1990 - 2014, INYUNGU BWITE ZA PAUL KAGAME ZIMAZE GUTUMA BURI MUNSI MU KARERE K’IBIYAGA BIGARI AHITANA ABATURAGE 913 B’INZIRAKARENGANE MU MYAKA 24 YOSE !!!!!

«Abaza kumpagarara hejuru bantonganya ngo kuki nishe Col. Patrick KAREGEYA, mu kurengera inyungu z’ibihugu byabo, baba bishe abaruta Karegeya inshuro igihumbi!!!» Kagame muri Kigali Serena Hotel kuri 12 Mutarama 2014 (in his speech at 30min 02sec), «Jye nasinyiye guhangana! N’ibindi bikaze cyane abantu babihanganamo, niba se Col. Patrick KAREGEYA yarashakaga kunyica ku bw’inyungu ze, kuki njyewe ntamwica ku bw’inyungu zanjye!!!» Kagame muri Kigali Serena Hotel na none kuri 12 Mutarama 2014, (in his speech at 35min17sec), «Dufite uburenganzira bwo kwica abashaka natwe kutwica!!!» Kagame mu kiganiro na Francois Soudan wa Jeune Afrique.

Mu 1990 ku italiki 01 Ukwakira, FPR itera u Rwanda kuri uwo mugoroba nari mfite imyaka 13 y’amavuko kandi ndabyibuka neza kuko amakuru y’icyo gitero yasakaye mu Rwanda hose ku isaha ya saa kumi n’igice z’umugoroba. Icyo gihe nigaga mu mwaka wa 6 w’amashuri abanza nkaba nari naracyerereweho umwaka umwe kubera kuragira inka zo kwa sogokuru n’iz’iwacu ariko ibi ntacyo byishe cyane kuko bitambujije kurangiza Kaminuza.

Serena Hotel 12/1/2014 Kagame yigamba ko yishe Karegeya Patrick

avuga ko agiye no kwica abandi benshi bari hanze y'igihugu

Hano muri SHIKAMA dukunda gutanga ingero zifatika kandi tukanitangaho ingero iyo ari ngombwa tukagaragaza ubuhamya bw’ibyo twabayemo kuko tuba ducyeka ko bwabubaka. Namwe mujye mufata akanya mutwandikire mutubwire ubuhamya bwanyu tuzajya tubutambutsa mu mwimerere w’uko 

mwabuduhaye rwose. Icyo tuzakosoramo ni amakosa n’imyandikire y’IKINYARWANDA muri SHKAMA twubaha bikomeye ururimi rw’abakurambere bacu kandi natwe iyo tugiye kubategurira inyandiko turarwitondera cyane.

Reka nsubire ku bijyanye n’umutwe nahaye iyi nyandiko : Mu minsi ibiri yakurikiyeho, ubwo hari ku italiki 03 Ukwakira 1990, mu gihugu hose, batanze ikiruhuko cyo kujya kwishimira ko ngo General Major Fred RWIGEMA yivuganywe n’inzirabwoba zo kwa Habyarimana.

Nibuka ko uwo munsi abasirikari baje bakadusohora mu ishuri twese batavanguye amoko bakadutegeka kujya mu rutoki rw’ikigo cy’ishuri nigagaho gutemamo imitumba y’insina ngo tujye kuyihamba bisobanuye guhamba amagufwa ya Gen. Maj. RWIGEMA Fred. Nkurikije imyaka nari mfite icyo gihe numvaga ntumva neza ibirimo kuba mu gihugu cyanjye cy’u Rwanda. Nibuka ko abantu bose batemye imitumba bakajya guhamba Rwigema.

Nyuma naje kumenya ko uwasimbuye Nyakwigenera Fred Rwigema ngo yitwa General Major Pawulo KAGAME. Kagame uyu sinari muzi na busa; uko iminsi yagiye ihita nakomeje kwibaza Kagame uwo ariwe, nyuma nza kubona ifoto ye bwa mbere mu buzima bwanjye ku kinyamakuru cya KANGURA / KANGUKA cyandikwaga na NGEZE Hassan bashushanyijeho Kagame azonzwe cyane bamwometseho amagambo agira ati : «Ni jye ingirwa-majoro Pawulo Kagame, iyi mva iri iruhande rwa mukuru wanjye Rwigema irantegereje mbere y’uko itahuka ry’abatutsi rigera!!!»

Iyi nteruro ikaba itazamva mu mutwe kugera igihe nzagira mu gitaka kuko mpora nyibazaho, muri macye abo mu butegetsi bwa Habyarimana bifuzaga ko Kagame yapfa mbere y’uko itahuka ry’abatutsi rigera. Maze kubona iyo foto ya Kagame nibajije niba hari umuntu uzonzwe bene kariya kageni ushobora koko kuba ariwe Kagame kuko nakekaga ko NGEZE Hassan yamutubije mu rwego rwo kumwangisha abaturage.

Uko iminsi yagendaga ihita niko intambara yacaga ibintu mu gihugu ariko kandi ni ko nanjye nagendaga ndushaho guca akenge kuko Perezida wa Repubulika y’u Rwanda Nyakwigendera General Major HABYARIMANA Juvenal yicwa ku italiki 06 Mata 1994 nigaga mu mwaka wa 3 w’amashuri yisumbuye. Murumva ko rwose nari maze kuba umusaza.

Nakomeje kwibaza ku muntu witwa Kagame ariko nza kumenya uwo ariwe ku italiki 19 Nakanga 1994 nkaba ngira ngo nibutse abari bakiri bato ko uwo mugoroba aribwo hashyizweho guverinoma y’inzibacyuho aho Pasiteri BIZIMUNGU yabaye Perezida wa repubulika udafite icyo avuze, Kagame Paul akaba visi Perezida naho TWAGIRAMUNGU Faustin akagirwa Minisitiri w’intebe.

Icyanteye kuzinukwa Kagame guhera kuri iyo taliki na n’uyu munsi akaba atajya anjya ku nzoka n’iyo yampa iki, ni uko, kubera ko twari twarajyanywe n’inkotanyi ku Ruhuha mu Bugesera, Kagame yatanze amabwiriza ku basirikari be yo gutwikira mu mazu abahutu benshi bari batuye ku Ruhuha ku nkengero z’ikiyaba cya Cyohoha y’epfo bazira ubusa.

