ISESENGURAMPAMVU NA POLITIKI : KUBERA KO FPR YA KAGAME IZI NEZA KO UMUNOTA KU MUNOTA I KIGALI ZISHOBORA GUHINDURA IMIRISHYO, Dr NTAWUKURIRYAYO Yohani Damasenti AHIMBIWE IBYAHA KUGIRA NGO SENA IGABIRWE UMUTUTSI UKOMEYE KU MAHAME YA FPR UGOMBA KWITEGURA GUSIMBURA Paul KAGAME KU BUPEREZIDA MU RWANDA MU MINSI YA VUBA. / UDAHEMUKA Eric

Dr Ntawukuriryayo JD

Mu mutwe w'iyi nkuri nanditsemo FPR ya Kagame nabitekereje hato hatagira umusomyi wa SHIKAMA ukeka ko nibeshye. Ibi mbivuze kuko muri iyi minsi ubyitegereje neza udahubutse kandi utihenze wabona ko FPR yacitsemo ibice 2 bigaragarira buri wese. Ibyo bice biri mu ntambara y'ubutegetsi kandi byombi bikaba bihanganye mu gufata ibyemezo biyobora igihugu ni FPR nise iya Kagame ari nayo abaturage birirwa bambaye inyuguti eshatu ( F P R ) n'ikirango byayo nk'uko bambaraga bimwe bya MRND mu gatuza no mu mugongo ku mipira, ku ngofero cyangwa babambye ku mamodoka yabo, ku magare yabo kimwe no ku mapikipiki yabo cyangwa bakabimanika mu mazu. Iyo ikaba ariyo muri SHIKAMA twakwita FPR igaragarira amaso.

FPR ya 2 niyo nise ko itagaragarira amaso. Igizwe n'abantu bahoze ari inkoramutima za Kagame ubu zimuvuga ayica inka, igizwe kandi n'abandi banyarwanda babihiwe n'uburyo Paul KAGAME atoba igihugu ngo arakiyobora bakaba bibashobokeye bafata ubutegetsi ku kiguzi icyo aricyo cyose ubwato bakabwerekeza aho bashaka. Aba nibo Kagame yirirwa kandi akarara abafunga kuko bananiwe kumvikana ku murongo wo kuyobora igihugu.

Ibi bibazo bivuza ubuhuha imbere muri sisiteme biriyongeraho urwicyekwe rukomeje gututumba mu gisirikari nacyo cyacitsemo ibice 2 kandi bikaba bifitanye isano na FPR ebyiri (2) nasobanuye hejuru. Biriyongeraho abasirikari bakuru Perezida Kagame yirirwa afunga kandi akabasezerera mu gisirikari nk'uwirukana ababoyi bo mu gikoni dore ko nk'uko mperuka kubivuga mu nyandiko yarebanaga n'ifungwa rya Dr Angelika KANTENGWA wategekaga RSSB / CAISSE SOCIALE aribo (ndavuga ababoyi n'abayaya) batagira amategeko abarengera.

Kubera ibi bibazo byose, mu isesengurampamvu na politiki byanjye, ndabona kandi nkemeza ntashidikanya ko abashinzwe kandi bakishingira ko FPR ya KAGAME igumaho babona neza ko Paul KAGAME ashobora kugenda umunota ku munota kubera ibibazo bimaze kumurenga bakaba rero bahimbye ibyaha bitabaho/ nako bibaho ariko Ntawukuriryayo atakoze kugira ngo bamuvane muri uriya mwanya bityo bashyiremo UMUTUTSI utsimbaraye ku mahame ya FPR ya KAGAME bityo azabe ariwe ugirwa Perezida wa Repubulika mu gihe cya vuba kuko mu isesengura ryanjye ndabona KAGAME rwose igihugu cyamunaniye byamurangiranye.

NTAWIKURIRYAYO MU MINSI ISHIZE NABONAGA NEZA KO AZIRUKANWA

Mu minsi ishize SHIKAMA twabagejejeho inkuru yarebanaga n'uruzinduko rwa Dr NTAWUKURIRYAYO mu gihugu cya Kenya aho ngo yari agiye kubagaragariza ko Kigali yiteguye gufatanya nabo guhashya AL SHEBBAB. Muri iyo nkuru nabandikiye ko iminsi ye ari perezida wa Sena ibaze none birabaye. Icyo gihe icyari cyabinteye navuze ko FPR yamuhenze ubwenge akajya kurata kuzarwanya AL SHEBBAAB maze ikazagaba ibitero byibasira u Rwanda muri FPR bagakwitakwiza ko ariwe nyirabayazana none bamuvanyeho nta n'amezi 2 ashize avuye i Nayirobi.

