IJAMBO RY’IMANA KURI IKI CYUMWERU CYA 15 GISANZWE, TALIKI 13 NYAKANGA 2014 : Isomo rya mbere : Izayi : 55,10-11 Zaburi : 64,10a-d,10c-11, 12-13 Isomo rya kabiri : Abanyaroma : 8,18-23 Ivanjiri : Matayo : 13,1-23 : «Abanyarwanda barekereje n’amizero kwakira Demukarasi, ubwigenge n’ukwishyira ukizana kuko ingoyi baboheyeho mu gihugu cyabo itakomotse ku bushake bwabo» Abatagatifu : Heneriko, Eugene, Silas na Anaclet.

umubibyi

Kuri iki Cyumweru, taliki 13 Nyakanga 2014 tugeze ku cyumweru cya 15 mu byumweru bisanzwe by’umwaka wa Liturujiya. Kiliziya Fatulika umubyeyi wacu irakomeza kudusobanurira agakiza kacu ibinyujije mu migani Yezu acirag intumwa ze mu gisa n’amarenga kugira ngo zirusheho guca akenge muri iyi si y’ibishuko.

Mu isomo rya mbere, umuhanuzi Izayi (yisunze umugani wa Yezu), aratubwira agaciro k’imvura yo mu bugingo maze nawe akavuga mu mvugo ya Yezu yemeza ko iyo mvura idashobora gusubirayo itabojeje ubutaka yaguyeho. Ibi bikaba aribyo biha umubibyi imbuto n’ifunguro rizamutunga.

Mu isomo rya kabiri, Pawulo Mutagatifu wanditse iki gitabo cy’abanyaroma aradutekerereza kandi akadukumbuza ikuzo dutegereje mu gihe tuzaba twumvise neza wa mugani w’umubibyi Yezu ari bugarukeho mu kanya. Pawulo aremeza ko amagorwa n’imiruho by’iki gihe bidashobora kugereranywa n’ihirwe ridutegereje.

Imvura

Pawulo aremeza ko kuri uwo munsi n’ibyaremwe ubwabyo bizagobotorwa ingoyi y’ubushanguke maze bisangire ubwigenge n’ikuzo by’abana b’Imana. 

Mu Ivanjiri Ntagaifu,  Yezu araducira umugani mwiza utagira uko usa : «UMUGANI W’UMUBIBYI» Muri iyi Vanjiri igizwe n’interuro 23, Yezu arabwira intumwa ze ibyishimo by’ingoma y’ijuru aciye inkereramucyamo (guca i Kibungo).

Yezu arasobanura ibyiciro bine by’abantu muri ubu buzima bwo guharanira ijuru. Ibi byiciro Yezu arabisobanura mu mvugo yumvikana neza cyane aho abantu bose bumva ijambo ry’Imana ntibaryiteho abagereranya n’imbuto yabibwe hafi y’inzira kuko sekibi aza agahita abakuramo icyari cyababibwemo.

Abantu bumva ijambo ry’Imana bakaryakirana ibyishimo ako kanya nyamara ntiribacengeremo kubera guhora bahindagurika, Yezu arabagereranya n’imbuto yabibwe mu rubuye. Aba iyo hadutse ibitotezo bagwa ako kanya.

umubibyi

Yezu arakomeza avuga ko abantu bumva ijambo rye neza ariko imihihibikano n’ibishuko by’ubukungu byo muri iyi si bigapfukirana iryo jambo abagereranya n’imbuto nziza ibibwe mu mahwa kuko ipfa ubusa. Naho abantu bumva ijambo ry’Imana bakera imbuto bagereranywa n’imbuto yabibwe mu gitaka cyiza.

Aba bumva ijambo ry’Imana ntibaryiteho Yezu avuga ni nabo bashyira abaturage ku ngoyi bakabima uburenganzira bwabo, bakabashyira ku ngoyi. Kugira ngo igihugu gikire kigire amahoro, birakwiye ko ubwo butaka bubi bujanjagurwa bugahindurwa ubutaka bwiza bwakira imbuto maze igihugu kigatekana imiriro y’amakome yaka ku manywa y’ihangu ntibikomeze gukungurira igihugu ahubwo ababikora bahinduke bihane ituze riboneke.

Isengesho rya Mutagatifu Faransisiko wa Asizi risabira isi amahoro

NYAGASANI

Ngira umugabuzi w’amahoro yawe!

Ahari urwango mpashyire urukundo

Ahari ubushaymirane, mpashyire kubabarirana

Ahari amacakubiri, mpashyire ubumwe

Ahari ukuyoba, mpashyire ukuri

Ahari ugushidikanya, mpashire ukwemera

Ahari ukwiheba, mpashyize ukwizera

Ahari icuraburindi mpashyire urumuri

Ahari agahinda, mpashyire ibyishimo

Nyagasani, aho gushaka guhozwa…njye mpoza abandi;

Aho gushaka kumvwa… njye numva abandi;

Aho kwikundisha… njye nkunda abandi;

Kuko utanga… niwe uhabwa;

Uwibagirwa… niwe uronka;

Ubabarira… niwe ubabarirwa;

Uhara amagara ye… niwe uzukira kubaho iteka.

Amina.

Abatagatifu b’icyumweru gitaha :

 Kuwa mbere taliki 14 Nyakanga ni Mut. Kamili. Kuwa kabiri taliki 15 Nyakanga  ni Mut. Bonaventure, Donald, Rolando na Vladim. Kuwa gatatu taliki 16 Nyakanga  ni Mut. Mariya Madalina, Posteli na Elivira. Kuwa kane taliki 17 Nyakanga ni Mut. Mariselina, Jyenaroza, Shariloti, Vesitina na Donata. Kuwa Gatanu taliki 18 Nyakanga ni Mut. Armulidi, Feredariko na Simforoza. Kuwa Gatandatu taliki 19 Nyakanga ni Mut. Ariseni na Simaki. Ku Cyumweru gitaha taliki 20 Nyakanga ni icyumweru cya 16 gisanzwe n’abatagatifu: Eliyasi, Marina na Ewuneri. 

Padiri Tabaro M.

shikamaye.blospot.no

Shikama ku Kuri na Demukarasi (SKUD)