Icyo gikorwa kigayitse cyatumye Faustin TWAGIRAMUNGU abaza Kagamea ati : “Izo ngabo ndimo kumva zishyira abaturage b’abanyarwanda ku ngoyi ni abenegihugu cyangwa ni abacanshuro ???” Igisubizo Kagame yahaye Twagiramungu ntabwo amategeko y’itangazamakuru anyemerera kucyandika hano kuko mu itangazamakuru ry’umwuga tutemererwa gukoresha imvugo nyandagazi ariko ndacyizi ari nacyo cyatumye Rukokoma ahunga na n’uyu munsi akaba yibera mu Bubiligi.

Kagame wo muri 1990 niwe wo muri 2014  

Nakomeje kugenda nitegereza Kagame ibyo yakomeje gukora ageze ku butegetsi aje no kuba Perezida wa repubulika, nagiye nkurikirana abo yicishije abaziza ubusa batabarika, n’ibindi byemezo yagiye afata bihubukiwe bikomeye ku buryo nahise mbona ko ashobora kuba afite ikibazo mu mutwe no mu mitekerereze ye gikomeye mbese ko atari akwiye gutorerwa kuyobora abanyarwanda.

Ubwo namwibazagaho ibyo byose kandi si jye jyenyine gusa kuko n’abandi bakomeje kugenda bibaza uko uyu mugabo ategeka, naje kubona ko Kagame wo mu 1990 ariwe Kagame nyir’izina wo mu 2014. Ikibazo rero nibajije muri iri sesengura ryanjye ni impamvu Kagame adahinduka na gato kandi afite abajyanama mu birebana na politiki mu kazi ke ka buri munsi.

Amagambo menshi mu yo Perezida Kagame yagiye avuga, nagize amahirwe yo kuyabika mu bubiko bwanjye kuko muri uko kwiga amashuri nabashije kugirwa umunyamakuru w’umwuga ndangije Kaminuza kandi nkaba nywumazemo imyaka myinshi. Ibyerekeranye n’u Rwanda nta wagira icyo ambeshya, nduzi uko bikwiye.

Kagame mu mbwirwaruhame ze zose, usanga ijambo KWICA arigarukaho cyane nk’aho yarihaweho umurage n’abamutoje bakamwinjiza muri Politiki. Mu magambo yose avuga arangwa no GUHUBUKA GUKABIJE. Kagame ndamuzi neza kuko muri uwo mwuga wanjye w’itangazamakuru mazemo igihe n’ubu nkaba nkiwukora nabashije kwitabira ibiganiro yagiye agirana n’abanayamakuru muri Village URUGWIRO nkaba naragiyeyo inshuro zirenga 46 tukicarana ku meza amwe mubona imbere yanjye nawe ambona hafi ye cyane.

Perezida Kagame ni umuntu wanga icyitwa UMUNYAMAKURU mu maraso ye kumubaza ikibazo bikaba ari ikizira. Ndibuka ko umunsi umwe nigeze kumubaza ikibazo cy’impamvu adashaka gushyikirana na FDLR kandi nabo ari abanyarwanda ahaguruka mu ntebe yari (atetsemo) ashaka kuza kunkubita urushyi ABAJEPE baraza bandyamaho ahita asubira mu byicaro bya Nyakubahwa.

Kuba umuntu wari umwicanyi mu 1990 akaba amaze imyaka 24 yarahindutse RUHARWA kandi abantu badasiba kumwamagana ni ukuvuga ko Kagame umutima we wamaze kuba AKAHEBWE bikaba bisobanuye ko u Rwanda rusigaye rutegekwa n’ICYIHEBE CY’UMUSAZI.

USA igomba gucyemura ikibazo cy’u Rwanda byihutirwa ikadukiza Paul KAGAME kugira ngo u Rwanda rudahinduka umuyonga rukongera gutemba imivu y’amaraso (The United State of America must quick-resolve Rwandan problem if They do not like to watch a new bloodily tragedy in our country of thousand hills)

Kagame akiri inyeshyamba

Iyo twandika ibintu nk’ibi ntituba tuyobewe uburemere bwabyo ariko ni uko tuba tubona ibimenyetso byose byuzuye kugira ngo mu Rwanda habe ishyano. Njyewe wandika iyi nkuru nzi neza ko Kagame yateretswe ku butegetsi na Leta Zunze Ubumwe z’Amerika kandi iki gihugu kizwi hose nk’igiharanira Demukarasi n’uburenganzira bw’abaturage. Uyu Kagame kandi zahaye ubutegetsi zimukekamo umugabo w’umunyabwenge, we amaze kwerekana ko ntabwo azi ndetse AMERIKA atazi iyo ariyo.

Mu ijambo rutwitsi Kagame yavugiye muri KIGALI SERENA HOTEL ku italiki 12 Mutarama 2014 nkaba narabashije kurifata ryose ubu nkaba ndibitse, iryo jambo rikaba ryaramaze iminota 40min13sec ageze ku munota wa 30 n’amasegonda 02, yagize ati : « Abaza kumpagarara hejuru bantonganya ngo kuki nishe Col Patrick KAREGEYA, mu kurengera inyungu z’ibihugu byabo, baba bishe abaruka Karegeya inshuro zirenga igihumbi!!!»

Iyi mvugo irimo ibintu bine byuzuyemo ubuswa, kureba hafi kandi byose biteye agahinda: Icya mbere ni uko Kagame yashyizweho na Amerika ikaba yarahemukiye abanyarwanda iduha umutegetsi w’UMWICANYI RUHARWA. Icya kabiri ni uko Kagame kuko Amerika yica abantu byamuhaye uburenganzira nawe bwo kwica.

Hano akaba atazi Amerika iyo ariyo n’uko ikora kuko USA, mu mateka yayo ndetse no mu ndirimbo yayo yubahiriza igihugu yitwa STARS SPANGLED BANNERS basezerana ko batazica umwenegihugu mu gihe Kagame we abanyarwanda atumaze, n’abasigaye tukaba dusigaye dusenga Imana ngo imudukize kuko tuba tuzi ko umunsi ku munsi yaguhitana cyangwa akampitana.

Icya gatatu kirimo ni uko Kagame yamennye ibanga abanyamerika bari baramubikije ubwo bamwicazaga muri Village URUGWIRO mu 1994. Kuba yaravuze kuriya byerekana ko amasomo yo kwica yayakomoye muri USA kandi ko ntawe ukwiye kumubuza kuniga abo ashaka kuniga atitaye ku mategeko mpuzamahanga n’ayo igihugu gifite mu nyuguti arengera uburenganzira bw’umuturage.