Tubaye nk'abasesengura twihuta ibirego ashinjwa n'ubwo navuze ko ari ibipapirano twabiganiraho uko ari 6 ku buryo bukurikira :

IKIREGO 1: Gukoresha nabi umutungo wa Leta yitwaje umwanya we. (Urugero : kwiyakirira hamwe n’abatumirwa be batarenze batatu akazana fagitire irenga miliyoni 2 ngo yishyurwe na Sena.) / Kuri iki kirego ni nka bimwe abandi bana barega mugenzi wabo ngo yakoze mu nkono kandi nabo ejo bazayikoramo. Niba ari ukwiyakira guhenda Leta, Paul KAGAME aba yaregujwe mbere ye kuko amamiriyari yirirwa atunda ayajyana muri KAGAME DAY abandi bita RWANDA DAY asumbye kure ubwo bumiriyoni 2 kandi nabwo ntemera ko bwakoreshejwe bitewe n'uko ibiciro by'amahoteli i Kigali biri hasi kandi NTAWUKURIRYAYO ni umugabo wihaye washize inzara yo mu mutwe.

IKIREGO 2: Gushaka kwigwizaho ibintu birengeje kamere (Urugero :ibikoresho byo mu icumbi agenerwa n’amategeko.) / Iki kirego cyo cyasetsa n'uvuye guhamba nyina mu irimbi. Dr NTAWUKURIRYAYO njyewe wandika iyi nkuru ndamuzi neza ndetse nanagendaga iwe kuko yiganye na Data hamwe na muramu wanjye (musaza w'umugore wanjye) mu mashuri yisumbuye muri Ecole des Sciences i Bukomero mu Byimana. Ibintu bavuga afite birenze kamere ni ibihe ko nta ndege agira nk'iza Paul KAGAME zijya guparika muri Afurika y'epfo???

IKIREGO 3: Kubonana n’abahagarariye ibihugu byabo cyangwa imiryango mpuzamahanga mu Rwanda abihishe bagenzi be bo muri biro ya Sena kandi nyuma y’iyo mibonano ntabagaragarize ibyayivuyemo. / Ndumiwe, nkiri umunyamakuru i Kigali njyewe ubwanjye najyanye n'umunyamakuru uyobora ikinyamakuru cyitwa UMWEZI icyari kitujyanye kwari ukubaza Dr BIRUTA Vincent ibyo Sena yagezeho kuko yari imaze imyaka 8. Muri icyo kiganiro BIRUTA yaduhaye twicaye mu biro bya Perezida wa Sena, namubajije umubare w'abashyitsi yakiriye nanamubaza niba iteka kwakira abashyitsi ari ngombwa ko Biro yose ya Senat iba ihari, Dr Vincent BIRUTA turebana amaso ku maso yanshubije ko mu myaka 8 yakiriye Délégations 214 (abashyitsi bavuye imahanga inshuro 214) kandi atari ngombwa kubimenyesha bureau kuko biri mu bubasha bwa Perezida wa SENAT. Icyo kiganiro gifite isaha n'iminota 30 ndagifite uwashaka nazakimuha. Ubwo rero kurega NTAWUKURIRYAYO iki kirego ni ukumutesha umwanya.

IKIREGO 4: Kudakorana neza na bagenzi be bagize biro ya Sena ibyo bikagira ingaruka ku zindi nzego zose za Sena nk'uko bigaragara mu ngingo ya 10 y’itegeko ngenga no 08/2012/oL ryo ku wa 02/11/2012 rigenga imikorere ya Sena. / Iki ni ikinyoma cyambaye ubusa. Dr Ntawukuriryayo twakoranye kandi duhurira muri byinshi ndi umunyamakuru mu Rwanda ntarahunga yaba akiri muri MINISANTE kimwe no muri Senat yurukanywemo abura iminsi 23 ngo yuzuze imyaka 3 abaye Perezida wa Senat kuko yarahiye ku italiki 10 Ukwakira 2010. Muri uwo muhango wabereye ku Kimihurura nkaba nari mpari, Perezida Kagame yavuze ko Dr Ntawukuriryayo yayoboye neza Minisiteri y'ubuzima kandi ko ari icyitegererezo cy'umuyobozi mwiza. 

