Ibingira yanze kumvira Kagame kandi Kagame ntacyo yamutwaye. Kutagira icyo amutwara byerekanye neza ko Ibingira yahawe icyubahiro mu kwica Abasenyeri I Kabgayi. Ibi bikagaragazwa n'uko yanze kumvira Boss maze ntabihanirwe kandi wasubira inyuma gato ku bisa neza n’ibya Ibingira ariko ho hakaba hari I Rebero ya Kigali aho Lt Col Fred Nyamurangwa yari ayoboye ingabo zir ikuraswa cyane biturutse ku muliyetona wo kwa Habyara wari wihishe mu mpunzi afite Radio akajya akominikana agaha na direction yaho ex far zigomba kurasa, byatumye  Kagame arakara cyane amuhamagara n’umujinya mwinshi ngo nakure abasore be ku I Rebero, Nyamurangwa nawe amusubiza n’umujinya(atewe n’umubare munini w'abari gupfa) ko atava Rebero atahafashe (siwezi kutoka hapa bila kukamata Rebero).

 Ibi byatumye Kagame amugororera kumuhimbira icyaha cyo kwiba inka 3 maze amukuraho amapeti yose kuko yamusuzuguye kandi atari umwicanyi nka ba Lt Col Kayonga bari kurimbagura imbaga z’abasivile hakurya ya Rebero mu Rugando. Ubwo Lt Col Nyamurangwa yakurwaho amapeti yose ngo yibye inka 3, Lt col Kayonga yari amaze kunyaga ubushyo bw’abaturage muri gishwati maze ahita azamurwa mu ntera . Hanyuma wakonkoboka mu majyepfo, ugahura na LT Col Ibingira nawe amaze kurimbagura imbaga y’Abahutu ibihumbi n’ibihumbi I Kibeho, ari kugenda agana mu Kiyovu cy’abakire I Kigali ngo abe aruhutseho gato. Ngibyo bimwe nabimwe bituma ba Mbangurunuka bagumuka batitaye ku inshyushyu  bari guhabwa!

Nsoza reka nshimire Nkusi Joseph kuri email ye! Komera cyane uri umugabo kandi imyambi uri kurasa ntiri gufata ubusa ahubwo irasatira icyico! Muhumure Kagame aho ageze ari kugendana na Nyamunsi kandi Nyamunsi ntumenya igihe akunanguriye n’ejo wakumva bibaye impundu zigataha I Rwanda!

NB: Mwibuke neza (abakurikirana amateka) ko ingoma ziri hafi cyane guhirima zigira abantu nka ba Mbangurunuka Paul. Wowe uracyeka Mabngurunuka yaba ari nde ugereranyije na ba Mbangurunuka b’izindi ngoma zisa nk'iyi ya Kagame?! 

 ………………………………………….

Mukomere cyane kandi mukomere kumurava!

MBANGURUNUKA Paul

inshuti ya Shikamaye.blogspot.no