Icya kane ari nacyo kirushije byose gutera agahinda umunyarwanda ushyira mu gaciro, Perezida Kagame yigize IKIGIRWAMANA kuko bisa n’uko yiyumvisha neza ko nta muntu n’umwe ushobora kuzamuryoza abo yirirwa aniga, ahotora, anyonga, arigisa, ashimuta kuko ngo n’ibihugu bikomeye bibikora. Ibi sibyo rero kuko nta maraso y’umuntu ahera!!!

« Jye nasinyiye guhangana! N’ibindi bikaze cyane abantu babihanganamo, niba se Col. Patrick KAREGEYA yarashakaga kunyica ku bw’inyungu ze, kuki njyewe ntamwica ku bw’inyungu zanjye!!!» Kagame muri Serena kuri 12 Mutarama 2014, (in his speech at 35min17sec)  

Muri iri jambo Kagame yavugiye muri KIGALI SERENA HOTEL, ageze ku munota wa 35 n’amasegonda 17 yagize ati: « Jye nasinyiye guhangana! N’ibindi bikaze cyane abantu babihanganamo, niba se Col. Patrick KAREGEYA yarashakaga kunyica ku bw’inyungu ze, kuki njyewe ntamwica ku bw’inyungu zanjye!!! »

Muri iyi mvugo, Kagame yemeje abanyarwanda n’isi yose ko ari perezida we ku giti cye kandi ko atakiri perezida w’abanyarwanda. “Kuki ntamwica ku bw’inyungu zanjye” birerekana ko Kagame atatekereje uwo yariwe mbere yo kujya kwigamba aya magambo mu masengesho.

Kubwira abantu bose ko n’ibindi bikaze abantu babihanganamo, kandi hari itangazamakuru byerekana ko Kagame ashobora kuba yararakajwe cyane n’ibyo bamutonganyije bamubwira akabwira abari bamuri imbere yirengagije ingufu z’ibitangazamakuru byari bihari.

Ariko iyi nteruro inabumbatiye kamere ya Kagame idakurwa na reka yo kwikunda bikabije akagera n’aho yisanisha n’igihugu cyose mu izina rye. Rwose nzi neza ko Kagame ari Perezida w’u Rwanda ariko ububasha yahawe n’amategeko abukoresha nabi cyane kuko, nk’uko mpora mbyandika, nta burenganzira bwo kuvuga ibintu byose afite kuko natwe abanyamakuru hari ibyo tutandika kandi tubizi tubifitiye n’ibimenyetso bifatika.  

Perezida Paul KAGAME si umunyarwanda, si n’umunyafurika!!!

Rwose biraboneka ko Perezida Kagame mu makosa akora mu kazi amenshi ayakora kubera kutiga ari naryo Amerika na Museveni baduhemukiyeho, ntibyumvikana ukuntu wafata umuntu utararangije n’ayisumbuye ngo ategeke igihugu. Ibi rwose ntibyagombaga kubaho. Nkaba mbona MUSEVENI na CLINTON bakwiye kuzafata umwanya bagasaba abanyarwanda imbabazi.

Muri Kaminuza twigaga isomo ryitwa ANTHROPOLOGIE. Umwarimu waritwigishaga yari umusaza ukuze cyane witwa Prof. Dr GAHIGI Gerard. Uyu musaza aherutse kwitaba Imana mu bitaro Roi Kareddy i Bujumbura azize indwara. Imana imwakire mu bayo!

Uyu GAHIGI yari umunyarwanda kuri se na nyina kandi yari yarize amashuri menshi cyane. Ubundi imiterere y’iri somo rigaruka cyane ku mico y’abakurambere n’imibereho byabo bityo ukiga uko wabaho muri iki gihe utabusanije n’umuco w’abakurambere mu migenzo yabo myiza.

Mu muco w’abanyafurika DUTINYA UMUPFU cyane. Kugira ngo mubyemere, iyo hari umuturage waroze umuturanyi we agapfa, mu gihe cyo kumushyingura uwamuroze ntabwo yahahinguka kuko bavuga ko amubonye yahita apfa. Ibi ariko sibyo ndabigarukaho mu kanya.

Icya kabiri iyo tugeze ku irimbi tugiye gusezera bwa nyuma ku muntu wapfuye, muzumva kenshi abo mu muryango we bavuga bati: “Yari umuntu mwiza, yari inyangamugayo, yari indashyikirwa,…ndeste niba hari n’umuntu mu bari aha yaba yari afitiye ideni yatubwira tukamwishyura kugira ngo agende ntawe bafitanye ikibazo!!!”

Bavandimwe, basomyi ba SHIKAMA uko ngana uku maze kujya ku irimbi gushyingura abantu barenga 50 aho nagiye hose aya magambo aravugwa ariko nta muntu ndabona utinyuka kumanika ngo avuge ati uyu mupfu amfitiye ideni. Kandi hari umugabo rwose nzi witabye Imana arimo undi miliyoni enye (4,000,000 Rwf) ariko uwambuwe aryumaho!

Ibi rero bifite imvano n’inkomoko muri wa muco wacu w’abakurambere kuko abana ntibaba babuze se wari kuzabarera, umugore abaye umupfakazi kandi tuzi neza agaciro k’umugabo ku mutima w’umugore we, ngo nawe ujye aho urogotwe ngo yanyambuye za miliyoni kandi tuzi neza ko ibintu bishakwa bikaboneka.

Kuri iyi ngingo, Kagame yishe umuco nyafurika aho yiteranije n’umuryango wa KAREGEYA Patick yemeza ko yamwishe kandi n’iyo ataza kubivuga ntitwari tuyobewe ko ariwe wamwishe. Si ngombwa rero kwiteranya n’uwigendeye ari naho mpera mvuga ko Kagame ashobora kuba arwaye indwara yo kwica akanabyigamba. Si byiza rero gusuzugura umuco w’abakurambere witeranya n’uwarangije ake yiruhukiye mu gihe n’uwaroze umuntu bamukubita bakamuhindura inoge bagira ngo abemerere ko ariwe wamwishe agahakana agatsemba.   
  

Dufite uburenganzira bwo kwica abashaka natwe kutwica!!!

Interview Kagame aheruka kugirana na Francois Soudan wa Jeune Afrique iri kuri iyi link:
interview Kagame aheruka kugirana na FRANCOIS Soudan wa Jeune Afrique

ikinyamakuru Jeune Afrique

Iyi ni interuro Perezida Kagame yavugiye mu kiganiro yagiranye na Francois Soudan wo mu kinyamakuru JEUNE AFRIQUE asigaye yaritomboreye maze akamuha ibya Mirenge ku Ntenyo ngo amutambukirize ibitekerezo bye byuzuyemo ubuswa, kwishongora, kwica ku bantu, gusuzugura abandi bayobozi bo ku isi,…

Muri iki kiganiro Kagame, nta n’isoni yaravuze ngo :“Dufite uburenganzira bwo kwica natwe abasahaka kutwica.” Muri iyi mvugo Kagame arafata abanyarwnda bose agashaka kubategeka kwica kuko mu iyigamvugo dusesenguye iyi “DU-fite” ihinduka TU-/ isobanura ubwinshi bw’abantu ishobora guteza ikibazo muri rubanda.