Umunsi  Dr Ntawukuriryayo JD atorerwa kuyobora Senat

Rero muri FPR nibajya kubeshya abaturage bahimbira ibyaha umuntu w'inyangamugayo nka Nyakubahwa NTAWUKURIRYAYO bajye babanza bibuke ibyo bavuze mbere. Mu cyumweru kimwe amaze kurahirira kuyobora Senat twahuriye muri Hôtel MERDIEN UMUBANO ku KACYIRU akaba ariwe wagombaga guha ibihembo abanyamakuru twabaye indashyikirwa mu kwandika inkuru zinoze ku UKUBONEZA URUBYARO iki gikorwa kikaba cyari cyateguwe na INTRAHEALTH TWUBAKANE. Kubera ukuntu ari umugabo w'imfura, tumaze guhabwa ibihembo turimo kunywa AGAFANTA namubajije ikiza hagati yo kuba MINISITIRI W'UBUZIMA no KUBA MURI SENA maze ansubiza ko nk'uko yakoze neza muri MINISANTE ariko azakora no muri SENAT.

IKIREGO 5: Gukoresha igitugu mu nama y’Abaperezida ba za komisiyo za Sena./ Nta gitugu agira muri kamere ye. Muzabaze uko abakozi ba MINISANTE barize amarira akanga gukama bamuvanyemo bakamujyana KIMIHURURA.

IKITEGO 6: Kwivanga mu mirimo ishinzwe bagenzi be muri biro ya sena (Urugero : Gushyirishaho abakozi no gutanga amasoko./ Ibi nabyo birababaje kandi biteye agahinda kuko abakozi bose ba Sena ibahabwa na KOMISIYO MUGANZA (PSC : PUBLIC SERVICE COMMISSION) ntibishoboka ko yivanga kuko ari umugabo wiyubaha kandi utavunda. NI NDE UZAMUSIMBURA ?

Dr Ntawukuriryayo umunsi Minisitiri w'intebe mushya umuri iruhande agabana ubutegetsi bwa Minisitiri w'intebe

Itegeko Nshinga riteganya ko agomba kumenyekana bitarenze iminsi 30 uhereye ku munsi ubwegure bw'uwegura bwakiriwe n'inteko rusange y'abasenateri. Nk'uko nabivuze ntangira iyi nyandiko twageneye abakunzi ba SHIKAMA uzamusimbura byanze bikunze ni UMUTUTSI WAVUYE I BIGANDE W'UMUSIRIKARI CYANGWA W'UMUSIVIRI ariko wumva ibintu kimwe na Kagame. Ibi KAGAME akaba abikoze kugira ngo ejo ejo bundi navaho igihugu azagisigire uwo bavanye i Bugande. Impamvu rukumbi ikaba ko Itegeko nshinga riteganya ko iyo perezida wa Repubulika agize ikibazo asimburwa na Perezida wa Senat ako kanya nta yandi magambo. Ibi rero kuba bibaye ni icyerekana ko KAGAME azi neza urumutegereje kandi ko umunsi uwo ariwo wose yavaho. Rero Dr NTAWUKURIRYAYO w'UMUHUTU uvuka hariya i KINAZI, ntabwo agatsiko kamwihanganira. 

Niyihangane kandi akomere turamusabira!

Dr NTAWUKURIRYAYO INTUMWA ZE ZAMUHAHANYE!!!

Uburyo FPR itegeka u Rwanda buteye agahinda, abateguye ikirego kimweguza ni 3 aribo GAKUBA Jeanne d'Arc, Prof KARANGWA Chyrsologue na Tito RUTAREMARA. Aba 3 bose ni abatsimbaraye ku mahame ya FPR ya KAGAME. Ikibabaje ni uko abagombaga kumurenganura cyangwa kwifatanya nawe babyutse bigamba kuri RADIYO RWANDA bamushinja ibyo atakoze. Abo ni MAKUZA Bernard na MUKASINE Marie Claire. Duhereye kuri MAKUZA ntashobora gukopfora kuko aherutse kurunguruka i Gologota ubu akaba atuwemo n'ubwoba bwarimbura umusozi kandi ntazi urumutegereje nawe mu minsi iza. Naho MUKASINE Marie Claire we namwita NYIRAMBARUBUKEYE kuko FPR imucungisha amaso 1000. Uyu Senateri MUKASINE M.C, umuhutukazi mwene BINEGO ukomoka i SHYOGWE kwa KANKAZI niwe FPR yahaye gasopo yihaye ibyo kujya gushyingura mu cyubahiro Se BINEGO inkotanyi zatabye mu muringoti munsi y'urugo mu 1994 afatanije na muramukazi we MUTAKWASUKU Ivona uyobora akarere ka MUHANGA i GITARAMA none MUKASINE utagira isoni yabyutse atesha agaciro umugabo w'imfura NTAWUKURIRYAYO. Senateri Mukasine namubwira nti: "RURIYE ABANDI RUTAKWIBAGIWE, TEGEREZA GATO!"

UDAHEMUKA Eric

Shikamaye.blogspot.com

shikama ku kuri na Demukarasi(SKUD)