Kuko Kagame ategeka igihugu kirimo miliyoni 12 z’abantu kandi abaturage batajya muri izi nduruburi za politiki twirirwamo bakaba bumva icyo avuze ko ariko kuri, bashobora kumva ko bose abahaye uburenganzira bwo kwica kandi niko biri. Mu 1994, Kambanda yavuze ko imbunda atari iy’umusirikari gusa abaturage barica.

Ariko hano yakabije kwerekana ko arwaye indwara yo mutwe no kuba icyihebe kuko atari kuvuga atya. Niba koko hari abantu Kagame azi neza ko bafite umugambi wo kumwirenza, yashoboraga kuvuga ati: “Dufite uburenganzira bwo kwirwanaho ku bashaka kutwica” cyangwa nibura n’uruburaburizo akavuga ati: “Ku bashaka kutwica, dufite uburenganzira bwo kubashyikiriza ubutabera” Ikindi kinatangaje ni uko agaragaza ko atinya gupfa mu gihe abo yohereje ikuzimu kwa Nyamutezi batari babikwiye bamaze kuba Miliyoni 8 mu karere k’ibigaya bigari mu myaka 24. Ni ukuvuga ko, uhereye mu Kwakira 1990, Kagame yivugana (ategeka ko hicwa) inzirakarengane 913 buri munsi.

Ibi mbivuze kuko akaga kose kabaye mu Rwanda no mu karere k’ibiyaga bigari n’abantu bose bahaguye, inyerezwa ry’umutungo w’igihugu, icungwa nabi ry’umutungo wa rubanda, byose bigomba kujya ku gahanga ka Paul KAGAME. Ni ukvuga ko 8,000,000 uzigabanyije n’iminsi igize imyaka 24 (iminsi 8760) wahita ubona ko buri munsi hapfuye abaturage 913 kandi n’ubu bagipfa ndetse hagiye no gupfa benshi bisumbuyeho kuko Kagame yabyigambiye i Nyabihu.

Imiryango yose yabuze abavandimwe tuyisabye gukomeza kwihangana ariko nta n’uwaba akoze ikosa yibajije uko bizagendekera ihirima ry’ingoma y’umuntu wishe abaturage miliyoni umunani ndetse zinarenga. Ni aha Nyagasani ari nayo mpamvu nongera gusaba USA gusubira mu kibazo cy’u Rwanda Kagame bakamwirukana ku butegetsi ku bufindo aka wa mugani wa MAGAYANE kandi uko USA (United States of America) itinda gucyemura ikibazo niko Kagame akomeza gutamika abanyarwanda ubuvunderi bwe bwo kurimbura imbaga dore ko we nta soni zo kubikora afite ndetse nta n’izo yigeze!  

Ntitwasoza iri sesengura tutabwiye abasomyi bacu ko mu kiganiro Kagame yagiranye na Jeune Afrique yagaragaje ko ashyigikiye SHIKAMA yacu aho yagize ati :  “Ducunga umutekano n’ituze by’abaturage bacu dushingiye ku mategeko, kandi tubikora tuzi neza ko ibyo dukora bigenzurwa n’amahanga ariko ibyo ntibizatubuza GU-SHIKAMA, gufata ibyemezo, guhaguruka no kwiyemeza mu rugamba tubarwanya.”

Subya!!! Subya!!! Subya!!! Sigaho!!! Sigaho!!! Sigaho mutware!!!  

Mahoro M.
shikamaye.blogspot.no
Shikama ku Kuri na Demukarasi(SKUD)

Imbaga y'inyabutatu isobotse ihuriye kuri Rwanda rwa Gasabo, ubu yahindutse imbaga ya batatu b'amaherere bahuriye kuri Rwanda Kagame!/Bakizimbwa Paul Kizito

                                     Batatu basimbuye INYABUTATU

Intandaro y'amahano yagwiriye u Rwanda kuva aho uwari Umukuru w'Inkotanyi Jenerali Majoro Gisa Rwigema yishwe agasimbuzwa Kagame, u Rwanda rw'inyabutatu isobotse (Gahutu, Gatwa na Gatutsi) yahise itangira inzira yo guhinduka imbaga ya batatu(J. Kabarebe, J. Nziza na J. Musoni ) ihuriye kuri Rwanda y'umuntu umwe ariwe Kagame.

TUZIRIKANE IJAMBO RY’IMANA LITURUJIYA YA KILIZIYA GATULIKA YATUGENEYE KURI IKI CYUMWERU, TALIKI 22 KAMENA 2014 : « UMUNSI MUKURU W’ISAKARAMENTU RITAGATIFU RY’UKARISITIYA» Isomo rya mbere : Ivugururamategeko : 8,2-3.14b-16a Isomo rya kabiri : 1 Abakolinti : 10,16-17 Ivanjiri : Yohani : 6,51-58 : «Abanyarwanda dukeneye umwenegihugu w’intwari wakwemera guhara ubugingo bwe akaduhesha umugati usumba uwo umunyagitugu Kagame na FPR birirwa baduhatira; bityo u Rwanda rugatemba amata n’ubuki n’abanyarwanda bagatunga bagatunganirwa!!!» Abatagatifu : Pawulini wa Nole, Yohani Fisheri, Tomasi More na Albani

Mu mibereho y’abantu uhereye mu gihe cy’amateka tudafitiye ibisobanuro bihagije  kuko cyabayeho cyera cyane kikaba kizwi nka antiquité (les temps immémoriaux), ukagera muri Moyen age, temps moderne ndetse no mu gihe cy’amateka turimo ubu cyabatijwe Epoque contemporaine, aha hose hagiye hakoreshwa ijambo umugati.

INYANDIKO ZO MU BUBIKO. Umuco: Tumenye imyandikire y'ikinyarwanda /NKUSI Yozefu

                          Iyi nyandiko yaciye bwa mbere kuri Shikama kuri 5/12/2013

Nsekalije Aloys

Ntabwo abanyarwanda aribo bonyine bahuye n'ingaruka zo kubohwa na FPR gusa kuko n'ururimi rwabo rwahanegekariye. Baca umugani mu kinyarwanda ngo umwera uturutse i Bukuru bucya wakwiriye hose. Kuva Inkotanyi zakwigarurira Urwanda ku ruhembe rw'umuheto, abiyita abategetsi bagiye barangwa no kuvangatanya ibirimi bakuye  mu bihugu duturanye babivanga n'ikinyarwanda ubu  cyabaye agasitwe k'urwo ruvange. Nta mutegetsi n'umwe muri bariya bo mu nzego zo hejuru ufata ijambo imbere y'abaturage ngo arangize adashyizemo icyongereza: "so" niyo ikunda kubamo nyinshi, "actually", n'ibindi. Igiswayire nacyo nticyahatanzwe, ugira utya ukumva n'undi mutegetsi arikaniriye imbere y'abaturage ati: "murakora kweli, mukwiye gushimwa na his excellency ". Si mu mvugo gusa kuko n'ikinyarwanda bandika giteye ubwoba! Dore ingero za bimwe muhura nabyo mu binyamakuru byabo.

Ibyahishuwe bya 6:Uko byagendekeye Kizito Mihigo byamenyekanye. Nutagira umutima ukomeye, urarira!

      Kizito mu nzira y'umusaraba yashyizwemo n'abishakira amaramuko n'ibyubahiro badakwiye.

Ngo agatinze kazamera ni amenyo ya ruguru. Ukuri ku ibyo Kizito yazize kurashyize kugiye ahagaragara.

Nyuma y'uko Umuhanzi Kizito Mihigo atawe muri yombi ashinjwa ibyaha biremereye kuruta iby'umusirikare wo mu rwego rwa Jenerali washatse guhirika ubutegetsi, isi yose yabaye nk'ikubiswe n'inkuba, abantu benshi batangira kwibaza niba koko azize ukuri cyangwa ari wa mukino w'urukozasoni wa FPR.

Mutambagire imbuga za SHIKAMA murusheho kuvumbura ukuri!!!

1. Inyandiko nshya ku byerekeye iraswa ry'inzirakarengane ririho rikorerwa mu Rwanda; hari n'amafoto y'umujyi wa Kigali. Ni kuri Shikama Magazine
2. Ibyaahishuwe bya 6: ukuntu Mitali na Musoni bagambaniye Kizito Mihigo. Ni kuri Shikama2( inyandiko iraboneka saa 12.00 GMT)

Muryoherwe

UBUYOBOZI BWA SHIKAMA
 

Kagame akomeje kwihesha agaciro aca umubano n'abamucaniye!: Amerika yayikuruye amatwi naho France arayisenyera ejo mu gitondo ku wa 19/6/2014

Mr I do not care( Ntacyo bimbwiye)

Mwene Rutagambwa akomeje kwereka amahanga ko Kagame wo muri 2014 ari wa wundi wo muri 1994.

Kugirango twibutse abari bataravuka, ni uko muri 1994 igihe igice kimwe cy'abanyarwanda cyariho cyicwa bunyamaswa n'Interahamwe n'ibyitso bya Kagame, France yasakuje cyane ihamagarira amahanga gutabara kugirango akore inguni(corridor) hafi y'i Burundi abahunga bakarindirwamo umutekano, Kagame yemeza ko uzajya gutabara azamurasa ahubwo ategeka ingabo za Loni kuva mu Rwanda bidatinze. Ibi byose yabikoraga ku ibanga yari aziranyeho na Museveni wa Uganda na Clinton wayoboraga USA. Ingaruka z'uko kwikunda, irari rirenze kamere ry'ubutegetsi ritagira umutima wa kimuntu, twarazibonye kandi buri munyarwanda wese aracyazirengereye.

Ibyahishuwe bya 4: Indagu z’Abahanuzi Nyirabiyoro na Magayane zigeze ku musozo! Amerika yamukatiye, agahinda agatura ibyegera bye. Kurikira!

Uyu ni Magayane wahanuye ko umuzungu uzaha ingoma abicanyi ba FPR azayibakuraho mu bufindo.

Kuba Kagame atararaswa umwambi w'igishirira n'umwe mu muryango we akaba n'inshuti ye magara nk'uko umuhanuzi Magayane yabihanuye, kuba ubwatsi bw'epfo na ruguru butarahura nk'uko Nyirabiyoro yabiraguye, no kuba Umwami Kigeli ataracyurwa n'umusaza usheshe akanguhe Twagiramungu F. nk'uko Magayane yabivuze, Ibi byose sibyo byatuma ubuhanuzi bw'aba bahanuzi bakomeye, umuntu atavuga ko bugeze ku musozo.

Gahunda yihariye :Kigali mu mafoto

Shikama yatangiye gahunda nshya yo kubagezaho uko Kigali iteye muri iyi minsi, hakoreshejwe amafoto ariho   afatwa n'abanyamakuru bacu bari hirya no hino mu Rwanda.

Hasi ya buri foto muzajya muhasanga amateka yayo. Kanda iyo link ya  SHIKAMA MAGAZINE ujye kuyareba.

Ubuyobozi bwa Shikama

General MUBARAKA MUGANGA nyuma yo kwigwizaho umutungo yibye mu birombe bya zahabu muri Congo-Kinshasa akuzuza imiturirwa ihenze i Gitarama akanigwizaho ubucuruzi n’inganda muri aka karere byatumye abacuruzi b’i Gitarama hafi ya bose bakinga imiryango barataha

Umucuruzi Jenerali Mubarak Muganga

Ubwo SHIKAMA twabagezagaho inkuru icukumbuye irebana n’ikongoka rya gereza ya Gitarama, twagize bicye tuvugamo birebana n’imiterere y’ubucuruzi mu mujyi wa Gitarama ndetse n’akarengane abacuruzi b’abahutu baho bageretsweho bikozwe na MUPAGASI Fideri na NSABIMPUHWE Venusiti mu mugambi wo kubahindura abatindi nyakujya.

Uyu munsi muri SHIKAMA turasubira i Gitarama ariko noneho mu bucuruzi nyir’izina ndetse turebe n’icyo amategeko abugenga (Droit Commercial) ateganya ku bemerewe kubukora kimwe no kubatemererwa gucuruza ubwo turanarebera hamwe abatabyemerewe abo aribo.

Icyo amategeko avuga ku bucuruzi

Amategeko agenga ubucuruzi avuga ko bukorwa n’umuntu ku giti cye ufite nibura imyaka cumi n’umunani y’amavuko. Itegeko rivuga ko umugabo wubatse urugo akora ubucuruzi amaze kubyumvikanaho n’uwo bashakanye (consentement de l’epous(e)).  

Ibyahishuwe bya 3: Menya Ngeze Hassan wa FPR Burasa Jean Gualbert umuyobozi w'ikinyamakuru RUSHYASHYA wiyita Cyiza Davidson uwo ariwe n'icyo aricyo!Bakizimbwa P.K. aramukubwira amuvuye mu mizi!

Burasa Jean G. 

- umuhezanguni wanga abahutu urunuka

- umukozi w'ikinywamaraso Jack NZIZA
- umwirasi
Ni kuri kuri SHIKAMA2.com

Ubwanditsi bwa SHIKAMA
shikamaye.blogspot.no
Shikama ku Kuri na Demukarasi(SKUD)





                              

Isesengura-mvugo, umurimo, ubutabera n’imibereho myiza y’abaturage «Kuramo (hagurutsa) uyunguyu(…) ushyiremo Madamu wa nyakwigendera Major John BIRASA dore afite Ph.D kuko iyo umugabo we BIRASA aticwa na Perezida Paul Kagame, ubu aba ari General!!» Brig. Gen. Fred IBINGIRA ategeka umuyobozi mukuru wa RWANDATEL guha umugore wa Nyakwigendera Maj. BIRASA John akazi ku ngufu!!!

Fred Ibingira

Urubuga rwanyu SHIKAMA turakataje mu kubagezaho inkuru zicukumbuye kandi zujuje ubuziranenge mu itangazamakuru. Muri iri sesengura-mvugo na politiki mumaze kutwereka ko mukunda cyane kandi natwe bikatunezeza, tubaganirira ku byavuzwe n’abantu bayobora abandi mu Rwanda haba hambere ndetse no mu bihe tugezemo.

Si kenshi muri SHIKAMA twakunze kwandika inkuru zerekeranye n’akarengane kaboneka mu itangwa ry’akazi mu Rwanda kuko ibibazo birimo ari byinshi ku buryo bidusaba kubanza kubyitondera.  Nyamara ntitwirengagije icyo kibazo ahanini cyadukanye kandi kigafata intera idasanzwe mu rwego rurenze imivugirwe.

Fred Ibingira

Fred Ibingira

Fred Ibingira

Uburemere bw’ikibazo cy’akarengane kari mu itangwa ry’akazi mu gihugu cy’u Rwanda burenze ubwo abantu bashobora kumva mu buzima busanzwe. Mu rwego rwo guheza umwuka abahutu n’abatutsi batavuye i Bugande bari mu Rwanda, FPR yahimbye ibigo bingana na bwa buro bwinshi butagira umusururu (ikigage / amarwa).

Itangazo rigenewe abasomyi ba Shikama rirebana n'ubujura bukorwa n'urubuga: http://umudendezo-news.blogspot.com/

Shikama ibabajwe no kumenyesha abasomyi bayo ko hari abantu basigaye bakoresha inyandiko zayo kugirango bibonere amaramuko.

Nta cyaha kirimo rwose gufata inyandiko runaka wakuye ku rubuga runaka ukayishyira ku rubuga rwawe, nkuko imbuga nyinshi zibikora zifashisha inyandiko za SHIKAMA  cyane cyane urubuga www.blpost.com/kandi natwe tukaba tubikora.

Icyaha kiba iyo ufata ya nyandiko ukayitesha umwimerere wayo kugirango uyihindure iyawe kugirango imbuga zamamaza zizere koko ko ibintu biri ku rubuga rwawe ari ibyawe; urugero rero ntiruri kure mujye kureba urubuga: www.umudendezo-news.com/ rufata inyandiko za SHIKAMA n'iza IKAZE IWACU maze rugakuraho amazina y'abazanditse n'urubuga rwazikuyeho bityo rukaba rwiyitiriye inyandiko zitari izarwo!

Muri ubu bucabiranya,  bene imbuga nk'izi baba bishakira amaramuko bakura mu kwamamaza kuri izo mbuga bakoresheje inyandiko zitari izabo, kandi bashoboraga kwamamaza nta shiti bashyize kuri izo mbuga izo nyandiko ariko ntibaziteshe umwimerere wazo. Turamenyesha nyiri uru rubuga ko ibi  byitwa ubusambo bukorerwa kuri internet kandi bihanwa n'amategeko.

Mbere y'uko tumufatira ibyemezo bikarishye tumusabye kutwandikira asaba imbabazi bitarenze itariki ya 19/6/2014, tukaba  tunasaba na bagenzi bacu bo ku rubuga IKAZE IWACU yiba inyandiko zabo akaziyitirira kwamagana ibi bintu bivuye inyuma. 

Dr NKUSI Yozefu

Umuyobozi Mukuru wa Shikama

Oslo, 14/6/2014

TUZIRIKANE IJAMBO RY’IMANA LITURUJIYA YATEGANIJE KURI IKI CYUMWERU, TALIKI 15 KAMENA 2014 : « UMUNSI MUKURU W’UBUTATU BUTAGATIFU » Isomo rya mbere : Iyimukamisiri : 34,4b-6.8-9 Isomo rya kabiri : 2 Abakolinti : 13,11-13 Ivanjiri : Yohani : 3,16-18 : «Ubutatu Butagatifu nk’imfashanyigisho nziza yakunga inyabutatu nyarwanda bityo abanyarwanda bagatera imbere baterana inkunga, bashyize hamwe kandi babanye mu ituze!!»Abatagatifu : Modesiti, Berinarudo wa Mato na Jerimani wa Piburaki

Patiri, Mwana na Roho Mutagatifu

Iyo turambuye cyangwa dufunguye Bibiliya Yera cyangwa Bibiliya Ntagatifu bitewe n’imvugo ikubangukiye, iyo tuyisoma ni henshi tuyisangamo ijambo « Gatatu(3) », uyu mubare mu mvugo ya Bibiliya ufite ibisobanuro byiza kandi byinshi cyane ku buryo bishimishije kuwuzirikanaho.

«Ni uko ku munsi wa Gatatu arazuka (Yezu / Yesu) nk’uko byari byaranditswe.» Uru ni urugero rumwe mu zindi nyinshi zigira icyo zivuga ku gisobanuro cy’umubare gatatu. Nyamara si muri Bibiliya gusa uyu mubare ufite umwanya ukomeye kuko no mu muco nyarwanda umubare gatatu ari ntasimburwa.

Dore ingero zimwe na zimwe : Inyabutatu Nyarwanda bishaka kuvuga (Ubumwe, urukundo n’ubucuti hagati y’abatwa abahutu n’abatutsi), Ijambo gatatu kandi mu kinyarwanda bahora berekana ko rikomeye kandi ariryo ribumbatiye ubumwe bw’abanyarwanda nk’aho mu gisakuzo tugira tuti : Sakwe sakwe : « Twavamo umwe ntitwarya !» Iyo ukishe urasubiza ngo « ishyiga ry’inyuma.»

Itangazo ryerekana impinduka mu nzego z’ubuyobozi bwa SHIKAMA hagamijwe kurushaho kunoza imikorere no guhangana n’inyangabirama zo mu gatsiko ka FPR i Kigali katahwemye gushaka gusenya urubuga SHIKAMA rumurikira rubanda

Dr NKUSI Joseph/Umuyobozi mukuru wa Shikama

Ku italiki 11 Kamena 2013 niho urubuga SHIKAMA rwabonye izuba. Icyari kigambiriwe aricyo na n’uyu munsi duhatanira ni uguharanira ko ukuri gusimbura ikinyoma mu mitegekere no mu mibereho ya buri munsi y’abanyarwanda.

SHIKAMA yaje isanga hari n’izindi mbuga zandika mu kinyarwanda nazo zari zifite umugambi mwiza wo guharanira ko abanyarwanda bagira ubutegetsi bushingiye kuri Demukarasi kandi ziracyawukomeje tukaba tubibashimira.

Urubuga SHIKAMA muri uyu mwaka umwe rumaze rwaciye mu nyanja y’imiraba ifite umuvumba ukomeye ariko kuko nta na rimwe ikinyoma gishobora gutsinda ukuri, turacyahagaze bwuma kandi n’ejo hazaza twiteguye guhangana n’ibibazo bya politiki bihari dukoresheje inzira y’amahoro kugeza ubwo tuzicaza abanyarwanda bose ku ntebe ya Demukarasi maze sekinyoma uyigaramyemo azamenengane abanyarwanda batunge batunganirwe.

Muri ibi bibazo byose, twakoze ibishoboka byose ngo twubahirize amategeko mpuzamahanga agenga umwuga w’itangazamakuru duha urubuga abantu bose bakeneye kugaragaza ukuri kandi twiteguye no kukwakira nawe mu gihe uzaza utugana kuko muri SHIKAMA amarembo ahora akinguye akureshya ngo uze wifatanye natwe mu guharanira kwimakaza Demukarasi no kurandura burundu ingoma y’igitugu iganje mu Rwanda.

Intambara cyangwa se ikinamico rirakomeje hagati y'ingabo za Kagame n'iza FARDC

Kabuhanga iri hariya handitse MUTURA ni muri km nk'eshatu 
ugana ku Birunga. Groupement ya Buhumba
 iri  muri RDCongo hakurya ya Kabuhanga

Ejo niho abantu twese twari tumaze kwizera ko RDCongo igiye kugira amahoro kuva aho ingabo za Kagame zikubitiwe inshuro mu mpera z'umwaka ushize wa 2013 twakubiswe n'inkuba .   Umunsi w'ejo tariki ya 11/6/2014 niho twabyukiye ku nkuru zaturukaga ku mbuga zinyuranye n'ibinyamakuru binyuranye byo mu Karere k'ibiyaga bigari, zavugaga ko abasoda ba Kagame bari babyutse barasanaho n'igisoda cya Leta ya RDCongo. 

Ikarita yerekana Afrika Y'Ibiyaga Bigari

Nyma y'iryo rasanaho, ejo ku manywa niho intumwa za RDCongo zigizwe n'abasivile n'abasirikare zagiye i Kigali kugirango zisabe Kagame n'abasoda  ngo bareke  gukomeza gushotora igisoda cya RDCongo. Ikindi ni uko bashakaga no kubohoza umukaporali wo mu ngabo za RDCongo wari washimuswe n'ingabo za Kagame muri iyo ntambara yo mu rukrerera rw'ejo twavuze haruguru; ibi ntibyabahiriye ariko kuko basanze umukaporali yishwe cyera.

Ese wari uzi ko Abitwa ba GITIFU bahawe gutegeka imirenge hafi ya yose ari abasirikare b'abicanyi kabuhariwe bamwe bitwa abakomando bakorera ku mabwiriza ya Kagame n'umurozi Nziza?BAKIZIMBWA Paul Kizito arakubwira ukuntu aba aribo bazasohoza wa mugambi wa Kagame wo kurasa Abahutu ku manywa y'ihangu!!

- Aba bicanyi ngo ni abana bahawe imyitozo yo guhotora barangije ayisumbuye bahita boherezwa kujya gusimbura igisoda cyambaye cyari hirya no hino mu giturage, bagisimbuza ikitambaye.
- Bahawe amabwiriza na J. Nziza na Kagame
- Nibo batumye P. Bizimungu yeguzwa na P. Karegeya amutunze imbunda ku gatwe
- Baracyazamurwa mu mapeti kandi umushahara wabo urabarirwa hagati ya 700,000 FRWna 1000,000FRW = inshuro 3 umwarimu wigisha muri Kaminuza ufite impamyabumenyi y'ikirenga Ph.D!!!!!! Hahahaa!

Soma aya mabanga kuri shikama2.com

Nkusi Yozefu
shikamaye.blospot.no
shikama ku kuri na Demuakrasi(SKUD)

Mu gihe abantu benshi biteguye gutaha ibirori by’umupira w’amaguru muri Brezil, SHIKAMA tukugezeho amateka y’iki gikombe cya ruhago gihenze kurusha ibindi byose bihatanirwa kuri iyi si ya Rurema

Ikibuga kizakira umukino wo gufungura igikombe cy'isi 2014,
muri Brasil

Kuwa kane, taliki 12 Kamena 2014 amaso y’isi yose araba yerekejwe muri Brasil ku mugabane w’Amerika y’Amajyepfo. Muri iki gihugu niho hazabera igikombe cy’isi cy’umupira w’amaguru. Iki gikombe cyahogoje benshi, kigatuma abazi guconga ruhango bahinduka abaherwe gituma n’abasaza n’abakecuru badasinzira.

Rwanda-RDCongo: intambara yubuye hagati y'ingabo za Kagame n'iza RDCongo

Kuri uyu wa gatatu i saa kumi za mu gitondo , abaturage ba Kanyeshaza iri kuri kilometero 20 mu majyaruguru y'umujyi wa Goma, bakanguwe n'urusaku rw'amasasu rwaturukaga ku irasana hagati y'ingabo za Kagame n'iz'igihugu cya Republika iharanira Demukarasi ya Congo.

Iyo natambara yamaze hafi amasaha ane ngo yaba yatewe n'uko ingabo za Kagame zambutse umupaka zikajya gushimuta umusirikare wa RDCongo muri kariya gace tuvuze hejuru.  Leta ya RDCongo ikaba yohereje intumwa mu Rwanda zigizwe n'abategetsi ba gisivile n'igisoda kugirango  baganire n'u Rwanda ku byerekeye ibohozwa ry'uwo mukaporali wa RDCongo washimuswe n'ingabo za Kagame.

Kuri iyi sabukuru y’umwaka urubuga SHIKAMA rushinzwe, turishimira umurimo wahinduye imitekerereze y’abanyarwanda. Twiteguye gukomeza guhangana n’ibibazo bigihari bibangamira ukuri byitwikira ikinyoma mu ndorerwamo ya Demukarasi abanyarwanda banyotewe nk’uko impala yahagira ishaka amazi afutse. Turashimira abafatanyabikorwa bacu !!

Ku italiki 11 Kamena 2013 nibwo urubuga SHIKAMA rwatangiye. Nk’uko izina ubwaryo ribyivugira «Urubuga» ni ihuriro ry’abantu barenze umwe kandi bafite ibitekerezo bitandukanye bahuriza hamwe kugira ngo bashakire hamwe umuti w’ikibazo runaka baba bafite.

Mu gihe uru rubuga rwatangizwaga na Dr NKUSI Yozefu tunashima cyane kubera icyemezo cya kigabo yafashe, mu gihugu cy’u Rwanda hari ibibazo bikomeye byaje kwiyongeraho n’ibindi bibazo bikaze tugomba guhangana nabyo ari nayo mpamvu ubu tugomba kongera imbaraga karijana ugereranije n’izo twakoreshaga mbere.

Itangazo: ntimucikwe n'inkuru 2 zirebana n'iminsi ya nyuma y'ingoma y'urukozasoni ya Kagame.Ni kuri www.shikama2.com

Inyandiko ya mbere ni iya Bakizimbwa Paul Kizito, naho iya kabiri ikaba iya Baziguketa F.

Muryoherwe.

Ubuyobozi bwa SHIKAMA

OVERBLOG yifurije SHIKAMA isabukuru nziza!

Your blog turns 1 today
Hello Nkusi Joseph, Your blog turns 1 today! The whole Overblog team is happy to wish your blog SHIKAMA a very happy birthday. 1 years deserves a celebration! Tell everybody about it I'm telling all my readers! The OverBlog Team www.overblog.com
Twitter - Facebook - The Team's blog © Copyright OverBlog - Unsubscribe

MU GUHIMBAZA ISABUKURU Y'UMWAKA1 SHIKAMA IMAZE ISHINZWE, HATANGIJWE URUNDI RUBUGA RUSHYA: SHIKAMA2.COM, Soma iri tangazo umenye inyandiko 2 nshya zizahita ejo ku rubuga rushya. Imbuga zisanzwe nazo zirakomeza gukora nkuko bisanzwe(byavuguruwe kuri 10/6/2014; 11:34 GMT).

SHIKAMA yashinzwe ku itariki ya 11/6/2013, ikaba ari urwunge rw'imbuga zitandukanye zose zigusha ku ntego imwe ariyo: " uharanire ko ukuri gusimbura ikinyoma."

Shikama ikaba yarashinzwe na Dr NKUSI Yozefu ku itariki yavuzwe hejuru  maze nyuma y'amezi make, abanyarwanda bo mu nzego zinyuranye baza kumwunganira kugirango iriya ntego igerweho

" Petero, subiza inkota mu rwubati kuko uwicisha inkota ariyo azazira"Yezu Kristu abwira intumwa Petero. Sobanukirwa n'ikoreshwa ry'amarozi mu Rwanda FPR imaze imyaka 20 ishinjwa, ukuntu iriho nayo iyashinja abaturage ngo baba baroze Jenerali Ruvusha.

Ubusitani bwa Motel Ubwuzu abakiliya bicaramo

Ku cyumweru gishize taliki ya 1/6/2014 nibwo Gen Emmanuel Ruvusha ukuriye Ingabo mu Ntara y’Amajyaruguru, ari kumwe na Maj Donat Bikaga hamwe na Fideli Byiringiro, Umunyamabanga Nshingwabikorwa w’Akarere ka Gicumbi bafashe ifunguro rigizwe n’inkoko yokeje n’ibiyiherekeje, ariko rihita ribagwa nabi bava aho ngaho bajya kwa muganga.

Bukeye ku wa mbere taliki 2/6/2014 Akarere kahise gafunga imiryango y’iyo Motel ariko ntikandika k’urupapuro ruyifunga ko ari amarozi ahubwo kandikaho ko ari ibibazo by’isuku nkeya basanze muri iyo Motel. Umuyobozi w’Akarere ka Gicumbi, Alexandre Mvuyekure akaba yatangarije Umuryango ko koko bakinze iriya Motel kubera ko n’ubwo habaye kiriya kibazo (cy’abakozi bayo bikekwa ko baroze Gen Ruvusha n’abo bari kumwe) n’isuku yaho ngo bayikemanga.

Joseph Kabila utegeka RDCongo ashobora kuba yitabaje Kagame Pawulo nawe wibereye mu mazi abira ngo amufashe kuguma ku butegetsi nyuma ya manda ye ya kabiri: Kagame ngo yamaze kumwoherereza ba bicanyi be 302 bo mu gisoda cye cya RDF ku itariki ya 7/6/2014

Kabila ni umugaragu mwiza udatatira igihango, nguyu akiri
 umurinzi wa Kagame/iyi foto nkuko mubisoma kuriyo yafashwe kuri 13/5/1995 

Nkuko mubisoma hasi aha mu rurimi rw'icyongereza mu nkuru yasohowe n'urubuga Afro American dukesha Veritasinfo, inkuru yabaye impamo i Kigali no muri RDCongo ko ku itariki ya 6/7/2014, absoda 302 ba RDF basesekaye ku kibuga cy'indege cya Ndolo . Aba nanone bakaba biyitiriraga M23 iherutse gukubitwa inshuro muri Kivu n'abasirikare ba RDCongo bafatanyije na MONUSCO. Abari abasirikare bakuru b'iyi M23 barimo koloneli Ngaruye bavuze ko iyo nkuru nabo bayemeza ariko abagiye muri RDC ari abasoda ba RDF atari abarwanyi babao ba M23.